Read cisena 2 AKORINTO 3 Bible Online

2 AKORINTO 3 - cisena bible

2 AKORINTO 3

¹Kadi tikulonga kuti tatoma pontho kupichitira umboni tekha ene? Penu pinafunika kuti ifembo, sasawa ninga anthu anangowa, tikhale na makalata akutichitira umboni kuna imwe, penu akubulukira kuna imwepo?

²Kalatathu ya umboni ndimwepo, yakulembwa mumtima mwathu yakuti munthu onsene anakwanisa kuidziwa pontho kuiwerenga.

³Mphyakuveka mwadidi kuti Khristu makayo ndiye adalemba kalata yeneyi mbaitumiza kudzera muna ife pano. Iyo hidalembwe na tinta tayu, mbwenye na Mzimu wa Mulungu wamoyo, pontho hidalembwe pamwala tayu, mbwenye m'mitima ya anthu.

⁴Tikulonga tenepa thangwi timbanyindira Mulungu pikulu kudzera muna Khristu.

⁵Thangwi muna ife tekha nkhabe chinthu na chibodzi chene tayu chile chinatichitisa kulonga kuti tinakwanisa kuphata basa yeneyi. Kukwanisa kuna ife kuchita nako penepi kumbabulukira kuna Mulungu;

⁶ndiye ene onthoyo ule adachitisa kuti ife tikwanise kutumikira chiverano chachinchino, chile nee china mwambo wakuchita kulembwa tayu, mbwenye wa Mzimu Wakuchena. Mwambo wakuchita kulembwa umbadzesa imfa, mbwenye Mzimu Wakuchena ambapasa moyo.

⁷Mwambo wa Mose udalembwa pakuchita kugoba pamwala, tenepo demelero ya Mulungu idaoneka pandzidzi udaperekwa mwambowo. Demeleroyo idang'azimira pyakwanga mwakuti anthu a ku Israele hadakwanise kuyang'anisisa nkhope ya Mose tayu, podi kwene kuti kung'azimirako kukhathima. Ngakhala mwambo wakukhala na mphamvu zakudzesa imfa udadza na demelero ninga yeneyi,

⁸apo ndi tani na demelero ya mabasa a Mzimu Wakuchena!

⁹Ngakhala basa imbachitisa anthu kukonwa ile njademelero, apo ndi tani na basa imbachitisa anthu kuti apulumuke!

¹⁰Na thangwi yakuti yaoneka demelero yakung'azimira pikulu pene, demelero yakale, ikhaoneka ninga yakung'azimira ile, chinchino yathima.

¹¹Ngakhala pinthu pyakuthima pile pikhali na demelero ndzidzi pang'ono basi, apo ndi tani na demelero ya pinthu pile mphyakukhala na kukhala!

¹²Na thangwi yakuti tina chidikhiro chenechi ife tawanga mtima pikulu.

¹³Ife nkhabe khala ninga Mose tayu, ule akhampsampsika nkhope yache na nguwo, towera anthu a ku Israele aleke kuona kumalisika kwa kuthima kwa cheza cha demelero kunkhope kwache.

¹⁴Ndimomwene kuti manyerezero awo adafungika; tenepo na lero manyerezero awo ampsampsirwa na nguwo ndzidzi unawerenga iwo mabukhu a chiverano chakale chile. Chakumpsampsira chenechi chimbakunundulwa munthu angaphatanizana na Khristu basi.

¹⁵Podi na lero ene iwo angawerenga mwambo wa Mose, chakumpsampsirachi champsampsira basi manyerezero awo.

¹⁶Mbwenye chakumpsampsira chimbakunundulwa munthu angazungunukira kuna Mbuya.[3]

¹⁷Chinchino “Mbuya” m'ndima yeneyi ndi Mzimu; tenepo kule kuna Mzimu wa Mbuya, konthoko kuna utumbe.

¹⁸Ife tonsene takhala ninga gilazi kuonesa demelero ya Mbuya na nkhope zakusowa chakumpsampsira, tenepo demelero yonthoyo, ile imbabulukira kuna Mbuya, ule ndi Mzimu, imbatisandusa na demelero yakuthimiza kuinjipa kukhala ninga iye.