Read cisena 2 AKORINTO 9 Bible Online

2 AKORINTO 9 - cisena bible

2 AKORINTO 9

¹Ine nkhabe funika pontho kuti ndikulembereni pya chiphedzo chinatumizwa kuna anthu a Mulungu a ku Yudea tayu.

²Ndikupidziwa kuti imwe munafuna kuphedza, tenepo ndakunyadirani pyakwanga kuna anthu a ku Makedonia. Ndidalonga kuti, “Abale athu a ku Akaya asasanyika kupereka kutomera chaka chamala chile.” Kupichita kwanu mwaphinga kwapasa chipapu azinji a iwo kweneko.

³Chinchino ndikuatuma abale enewa, towera kukunyadirani kwathu pa penepi kuleke khala kwapezi, mbwenye kuti musasanyikedi kuphedza ninga mudalongera ine mule.

⁴Ngakhala anthu a ku Makedonia anatsagana na ine, mbakugumanani kuti nee mwasasanyika tayu, ife tinachita manyadzo pyakwanga kuleka kulonga pya manyadzo anu, thangwi ya kukukhulupirani kudachita ine!

⁵Natenepo ndidanyerezera kuti pikhali pyadidi kupempha abale enewa kuti atome tsogola ndiwo kuti asasanyiletu mtukwa udadumbira imwe kuti munaupereka ule. Tenepo ndingafika kweneko ndinagumana wakumanga-manga kale, penepo pinaonesa kuti imwe mudapereka mtukwawo na kufuna kwanu, nee mwakuchita kukhakhamizwa tayu.

⁶Kumbukani kuti munthu wakubzala pyakuchepa, ambavuna pyakuchepambo, pontho nyakubzala pyakuinjipa, ambavuna pyakuinjipambo.

⁷Munthu onsene apereke ninga munanyerezera iye, nee mwakutsamala penu mwakuchita kukhakhamizwa tayu; thangwi Mulungu ambamfuna munthu wakupereka mwakukomerwa.

⁸Tenepo Mulungu anakwanisa kukupasani pizinji kupiringana pinasowa imwe, towera ndzidzi onsene mukhale na pinthu pyonsene pinasowa imwe, pontho na pinango pizinji pyakuti munakwanisa kuphata napyo mabasa adidi a mtundu na mtundu.

⁹Ninga munalongera Malemba kuti, “Iye ambapereka kuna anyakupisowa mwakufewa manja; kukoma kwache mtima nkhwakukhala na kukhala.”

¹⁰Tenepo Mulungu, nyakupereka mbewu kuti tibzale, pontho mkate kuti tidye, anaperekambo kuna imwe mbewu zonsene zinasowa imwe, tenepo iye anapichitisa kukula na kubala pinthu pizinji kubulukira pa kupereka kwanu mwakufewa manjako.

¹¹Ndzidzi onsene iye anakuchitisani kukhala akufuma mwakuti ndzidzi onsene munakwanisa kupereka mwakufewa manja, towera anthu azinji apereke takhuta kuna Mulungu thangwi ya mitukwanu inatambira iwo kubulukira kuna ife ile.

¹²Thangwi basa inaphata imweyi nee ikuphedza kokha anthu a Mulungu tayu, mbwenye ikuchitisa kuti anthu azinji apereke takhuta kuna Mulungu mwakukomerwa.

¹³Na thangwi ya kukutsikimizirani kunachita basanuyi, anthu azinji analemedza Mulungu thangwi ya kuvera kwanu Mphangwa Zadidi zakulonga pya Khristu zidatawira imwe na mulomo wanu zile, pontho kugawana nawo kwanu pontho na anthu anango onsene mwakufewa manja.

¹⁴Natenepo iwo anakupemphererani na kukufunani kukulu, thangwi Mulungu akukomerani mtima pikulu pene.

¹⁵Tendeni tipereke takhuta kuna Mulungu thangwi ya mtukwache okhonda longeka!