Read cisena AGALATIA 3 Bible Online

AGALATIA 3 - cisena bible

AGALATIA 3

¹Agalatia akupupwamwe, adakulodzani mbani? Imwe mudapangwa mwakuveka pya imfa ya Yesu Khristu pamtanda khala ninga mudapiona maso na maso!

²Ndipangeni chinthu chibodzi: kadi imwe mudatambira Mzimu wa Mulungu thangwi ya kuteweza mwambo, penu thangwi mudakhulupira pidava imwe Mphangwa Zadidi zile?

³Kani ndimwe akupupwa tenepa? Mudatoma na Mzimu wa Mulungu, apo chinchino munafuna kumalisa na mphamvu zanu zene?

⁴Kadi pinthu pyonsene pidachitika kuna imwe pidalila kuchitika kwene? Ine nkhabe khulupira tayu kuti pidalila chitika kwene!

⁵Kadi Mulungu ambakupasani Mzimu wache na kuchita pinthu pyakudodomesa pakati panu, thangwi imwe mumbateweza mwambo, penu na thangwi yakuti mumbava Mphangwa Zadidi mbamuzikhulupira?

⁶Nyerezerani pya Abrahamu: ninga munalongera Malemba kuti, “Iye adakhulupira Mulungu, natenepo Mulungu adamuyesa munthu wakulungama, thangwi ya kukhulupira kwacheko.”

⁷Tenepo imwe mupidziwe lero kuti pidzukulu chadi-chadi pya Abrahamu mbanthu ale ana chikhulupiro.

⁸Malemba adalongeratu kuti Mulungu analungamisa anthu okhonda khala Ayuda kudzera muna chikhulupiro. Natenepo Malemba adalonga pya Mphangwa Zadidi kuna Abrahamu mbati, “Kudzera muna iwe Mulungu anatsanzayisa anthu a madzinza onsene.”

⁹Abrahamu adakhulupira, tenepo adatsanzayiswa. Natenepo anthu onsene anakhulupira, ambatsanzayiswa ninga mudatsanzayisirwa Abrahamu.

¹⁰Ale ambanyindira kuvera mwambo wa Mose ngadzedze. Thangwi Malemba akulonga kuti, “Ngwadzedze munthu onsene anakhonda thimiza kuchita pinthu pyonsene pidalembwa m'bukhu ya mwambo.”

¹¹Tenepo mphyakuveka kuti nkhabe munthu na mbodzi ene ambalungamiswa pamaso pa Mulungu kudzera muna mwambo tayu, thangwi Malemba akulonga kuti, “Ngweneyo ene munthu ule ambalungamiswa pamaso pa Mulungu kudzera muna chikhulupiro anakhala na moyo.”[3]

¹²Mbwenye mwambo nkhabe pinthu na chikhulupiro, kwache ninga munalongera Malemba kuti, “Munthu onsene anachita pinthu pyonsene ninga munafunira mwambo anakhala na moyo.”

¹³Khristu adatiombola kutibulusira dzedze ya mwambo pakukhala nyadzedze m'mbuto mwathu. Thangwi Malemba akulonga kuti, “Ngwadzedze munthu onsene anamanikwa pamuti.”

¹⁴Iye adatiombola towera kutsanzaya kudadumbira Mulungu kudzampasa Abrahamu kule, kufike kuna anthu okhonda khala Ayuda kudzera muna Khristu Yesu, kuti kudzera muna chikhulupiro titambire Mzimu Wakuchena adadumbira Mulungu kudzampereka ule.

¹⁵Abale anga, ndinafuna kuphatisa basa upangizi wa nsiku na nsiku: ngakhala anthu awiri averana chinthu chinango mbaphatizana mwadidi chinthu chidaverana iwocho, nkhabe munthu na mbodzi ene anakwanisa kuswa chiveranocho, penu kuthimizapo chinthu chinango tayu.

¹⁶Tenepo Mulungu adadumbira kuna Abrahamu na kuna chidzukulu chache. Malemba hadainjipise kuti “pidzukulu,” kulonga kuti anthu azinji tayu, mbwenye adachepesa kuti “chidzukulu,” kulonga kuti munthu mbodzi basi, ule ndi Khristu.

¹⁷Chinalonga ine ntchakuti Mulungu adachita chiverano na Abrahamu mbadumbira kukoya chiveranocho. Tenepo pidagwanda pyaka madzana manayi na makumatatu mwambo udaperekwa. Mwambo wenewu nkhabe kwanisa kuswa chiveranochi, pontho kufudza kudumbira kudachita Mulungu kule tayu.

¹⁸Ngakhala mtsanzayiso wa Mulungu wagona pakuteweza mwambo, penepo mtsanzayiso nkhabe gonave pana kudumbira kudachita Mulungu kule tayu. Mbwenye Mulungu na kukoma kwache mtima adapereka mtsanzayiso kuna Abrahamu thangwi ya kudumbira kudachita iye kuna Abrahamu.

¹⁹Apo basa ya mwambo ninji? Mwambowo udathimizirwa towera kutionesa kuti pyakudawa ninji, kufikirana chidzukulucho chidzabwere, kuna ule adadumbira Mulungu. Mulungu adaphatisa basa angelo kupereka mwambowo kuna anthu kudzera muna nyakukhala pakati, Mose.

²⁰Mbwenye nyakukhala pakati nkhabe kufunika tayu, ngakhala pana munthu mbodzi basi, pontho Mulungu ndi mbodzi basi.[4]

²¹Kadi penepa nkhulonga kuti mwambo ukupokanyisana na kudumbira kudachita Mulungu kule? Nkhabe, na pang'ono pene tayu! Thangwi ngakhala munthu akhadatambira mwambo wakuti unakwanisa kumpasa moyo, penepo munthu onsene mbadakwanisa kulungamiswa pamaso pa Mulungu thangwi ya kuteweza mwambo.

²²Mbwenye Malemba akulonga kuti dziko yonsene yapansi ili pansi pa mphamvu za pyakudawa, natenepo mtsanzayiso udadumbira Mulungu kudzaupereka kudzera muna chikhulupiro muna Yesu Khristu ule, ukuperekwa kuna anthu ambakhulupira ale.

²³Chikhulupirochi mbichidzati fika, mwambo udatifungira tonsene ninga anyaperezo kufikirana chikhulupirochi chidatchululwa.

²⁴Natenepo ife tikhali pansi pa utongi wa mwambo kufikirana Khristu adadza kuti tilungamiswe pamaso pa Mulungu kudzera muna chikhulupiro.

²⁵Podi ndzidzi wa chikhulupiro wafika, mwambo nkhabeve utongi pana ife tayu.

²⁶Nkhudzera muna chikhulupiro kuti monsenene ndimwe ana a Mulungu mukuphatanizana na Khristu Yesu,

²⁷thangwi monsene mudabatizwa kukhala akuphatanizana na Khristu, tenepo mwapivazika mwekha ene na Khristu.

²⁸Natenepo nkhabe Myuda penu munthu okhonda khala Myuda, nkhabe bitchu penu mtumbe, nkhabe mamuna penu mkazi, thangwi monsenene ndimwe mbodzi mukuphatanizana kwanu na Khristu Yesu.

²⁹Ngakhala ndimwe anthu a Khristu, penepo ndimwe pidzukulu pya Abrahamu, pontho mwathema dzatambira pinthu pidadumbira Mulungu pile.