Read cisena 2 AKORINTO 13 Bible Online

2 AKORINTO 13 - cisena bible

2 AKORINTO 13

¹Keneka nkhachitatu kuti ndidze dzakufambirani. Ninga munalongera Malemba kuti, “Mseru onsene wathema kutsikimizirwa na mboni ziwiri, penu zizinji.”

²Ndinafuna ndilonge kuna imwe ale mudadawa kale ene, pontho kuna anango onsene; ine ndidaacheuza kale pandzidzi udakufambirani ine kachiwiri ule, kwache ndinati ndiacheuze pontho ndzidzi una ine kutali namwe: ndzidzi unafuna ine dzabwera pontho nkhabe munthu na mbodzi ene wa iwo anafuna ine dzasiya kukhonda kumtchunyusa tayu.

³Penepo munaona chitsikimizo chinafuna imwe chakuti Khristu ndiye ambalonga kudzera muna ine. Iye nkhabe sowa mphamvu tayu pa mabasa ambaphata iye muna imwe; mbwenye ambaonesa mphamvu zache pakati panu.

⁴Ndimomwene kuti akhali wakusowa mphamvu pandzidzi udakhomerwa iye pamtanda, kwache chinchino ana moyo thangwi ya mphamvu za Mulungu. Ifembo ndife akusowa mphamvu mukuphatanizana kwathu naye, kwache tinakhala na moyo pabodzi naye kudzera muna mphamvu za Mulungu kuti tiphate basa pakati panu.

⁵Piyeseni na kupitonga mwekha ene, towera muone ngakhala muna chikhulupirodi. Kadi imwe nkhabe kupidziwadi kuti Khristu Yesu ali muna imwe? Ngakhala si tenepo tayu, ndiye kuti mwapichimwanaletu.

⁶Mbwenye ndikukhulupira kuti imwe munati mudziwe kuti ife nee tapichimwana tayu.

⁷Timbapemphera kuna Mulungu kuti muleke chita pyakuipa, nee towera kuonesa kuti ife tapikwanisa tayu, mbwenye kuti imwe muchite pinthu pyakulungama, podi kwene kuti ife tioneke pyathu ninga tapichimwana.

⁸Thangwi ife nkhabe kwanisa kuchita chinthu chakupokanyisana na pyakuonadi tayu, mbwenye kuchita pinthu pyakuikhira kunduli pyakuonadipyo.

⁹Timbakomerwa ndzidzi umbasowa ife mphamvu, mbwenye imwe mumbakhala na mphamvu. Timbapemphera pontho kuti mukhale anthu akuthema monsene mwene.

¹⁰Ndi thangwi yache ndalemba kalatayi ndzidzi unakhala ine kutali namwe; towera ndingafika kweneko ndileke dzachita vinga namwe pakuphatisa basa utongi udandipasa Mbuya ule, utongi wakuwangisa nawo chikhulupiro chanu, nee wakufudza nawo tayu.

¹¹Chinchino, abale anga, ndaenda! Yesa-yesani kukhala akuthema monsene mwene, vani pinakupemphani inepi; veranani unango na mwanzache. Khalani mwamtendere. Mulungu wakukufunani pontho wamtendere anati akhale namwe.

¹²Pasanani mwenyikiro wachikhristu kuonesa kufunana unango na mwanzache.

¹³Anthu onsene a Mulungu akukupasani mwenyikiro.

¹⁴Kukoma mtima kwa Mbuya Yesu Khristu, kukufunani kwa Mulungu, na chiphatizano cha Mzimu Wakuchena pikhale namwe monsenene.