Read cisena 2 AKORINTO 8 Bible Online

2 AKORINTO 8 - cisena bible

2 AKORINTO 8

¹Abale athu, tinafuna mudziwe mule mudaonesa Mulungu kukoma mtima kwache kuna mpingo wa ku Makedonia.

²Anthu a mumpingo wenewu ayeswa pikulu na nyatwa zidaona iwo, kwache adakomerwa pyakwanga mwakuti adapereka mwakufewa manja, podi kwene kuti iwo ngakutcherenga pyakwanga.

³Ndinakwanisa kuchitira umboni kuti iwo adapereka ninga mudakwanisira iwo, pontho kupiringana mudakwanisira iwo, mwakukhonda khakhamizwa na munthu unango.

⁴Iwo adatidembetera kuti tiapase mwayi wakuti iwombo aphedze anthu a Mulungu a ku Yudea.

⁵Iwo adapichita mwakupiringana mukhadikhira ife! Chakutoma adapipereka okha ene kuna Mbuya; kubuluka penepo na kufuna kwa Mulungu iwo adapipereka pontho kuna ife.

⁶Tenepo tidampempha Tito, adatoma basa yeneyi ule, kuti athimize kuiphata, pontho akuphedzeni kumalisa basa yakupereka mwakukoma mtima inachita imweyi.

⁷Imwe ndimwe anthu akufuma pyakwanga mupyonsene: m'chikhulupiro, m'malongero na nzeru, phinga ina imwe kufuna kwanu kutiphedza, pontho na kutifuna kwanu.[5] Natenepo tinafuna kuti imwe mukhalembo anthu akufewa manja kuna basa yakuperekayi.

⁸Penepa ine nkhabe funa kukutongani pyathema imwe kuchita tayu. Pinachita ine nkhuyesa kuona kufunana kumbachita imwe pakukuonesani phinga inachita anthu anango kufuna kuphedza.

⁹Imwe mukudziwa kukoma mtima kwa Mbuyathu Yesu Khristu. Podi kwene kuti iye akhali nyakufuma, iye adasanduka nyakutcherenga thangwi ya imwepo, towera imwe musanduke anthu akufuma na kutcherenga kwacheko.

¹⁰Kupiona kwanga nkhwakuti, mphyadidi kuti imwe mumalise basa idatoma imwe chaka chamala ile. Imwe mukhali akutoma, nee kuchita kokha tayu, mbwenye na kufuna kwene kupichita.

¹¹Apo, malisani basayi, towera phinganu kufuna kupichita, ithemerane na kuimalisa kwanu, malingana na pinthu pina imwe.

¹²Ngakhala imwe munachita phinga kufuna kupereka, Mulungu anatambira mtukwanu malingana na pinthu pina imwe, nee pinakhonda imwe khala napyo tayu.

¹³Penepa ine nkhabe yesa tayu kuchitisa anthu anango kululupirwa uku imwe mukunenseka; mbwenye podi muna pinthu pizinji ndzidzi uno, mphyadidi kuti mupipereke kuna anyakupisowa, towera m'tsogolo angakhala napyo pyakuinjipa, iwo akuphedzenimbo na pinasowa imwe. Tenepo pyonsene pinakhala sasawa.

¹⁵Ninga munalongera Malemba kuti, “Munthu adagumanya pinthu pizinji ule, iye nkhabe pizinjiletu tayu, pontho munthu adagumanya pinthu pyakuchepa ule, iye nkhabe pyakuchepaletu tayu.”

¹⁶Tinapereka takhuta kuna Mulungu thangwi ya kupasa Tito phinga yakuti akuphedzeni ninga munachitira ifembo!

¹⁷Iye hadakomerwe kokha kuchita pidampempha ife tayu, mbwenye iye adachita phinga pyakwanga kukuphedzani mwakuti na kufuna kwache iye adanyerezera kudza kwanuko.

¹⁸Tikumtuma pabodzi pene na mbaleathu, ule ambalemedzwa pikulu na mipingo yonsene thangwi ya basache yakulalika Mphangwa Zadidi.

¹⁹Si pyokhapyo tayu, iye asankhulwa na mipingo kuti afambe na ife pabodzi ndzidzi unasonkhesa ife pontho kugawa chakuperekachi thangwi ya demelero ya Mbuya, pontho towera tionese chipapu china ife kufuna kuphedza.

²⁰Ife nkhabe funa tayu kuti anthu adungunye na munaphatisira ife basa chakuperekwa mwakufewa manjachi.

²¹Pinafuna ife nkhuchita pinthu pyakulungama, nee pamaso pa Mbuya pokha tayu, mbwenye na pamaso pa anthu pene.

²²Tenepo tikumtuma mbaleathu unango pabodzi pene na iwo; ife tamuyesa kazinji kene, tenepo tamgumana kuti iye ana phinga ndzidzi onsene kufuna kuphedza. Chinchino iye ana phinga kufuna kuphedza, thangwi iye ambakukhulupirani pyakwanga pene.

²³Kulonga pya Tito, weneyu ndi mwanzanga, pontho timbaphatira pabodzi basa, towera tiphedze imwepo; abale anangombo anaenda pabodzi na iyewo, ngakuimirira mipingo yawo, pontho ambadzesa demelero kuna Khristu.

²⁴Aoneseni kuafuna kwanu, towera mipingo yonsene ive pya kuafuna kwanu, pontho kudziwa kuti kukunyadirani kwathu nkhwakuthema.