Read cisena AGALATIA 4 Bible Online

AGALATIA 4 - cisena bible

AGALATIA 4

¹Chinalonga ine ntchakuti nyakusiyirwa mfuma angakhala mwana, iye nkhabe siyana tayu na bitchu, podi kwene kuti iye ndi mwenechiro mfuma yonsene.

²Iye mbali mwana ambakhala pansi pa utongi wa makayaya na akulu-akulu pa pya mfumayo kufikirana nsiku ikwane idaikha babache yakuti iye atome kutonga mfumacheyo.

³Montho-monthomo ife, pikhali ife ana papinthu pyauzimu, tikhali mabitchu a mizimu imbatonga pinthu pya dziko yapansi ile.

⁴Mbwenye pidafika ndzidzi wakuthema, Mulungu adatumiza mwanache. Iye adabalwa kudzera muna mkazi, pontho mbakhala pansi pa utongi wa mwambo wa Chiyuda,

⁵kuti aombole ale akhali pansi pa utongi wa mwambo towera tisanduke ana a Mulungu.

⁶Kuonesa kuti imwe ndimwe[5] ana a Mulungu, iye adatuma Mzimu wa Mwanache kudza muna ife, Mzimu ambatichitisa kuti timchemere kuti, “Baba, Baba” ule.

⁷Natenepo si imweve bitchu tayu, mbwenye mwana wa m'nyumba. Podi ndimwe mwanache, Mulunguyo anakupasani pyonsene pyakoyera iye anache.

⁸Pakutoma pikhali imwe anthu okhonda dziwa Mulungu, mukhali mabitchu a milungu, ile si pinthu tayu.

⁹Mbwenye podi lero Mulungu mukumdziwa, penu ndilonge kuti Mulungu akukudziwani, mphapo pinakwanisika tani kuti mubwerere m'nduli kuna mizimu yakusowa mphamvu, pontho yakusowa basa ile? Mwatani munafuna kukhala pontho mabitchu awo?

¹⁰Mumbatsalakana nsiku zakusankhulika, miyezi, ndzidzi wa chaka, na pyaka!

¹¹Ndaswipa namwe mtima, thangwi mwinango ndidalila pezi kuvunga mphamvu zanga kuphata basa kuna imwe.

¹²Abale anga, ndikukupemphani kuti mukhale ninga ine, podi ine ndakhala ninga imwembo. Imwe nee mudandidawira tayu.

¹³Imwe mukupidziwa kuti kudwala kwanga ndiye kudachitisa kuti ndikwanise kulalika Mphangwa Zadidi ndzidzi wakutoma kuna imwe.

¹⁴Podi kwene kuti kudwala kwanga kukhali mayesero akulu kuna imwe, imwe hamudandikhonde, penu kundilulupisa tayu. M'mbuto mwache mudanditambira mwadidi khala ninga ndine mngelo wakubulukira kudzulu; pontho khala ninga ndine Khristu Yesu.

¹⁵Imwe mwakomerwa pyakwanga! Mphapo chinchino chachitika ninji? Ine ene ndinakwanisa kuchitira umboni kuti mbapidakhala pyakukwanisika kukonombola maso anuwo, mbamudaakonombola kundipasa.

¹⁶Kani chinchino ndasanduka nyamalwanu thangwi ya kukupangani pyakuonadi?

¹⁷Anthu anango ale akuyesa kukunyengererani, kwache iwo nkhabe kukufunirani pyadidi tayu. Pinafuna iwo kwene mphyakuti imwe na ine tiphadzane, towera imwe mukwatike nawo pikulu.

¹⁸Tenepo mphyadidi kukwatika ngakhala pinafuniwapyo mphyadidi, pontho mwathema kuchita tenepo ndzidzi onsene, nee kuti kwene ndingakhala namwe pabodzi tayu.

¹⁹Imwe ananga apamtima, ine ndikukuverani pontho kupha ninga mkazi wamimba pakubala kufikirana mukhale na makhaliro chadi-chadi a Khristu.

²⁰Ndikhapifuna pyakwanga kukhala namwe chinchino kuti ndisanduze malongero anga kuna imwe, thangwi ndaswipa namwe mtima pyakwanga!

²¹Ndipangeni, imwe ale munafuna kukhala pansi pa utongi wa mwambo, kadi mukupidziwa pinalonga mwambo?

²²Ninga munalongera Malemba kuti Abrahamu akhali na ana achimuna awiri, mbodzi mache akhali bitchu, unangoyi mache akhali mtumbe.

²³Mwanache adabalwa na bitchuyi adabalwa kwene ninga mumbabalirwa anthu onsene, mbwenye mwanache unango ule adabalwa na mtumbeyi adabalwa kudzera muna kudumbira kudachita Mulungu kule.

²⁴Penepi pinakwanisa kuveka ninga msangani, thangwi amama awiri ale akuimirira piverano piwiri. Mama, ule anache adabalwa mabitchu ale, ndi Hagara, tenepo akuimirira chiverano chidasasanywa paphiri ya Sinai.

²⁵Hagara, ule akuimirira phiri ya Sinai m'dziko ya Arabia, ntchithunzi-thunzi[6] cha mzinda wa Yerusalemu walero, thangwi iye na anache ndi mabitchu.

²⁶Mbwenye Yerusalemu wakudzulu ndi mtumbe, pontho iye ndiye mathu.

²⁷Thangwi Malemba akulonga kuti, “Tsanzaya iwe mkazi okhonda bala! Khuwa, pontho lira na kusekera, ule chipo hudave mtswotswo wakubala tayu. Thangwi mkazi, ule adakhondwa na mamunache anakhala na ana azinji kupiringana mkazi, ule anakhala na mamunache.”

²⁸Chinchino imwe abale anga, ndimwe ana a Mulungu akubalwa thangwi ya kudumbira kudachita iye, ninga mudachitira Isake.

²⁹Pandzidzi wenewu mwana adabalwa ninga mumbabalirwa anthu onsene ule, adaboneresa mwana ule adabalwa na mphamvu za Mzimu wa Mulungu; natenepo pili chibodzi-bodzi na lero.

³⁰Apo Malemba akulonga tani? Akulonga kuti, “Mbuluse bitchu wamkaziyu na mwanache ene; thangwi mwana bitchu hanakwatambo khundu tayu pa mfuma ya baba pabodzi na mwana mtumbeyo.”

³¹Natenepo, abale anga, ife nee ndife ana akubalwa na bitchu wamkazi tayu, mbwenye akubalwa na mtumbe.