Read cisena 2 AKORINTO 6 Bible Online

2 AKORINTO 6 - cisena bible

2 AKORINTO 6

¹Podi, chinchino, tikuphata basa pabodzi na Mulungu, tikukudembeterani imwe, ale mwatambira kukoma mtima kwa Mulungu, kuti muleke tawirisa pidatambira imwe pile kuti pivungike.

²Ngavani pinalonga Mulungu kuti: “Pidafika ndzidzi wakuti ndikuoneseni kukoma kwanga mtima ndidakuvani; pidafika nsiku yakuti ndikupulumuseni ndidakuphedzani.” Ngavani kuno! Uno ndi ndzidzi unakomera Mulungu anthu mtima; lero ndi nsiku yakupulumuka.

³Ife nkhabe funa munthu na mbodzi ene kuti alulupise basa inaphata ifeyi tayu, natenepo ife nkhabe yesa na pang'ono pene kutchinga njira ya munthu na mbodzi ene tayu.

⁴M'mbuto mwache papinthu pyonsene pimbachita ife timbaonesa kuti ndife anyabasa a Mulungu pakupirira kwathu pikulu panyatwa, kusanyika, pontho pyakunensa.

⁵Ife tamenywa, taikhwa m'perezo, pontho tasoswa na mwinji; taphata basa mwakupiringana mdida, pontho ndzidzi unango nee tikhadya penu kugona tayu.

⁶Mbwenye na mtima wakuchena, udziwisi, kupirira na kukoma mtima kwathu, taonesa kuti ndife anyabasa a Mulungu na mphamvu za Mzimu Wakuchena, na kufunana kwathu chadi-chadi,

⁷na mphangwa zathu zakuonadi zimbalalika ife, pontho na mphamvu za Mulungu. Chilungamo chakhala ninga chida m'manja mwathu chakumenya na chakutchinjiriza nacho.

⁸Ife timbalemedzwa pontho timbalulupiswa; timbatikanwa pontho timbasimbwa; timbayeswa ninga akunama, kwache timbalonga pyakuonadi;

⁹timbayeswa ninga anthu okhonda dziwika, kwache anthu onsene ambatidziwa; timbayeswa ninga anthu akufa, kwache tina moyo ninga munationera imwemu. Podi kwene kuti timbatchunyuswa, ife nkhabe kufa tayu;

¹⁰podi kwene kuti timbatsukwaliswa, ife timbakomerwa ndzidzi onsene; timbaoneka ninga anthu akutcherenga, kwache timbafumisa anthu azinji, timbaoneka ninga anthu akusoweratu, kwache tina pinthu pyonsene.

¹¹Ashamwali athu a mu Korinto! Ife talonga mwakusudzuka kuna imwe; tafunguladi mtima.

¹²Si ife afunga mtimathu kuna imwe tayu; mbwenye ndimwe mwafunga mtimanu kuna ife.

¹³Chinchino ndikulonga namwe khala ninga ndimwe ananga: tionesenimbo kutifuna sasawa ninga kukufunani kudachita ife. Fungulani mtima!

¹⁴Lekani phatizana na anyakukhonda khala akhristu, khala ninga imwe na iwo ndi sasawa. Kadi kulungama kungakwanisike kuphatizana na kudawa? Kadi cheza chingakwanisike kuphatizana na mdima?

¹⁵Kadi Khristu angakwanisike kuphatizana na Satana? Mkhristu na munthu okhonda khala mkhristu ninji chinafuna iwo khalira pabodzi?

¹⁶Pana kuphatizana kwanji pakati pa Nyumba ya Mulungu na mifanikizo yakupembedzwa ninga milungu? Thangwi ife ndife Nyumba ya Mulungu wamoyo! Ninga mwapilongera Mulungu mwenechiro mbati: “Ndinakhazikika muna iwo, mbandikhala pakati pawo; Ndinakhala Mulungu wawo, iwombo mbakhala anthu anga.”

¹⁷Tenepo Mbuya akulonga kuti, “Bulukani pakati pawo, mbamupambuke kuna iwo. Lekani khuya pinthu pyakunyansa, tenepo ine ndinati ndikutambireni.

¹⁸Ndinati ndikhale babanu, imwembo mbamukhala ananga achimuna na achikazi, alonga Mbuya Wamphamvu zonsene.”