Read cisena 2 AKORINTO 7 Bible Online

2 AKORINTO 7 - cisena bible

2 AKORINTO 7

¹Ashamwali anga apamtima, pyonsene pidadumbira Mulungu pile pinachitwa kuna ife pano. Tenepo tendeni tipichenese tekha ene kuna pinthu pyonsene pimbaswipisa manungo na mtima pile, pontho tikhale anthu akuchena monsene mwene pakukhala anthu akugopa Mulungu.

²Tisasanyireni mbuto mumtima mwanu. Ife nee tadawira munthu na mbodzi ene, penu kuipisa munthu na mbodzi ene, penu kuyesa kudyera nkope-kope munthu na mbodzi ene tayu.

³Ine ndikulonga penepi, nee kuti ndikuchitiseni kukhala akukonwa tayu; thangwi ninga mudalongera ine pakutoma imwe ndimwe apamtima pathu mwakuti ndzidzi onsene tili pabodzi pene, penu tife penu tikhale na moyo tani.

⁴Ndikulonga namwe mwakusudzuka pikulu pene; pontho ndimbakunyadirani pyakwanga! Panyatwa zathu zonsene ndimbawanga basi mtima, tenepo ndakomerwa pyakwanga pene.

⁵Na pidafika ife ku Makedonia kwene, hatidapuma tayu. Konsene kwene kukhali nyatwa zikulu, kukangana na anthu anango, pontho tikhali na mantha mumtima mwathu.

⁶Mbwenye Mulungu, nyakuwangisa anyakutaya mtima, adatiwangisa mtima na kudza kwa Tito.

⁷Kudatiwangisa mtima si kudza kwache kokha tayu, mbwenye pontho pidava ife kumuwangisa mtima kudachita imwe kule. Iye adatipanga mule munakhumbira imwe kuti mundione, pya kutsukwala kwanu, kusasanyika kwanu kuti munditchinjirize, tenepo chinchino ndakomerwa pyakwanga pene.

⁸Ngakhala kalatangayo idakutsukwalisani, ine nkhabe tsukwala tayu kuti ndidailemba. Ine mbandidatsukwala ndzidzi udaona ine kuti kalatayo idakutsukwalisani ndzidzi pang'ono basi.

⁹Mbwenye chinchino ndakomerwa, nee kuti ndidakutsukwalisani tayu, mbwenye kuti kutsukwala kwanuko kudachitisa kuti musanduze makhaliro anu. Mulungu adaphatisa basa kutsukwala kweneku mwakuti pidachita ife nee pidakugoswani tayu.

¹⁰Thangwi kutsukwala kumbaphatisa basa Mulungu nkhabe tsukwalisa munthu tayu, kwache kumbamchitisa kuleka pyakudawa pyache, kule kumbadzesa chipulumuso. Mbwenye kutsukwala ninga kumbachita anthu apansi pano kumbadzesa imfa.

¹¹Yang'anani pidachita Mulungu na kutsukwala kwanuko; kwakupasani phinga pikulu, kwakupasani chipapu kukutsikimizirani kuti ndimwe anthu okhonda chinthu chakukupokanyisani; kwakuzhangalisani pyakwanga na pyakuipa, pontho kwakupasani mantha akulu; kwakuchitisani kuti mukhumbe pikulu kundiona; kwakuchitisani kuti mukhale anthu akutsalakana; pontho kwakupasani chipapu kuona kuti chilungamo chikutewezwa. Papyonsenepi mwatsikimiza kuti imwe nkhabe chinthu chakukupokanyisani tayu.

¹²Kalatayo nee ndidailembera nyakudawa penu nyakudawirwa tayu, mbwenye ndidailemba kuti ndikuoneseni kutitsalakana kwanu kukulu pamaso pa Mulungu.

¹³Ndi thangwi yache tidawanga mtima tenepa. Nee tidawanga kokha mtima tayu; mbwenye maka-maka tidakomerwa pyakwanga pene pakuona kukomerwa kwa Tito, thangwi monsenene mudamphedza kumuwangisa mtima.

¹⁴Ine ndidampanga kuti ndimbakunyadirani, pontho imwe nee mudandichitisa manyadzo tayu. Ndzidzi onsene talonga pyakuonadi kuna imwe, sasawambo pidapanga ine Tito kuti timbakunyadirani pile, pyatsikimizika kuti mphyakuonadi.

¹⁵Natenepo kukufunani kwache kukukula na mphamvu, ndzidzi unakumbuka iye pya kusasanyika kudachita imwe kuvera pinthu pidakupangani iye pile, pontho kumtambira mwadidi kudachita imwe mwakutetemera na mantha kule.

¹⁶Ndakomerwa pyakwanga kuti ndinakwanisa kukukhulupirani monsene mwene!