Read cisena AGALATIA 2 Bible Online

AGALATIA 2 - cisena bible

AGALATIA 2

¹Pidagwanda pyaka khumi na pinayi ndidenda pontho ku Yerusalemu pabodzi na Barnaba. Pa ulendo wanga ndidakwata pontho Tito.

²Ine ndidenda thangwi ya kunditchululira kudachita Mulungu kuti ndiende. Pamgumano wa akadamu okhokha, ndidaapanga Mphangwa Zadidi, zile zikhalalika ine pakati pa anthu okhonda khala Ayuda. Ine sidafune tayu kuti basa ikhadaphata ine penu ikhaphata ine ikhale yapezi-pezi.

³Tito adatsagana na ineyi, podi kwene kuti akhali Mgriki, iye hadakhakhamizwe kuti agwandwe nsonga yachimuna tayu.

⁴Mphoka yeneyi idalamuka thangwi ya anthu anango, ale akhadapita mwakupibisa m'gulu mwathu kupisangiza ninga abale athu, towera azonde utumbe una ife mukuphatanizana kwathu na Khristu Yesu. Iwo akhafuna kuti tikhale mabitchu.

⁵Mbwenye ife nee tidachita pikhafuna iwo na pang'ono pene tayu, towera tikukoyereni mwadidi pyakuonadi pya Mphangwa Zadidi.

⁶Mbwenye, ale akhaoneka ninga mbakadamu (ndikulonga penepi thangwi ine nkhabe ona kusiyana na mukhali iwo kale mule tayu), Mulungu nkhabe tonga mseru mwakuyang'ana nkhope tayu, ndikulonga akadamu ale nkhabe chinthu chibodzi chitswa chidathimiza iwo kundifunzisa pa pidalalika ine pile tayu.

⁷Kwache iwo adaona kwene kuti Mulungu andipasa basa ya kulalika Mphangwa Zadidi kuna anthu okhonda khala Ayuda, ninga montho mukhadapasira iye Peturo basa ya kulalika Mphangwa Zadidi kuna Ayuda.

⁸Thangwi na mphamvu za Mulungu ine ndidaikhwa kukhala nyakutumwa kuna anthu okhonda khala Ayuda, ninga montho mudaikhirwa Peturo kukhala nyakutumwa kuna Ayuda.

⁹Yakobo, Peturo na Yohani, ale akhaoneka ninga mizati, adadzindikira kuti Mulungu akhadandipasa basa yakusankhulikayi, tenepo iwo adapereka dakamawu kuna Barnaba na ine kuonesa kuti tonsene ndife abodzi. Ife tidatawirizana kuti ine na Barnaba tiende kuna anthu okhonda khala Ayuda, iwombo aende kuna Ayuda.

¹⁰Chinthu chidapempha iwo chene ntchakuti tikumbuke anyakutcherenga m'gulu mwawo, chenechi ntchontho chile chikhafuna[2] ine kuti ndichichite.

¹¹Mbwenye pidadza Peturo ku Antiokea, ndidamsumulula pakwecha, thangwi iye akhadadawadi.

¹²Anthu ale akhadatumwa na Yakobo mbadzati fika kweneko, Peturo akhadya pabodzi na akhristu okhonda khala Ayuda. Mbwenye pidafika amuna ale, iye adafunduka, tenepo hadadyeve na anthu okhonda khala Ayuda ale tayu, thangwi iye akhagopa gulu ikhalonga kuti anthu okhonda khala Ayudawa athema kugwandwa nsonga yachimuna.

¹³Akhristu anango a Chiyuda adatomambo kuchita unthawatawa pabodzi pene na Peturo, mwakuti na Barnaba ene adakwatikambo na unthawatawa udachita iwowo.

¹⁴Pidaona ine kuti makhaliro awo akhali akupotoka malingana na pyakuonadi pya Mphangwa Zadidi, ndidalonga kuna Peturo pamaso pa iwo onsene kuti, “Iwe ndiwe Myuda, mbwenye ukukhala ninga munthu okhonda khala Myuda, nee ninga Myuda tayu. Apo lero, unakwanisa tani kukhakhamiza anthu okhonda khala Ayuda kuti ateweze mitemo ya Chiyuda?”

¹⁵Ndimomwene kuti ife ndife Ayuda pakubalwa, nee anthu okhonda khala Ayuda ambalongwa “anyakudawa” ale tayu,

¹⁶kwache timbapidziwa kuti nkhabe munthu ambalungamiswa thangwi ya kuteweza mwambo tayu, mbwenye thangwi ya kukhala na chikhulupiro muna Khristu Yesu. Tenepo na ife ene taikha chikhulupiro chathu muna Khristu Yesu towera tilungamiswe kudzera muna chikhulupiro chathu pana Khristu, nee thangwi ya kuteweza mwambo tayu, thangwi nkhabe mbodzi analungamiswa pakuteweza mwambo.

¹⁷Ngakhala pinafuna ife kulungamiswa pamaso pa Mulungu kudzera muna kuphatanizana kwathu na Khristu pikuonesa kuti ife ene ndife anyakudawa ninga anthu okhonda khala Ayudawa, ayi kweneku nkhulonga kuti Khristu ndiye nyakuchitisa anthu kudawa? Nkhabe, na pang'ono pene tayu!

¹⁸Ngakhala ine ndinatoma kumanga pontho mwambo udafudza ine, penepo pikuonesadi ndekha ene kuti ndine munthu wakuswa mwambo.

¹⁹Mwambo udandidzindikirisa kuti ndathema kufa, natenepo ndafa kuti ndibuluke pansi pa utongi wa mwambowo, towera ndikhale na moyo wakutumikira Mulungu.

²⁰Ine ndakhomerwa pamtanda pabodzi na Khristu, natenepo si ine ule ana moyo tayu, mbwenye Khristu ndiye ana moyo muna ine. Moyo uno una ine kumanungowu ngwakudzera m'chikhulupiro muna Mwana Mulungu, ule adandifuna mbapereka moyo wache thangwi ya ine.

²¹Ine ndakhonda kuikha kukoma mtima kwa Mulungu pakhundu, thangwi ngakhala munthu ambalungamiswa pamaso pa Mulungu kudzera muna mwambo, penepo pikulonga kuti Khristu adafa papezi.