Read cisena 2 AKORINTO 5 Bible Online

2 AKORINTO 5 - cisena bible

2 AKORINTO 5

¹Thangwi tikupidziwa kuti m'khumbi munakhala ife mule, manungo athu apansi pano, ingafudzika, Mulungu atisasanyira nyumba yakuti tikakhalemo kudzulu, nyumba yasasanya iye mwenechiro, ile njakukhala na kukhala.

²Ndi thangwi yache chinchino tikubulira, pontho kukhumba pikulu pene kuti Mulungu ativazike na nyumba yathu yakudzuluyo.

³Tingaivala, nee tinakhalave akusowa manungo tayu.

⁴Ndzidzi unakhala ife m'khumbi yapansi pano, tikubulira pontho kuva kupha thangwi ya nyatwa zinaona ife, nee kuti tinafuna kudula manungo athu apansi pano tayu, mbwenye kuti tinafuna kuvala manungo akudzulu, towera pinthu pimbavunda pile pisanduswe moyo okhonda mala.

⁵Mulungu ndiye adatisasanyira pinthu penepi, pontho adatipasa Mzimu Wakuchena kukhala chitsikimizo cha pinthu pyonsene pinafuna ife dzatambira.

⁶Natenepo ndzidzi onsene timbawanga mtima. Tikupidziwa kuti ndzidzi onsene unakhala ife m'manungo, ale ndi nyumba yapansi pano, tili kutali na Mbuya.

⁷Moyo wathu wagona pachikhulupiro, nee papinthu pimbaona ife tayu.

⁸Tawanga mtima pyakwanga mbatipifuna pyakwanga kusiya nyumbathu yapansi pano kuti tikakhale kunyumba ya Mbuya.

⁹Kupiringana pyonsene, chinafuna ife ntchakuti, ndzidzi una ife m'nyumba yapansi pano, penu ya kuna iyeko, ife tichite pinthu pyakumkomera.

¹⁰Thangwi tonsenefe tathema dzatongwa mseru pamaso pa Khristu. Munthu onsene anatambira pinthu pyakuthemerana na pinthu pyonsene pyaphata iye m'manungo ache apansi pano, pyadidi, penu pyakuipa.

¹¹Na thangwi yakuti ife tikupidziwa kuti kugopa Mbuya ninji, ife timbayesa-yesambo kunyengerera anthu anango. Mulungu ambatidziwa monsene mwene, tenepo ndina chidikhiro kuti imwembo mumbandidziwa mumtima mwanumo.

¹²Ife nkhabe yesa pontho kupichitira tekha ene umboni kuna imwe tayu, mbwenye kuti tikupaseni mathangwi adidi akuti munakwanisa kutinyadira nawo, towera mukwanise kutawira mwadidi anthu ale ambanyadira makhaliro awo akunja, nee pya mumtima tayu.

¹³Ngakhala talongwa kuti tayaluka, pikhale tenepo kulemedza napyo Mulungu. Mbwenye ndimomwene kuti tina nzeru, kuphedza nazo imwepo.

¹⁴Kutifuna kwa Khristu ndiye kumbatikhakhamiza, podi chinchino tadzindikira kuti munthu mbodzi adafera anthu onsene, natenepo anthu onsene adafambo.

¹⁵Iye adafera anthu onsene, towera anthu ana moyo ale aleke khalave na moyo wakufuna kupichitisa okha ene kukomerwa, mbwenye kuti achitise iye kukomerwa, ule adafa mbalamuswa kuimfa thangwi ya iwo.

¹⁶Natenepo kubulukira lero kwenda m'tsogolo ife nkhabeve tonga mseru munthu na mbodzi ene mwakuteweza nzeru za anthu tayu. Podi kwene kuti ndzidzi unango ife tidatonga Khristu mwakuteweza nzeru za anthu, ife nkhabe chitave tenepo tayu.

¹⁷Ngakhala munthu anaphatanizana na Khristu, iye ambasanduka chakulengwa chachinchino; pyakale pyaenda, pyachinchino pyadza.

¹⁸Pyonsene pimbachitwa na Mulungu, ule kudzera muna Khristu adatichitisa kuti tikhale pontho ashamwali ache, pontho adatipasa basa yakuti tichitisembo anthu anango kuti akhale pontho ashamwali ache.

¹⁹Mphangwa zina ife nsakuti Mulungu akhachitisa pontho anthu onsene kukhala ashamwali ache kudzera muna Khristu.[4] Mulungu hadakoye mangawa pana pyakudawa pyawo tayu, pontho iye atipasa mphangwa zakupanga anthu pya mule mumbaachitisira iye kukhala pontho ashamwali ache.

²⁰Apo, chinchino, tikulonga m'mbuto mwa Khristu, khala ninga Mulungu maka ndiye akulonga namwe mwakukudembeterani kudzera muna ife. Ife tikukupemphani m'mbuto mwa Khristu: mlekeni Mulungu akuchitiseni pontho kukhala ashamwali ache.

²¹Khristu akhali nyakukhonda dawa, mbwenye Mulungu adamchitisa kukhala ninga nyakudawa thangwi ya ife, towera mukuphatanizana kwathu na iye tisanduke anthu akulungama pamaso pa Mulungu.