Read cisena AGALATIA 1 Bible Online

AGALATIA 1 - cisena bible

AGALATIA 1

¹Kubulukira kuna ine Paulo, ule adachemerwa kukhala nyakutumwa nee na munthu tayu, penu kudzera muna munthu tayu, mbwenye adachemerwa na Yesu Khristu, pontho na Mulungu Baba, adalamusa Yesu kuimfa ule,

²pontho na kuna abale onsene ali kuno pabodzi na inewa, Kwenda kuna mipingo ya kunthemba ya Galatia:

³Kukoma mtima na mtendere pyakubulukira kuna Mulungu Babathu na Mbuya Yesu Khristu pikhale namwe.

⁴Na kuvera kufuna kwa Mulungu ule ndi Babathu, Khristu adapipereka yekha ene ninga nsembe thangwi ya pyakudawa pyathu, towera atisudzule panyatwa za ndzidzi wakuipawu.

⁵Tenepo kuna Mulungu kukhale demelero yakukhala na kukhala! Ameni.

⁶Ndadodoma napyo kuti imwe mwabauka msanga tenepa kuleka Mulungu, adakuchemerani kudzera muna kukoma mtima kwa Khristu ule, mbamutewera mphangwa zinango zakusiyana na Mphangwa Zadidi.

⁷Mphangwa zimbateweza imwe zile, si mphangwa zadidi chadi-chadi tayu. Pana anthu anango akukudzudzumisani. Iwo akuyesa-yesa kuti apotoze Mphangwa Zadidi zakulonga pya Yesu Khristu.

⁸Mbwenye podi kwene kuti ife penu mngelo wakubulukira kudzulu alalike mphangwa kuna imwe zakusiyana na zidakulalikirani ife zile, weneyo athema kutchunyuswa kwenda na kwenda.

⁹Penepi tidapilonga kale, mbwenye chinchino ndikupilonga pontho kuti ngakhala munthu unango anakulalikirani mphangwa zinango zakusiyana na zidatambira imwe zile, munthu weneyo athema kutchunyuswa kwenda na kwenda.

¹⁰Kadi mukunyerezera kuti pinachita inepi nkhuyesa kufuna kusimbwa na anthu? Nkhabe tayu, mbwenye kuti ndisimbwe na Mulungu. Kadi ndikuyesa kufuna kukoma kuna anthu? Mbapidakhala kuti ndikhayesa kukoma kuna anthu, ine nee mbandidakhala nyabasa wa Khristu tayu.

¹¹Abale anga, ndinafuna ndikupangeni kuti Mphangwa Zadidi zinalalika inezi, si zakubulukira kuna munthu tayu.

¹²Sidachite kuzitambira kubulukira kuna munthu na mbodzi ene tayu, nee munthu na mbodzi ene adandifunzisa tayu. Mbwenye ndidazitambira mwakuchita kutchululirwa na Yesu Khristu.

¹³Imwe mwava pya makhaliro anga akale ndzidzi ukhapipereka ine kuteweza chipembedzo cha Chiyuda ule, mule mukhaboneresa ine mpingo wa Mulungu mwakukhonda kuva nawo kwene nsisi, pontho na mule mukhawanga-wanga ine kuuvunga.

¹⁴Ine ndikhali patsogolo pa Ayuda anzanga azinji a thunganga papinthu pya chipembedzo cha Chiyuda pikhaphata ine pile, pontho ndikhapipereka pyakwanga kuna mitemo ya makolo athu.

¹⁵Mbwenye Mulungu na kukoma kwache mtima adandisankhulaletu ndidzati balwa, mbandichemera kuti ndimphatire basa. Tenepo pidanyerezera iye

¹⁶kutchulula Mwanache kuna ine, towera ndilalike Mphangwa Zadidi zakulonga pya Yesu kuna anthu okhonda khala Ayuda, ine sidende kuna munthu na mbodzi ene kavunza nzeru tayu,

¹⁷nee ndidenda ku Yerusalemu kaonana na ale akhali anyakutumwa ine ndidzati sanduka nyakutumwa. Mbwenye ndidenderatu kudziko ya Arabia; kubuluka penepo ndidabwerera ku Damasiko.

¹⁸Pidagwanda pyaka pitatu ndidenda ku Yerusalemu kaonana na Peturo mbandikhala naye madimingu mawiri.

¹⁹Kweneko sidaonane na nyakutumwa unango tayu kupambula Yakobo,[1] mbaleache Mbuya.

²⁰Pinalemba inepi mphyakuonadi. Mulungu akupidziwa kuti nee ndikunamabi.

²¹Kubuluka penepo ndidenda kunthemba za Siria na Kilikia.

²²Pandzidzi wenewu mipingo ya mu Yudea hikhandidziwa na pankhope tayu.

²³Iwo akhava kwene mbiri basi kuti: “Munthu akhatiboneresa pakutoma ule, chinchino akulalika chikhulupiro chikhayesa iye kuchivunga chile!”

²⁴Natenepo iwo adakuza Mulungu thangwi ya pidachitika kuna ine pile.