Read cisena 2 AKORINTO 2 Bible Online

2 AKORINTO 2 - cisena bible

2 AKORINTO 2

¹Tenepo ndidanyerezeradi nee kudza pontho kwanuko kudzakutsukwalisani tayu.

²Ngakhala ine ndinakutsukwalisani, mbani mphapo, anasala kuti anditsanzayise? Anthu ache ngonthowo atsukwalisa ine ale.

³Ndi thangwi yache ndidakulemberani kalata ile; ine sidafune tayu kudza kwanuko, gopesera imwe ene ale mudathema kunditsanzayisa, munanditsukwalisa. Ndikukhulupiradi kuti ndzidzi unakomerwa ine kuno, imwembo mumbakomerwa kweneko.

⁴Mukhalemba ine kalata ile kuna imwe, mtimanga udasanyika na kutsukwala pikulu, pontho ndikhagwisa misozi izinji. Ine sidafune kukutsukwalisani tayu, mbwenye maka kuti ndikuoneseni kukufunani kwanga.

⁵Chinchino, ngakhala pana unango atsukwalisa mwanzache, iye hadatsukwalise ine tayu, mbwenye atsukwalisa imwe monsene m'njira zinango. (Ndikulonga tenepo thangwi ine nkhabe funa kumnensa pyakwanga munthu ninga weneyu tayu.)

⁶Pyakwana kuti munthu weneyu atchunyuswa na anthu azinji ninga tenepa.

⁷Mbwenye chinchino imwe mwathema kumlekerera kudawa kwache, pontho mumuwangise mtima, gopesera anatsukwala pikulu mbatayaletu mtima.

⁸Natenepo ndikukupemphani kuti mumtsikimizire kuti mumbamfuna chadi-chadi.

⁹Ndidakulemberani kalata ile thangwi ndidafuna kukuyesani kuona ngakhala ndzidzi onsene mwasasanyika kuveradi pidakupangani ine pile.

¹⁰Imwe mungalekerera mwanzanu thangwi ya kudawa kwacheko, ine ndamlekererambo. Thangwi ndzidzi unalekerera ine, ngakhala pana chinthu chakuti ndilekerere, ndalekerera pamaso pa Khristu thangwi ya imwepo,

¹¹towera tileke tawirisa Satana kutidyera nkope-kope thangwi tikudziwa machenjerero ache.

¹²Pidafika ine mumzinda wa Troa kalalika Mphangwa Zadidi zakulonga pya Khristu, ndidagumana kuti Mbuya akhadafungula kale msuwo kuti ndikaphate basa kweneko.

¹³Kwache ndidasanyika pikulu mumtima mwanga, thangwi mbaleanga, Tito, sidamgumaneko tayu. Natenepo ndidagonekana na anthu kweneko mbandienda ku Makedonia.

¹⁴Mbwenye takhuta kuna Mulungu ule, thangwi mukuphatanizana kwathu na Khristu, ndzidzi onsene ambatitsogolera pamlikiti wakusekera kukunda kwa Khristu. Mulungu ambatiphatisa basa kuti tivekese mbiri ya Khristu konsene kwene ninga khwema yadidi.

¹⁵Thangwi ife takhala ninga khwema yadidi yakuperekwa na Khristu kuna Mulungu, ile imbanunkhira pakati pa anthu akupulumuka pontho na anthu akutayika ene.

¹⁶Kuna anthu akutayika ale, ndi khwema ya imfa imbaapha, mbwenye kuna akupulumuka ale, ndi khwema yadidi imbaapasa moyo. Apo, mbani anakwanisa kuphata basa ninga yeneyi?

¹⁷Ife nee takhala ninga anthu anango azinji ale tayu, ale ambaphata basa ya Mulungu ninga malonda, mbwenye podi Mulungu atituma, ndi thangwi yache tikulonga na mtima onsene pamaso pache ninga anyabasa a Khristu.