Read cisena 2 AKORINTO 12 Bible Online

2 AKORINTO 12 - cisena bible

2 AKORINTO 12

¹Ine ndathema kunyada, podi kwene kuti nkhabepo chakuganyalisa tayu. Mbwenye chinchino ndinati ndilonge pya masomphenya na kunditchululira kudachita Mbuya.

²Ndikupidziwa, pyaka khumi na pinayi pyagwandapyo, mkhristu unango adagomphiwa kwenda kudzulu-dzulu. Ine nkhabe dziwabi ngakhala penepi pidachitikadi penu pikhali masomphenya ene, mbwenye Mulungu yekha ndiye anapidziwa.

³Ndinalonga pontho, ndikudziwa kuti munthu weneyu adagomphiwa kwenda kumbuto yakutsanzaya kudzulu.[6] Penepo pontho ine nkhabe dziwa ngakhala penepi pidachitikadi, penu pikhali masomphenya ene, mbwenye Mulungu yekha ndiye anapidziwa. Kweneko iye adava pinthu pyokhonda longeka, pinthu pyakuti munthu nkhabe kwanisa kupilonga tayu.

⁵Munthu weneyu ine ndinamnyadira, mbwenye nkhabe dzapinyadira ndekha ene tayu kupambula pinthu pile pimbaonesa kusowa kwanga mphamvu.

⁶Ngakhala ndikhafuna kunyada nee mbandidakhala pupwebi, thangwi mbandidalonga pinthu pyakuonadi. Mbwenye ine nkhabe dzanyada tayu, thangwi ine nkhabe funa munthu na mbodzi ene kuti aleke kundiyesa munthu wakufunika pyakwanga kupiringana pinthu pidaona iye ndikuphata pontho kupiva ndikupilonga.

⁷Mbwenye kugopesera ndinatumbama thangwi ya pinthu pyakudodomesa pidaona ine, ndidapaswa chinthu chakupha ninga munga m'manungo mwanga, chile chakhala ninga nyamphangwa wa Satana kuti chindibonerese, towera chindilekese kunyada.

⁸Katatu ndidapemphera kuna Mbuya kuti andibulusire chinthu chenechi.

⁹Mbwenye kutawira kwache kukhali tenepa: “Chinafuna iwe nkhukoma kwanga mtima basi, thangwi mphamvu zanga nsikululetu ndzidzi unasowa iwe mphamvu.” Natenepo ndakomerwa pyakwanga kunyadira kusowa kwanga mphamvu, towera mphamvu za Khristu zikhale pana ine.

¹⁰Ndakomerwa pyakwanga na kusowa kwanga mphamvu, kutikanwa, kuona nyatwa, kubonereswa na kunensiwa thangwi ya kutumikira Khristu. Thangwi ndzidzi unasowa ine mphamvu, penepo ndimbakhala na mphamvu.

¹¹Ine ndakhala ninga pupwe, mbwenye mwachitisa kuti ndichite tenepo ndimwepo. Anthu adathema kundichitira umboni ndimwepo. Podi kwene kuti si ine pinthu tayu, ine nkhabe khala okhonda funikaletu kuna anyakutumwa akufunikawa.

¹²Pidzindikiro na pyakudodomesa pizinji pidachitwa pakati panu mwakupirira kukulu pikutsikimizira kuti ndine nyakutumwa.

¹³Apo ninji chakuipa chidakuchitirani ine kupiringana mipingo inango, kupambula chile chokha chakuti ine sidakunensani tayu na kusowa kwanga kobiri. Ndaphata miyendo, ndilekerereni kudawa kwangaku!

¹⁴Keneka nkhachitatu kuti ndisasanyike dzakufambirani, tenepo ine nkhabe dzakunensani tayu. Thangwi ine sinafuna kobiri zanu tayu, mbwenye imwepo. Si basa ya ana kukoyera ababawo mfuma tayu, mbwenye ababa akoyere anawo.

¹⁵Ndinakomerwa kuvunga pinthu pyonsene pina ine, pontho na ine ene, towera ndiphedze imwepo. Kadi imwe munandifuna pang'ono thangwi ine ndimbakufunani pikulu pene?

¹⁶Apo, imwe munati munditawire kuti ine sidakunenseni tayu, mbwenye unango anati alonge kuti ndine wakuchenjera, pontho kuti ndidakukweshani na unthawatawa wanga!

¹⁷Ayi ine ndidakudyerani nkope-kope kudzera muna amuna adakutumirani ine ale?

¹⁸Ndidapempha Tito kuti abwere kwanuko, pontho ndidatuma mbale mbodzi pabodzi na iye. Ayi Titoyo adakudyerani nkope-kope? Kadi iye na ine tidachita pinthu na manyerezero abodzi tayu, pontho mbatikhala na makhaliro abodzi tayu?

¹⁹Penu mukunyerezera kuti ndzidzi onsene tikhayesa kupitchinjiriza tekha ene pamaso panu? Nkhabe! Timbalonga ninga mumbafunira Khristu kuti ife tilonge pamaso pa Mulungu, pontho ashamwali athu apamtima, pyonsene pimbachita ife timbapichita kuti tiphedze napyo imwepo.

²⁰Ndikuchita mantha kuti ndingabwera kweneko, ndinakugumanani muna makhaliro akusiyana na munafuna ine kuti mukhale nawo, pontho kuti imwe mungandione na makhaliro anga asiyana na mukhafunira imwe mule. Ndikuchita mantha kuti ndinagumana kukangana, bivu, kuzhangali, kupithemba, kutikana, tsweda, kudungudza na kuvunganyika.

²¹Ndikuchita mantha kuti ndingabwera pontho Mulungu wanga anandichepesa pamaso panu, pontho kuti ndinasintiliri anthu ale adadawa kale ene, mbwenye hadaleke makhaliro akuipa tayu, pyakusirira na pyakuzuda pidachita iwo.