Read cisena AGALATIA 5 Bible Online

AGALATIA 5 - cisena bible

AGALATIA 5

¹Utumbe ngwenewu una ifewu; Khristu adatisudzula pa ubitchu. Tenepo imirani dzololo, pontho lekani kupitawirisa mwekha ene kuthukula pontho goli ya ubitchu m'khosi mwanu.

²Ngavani! Ine, Paulo, ndikukupangani kuti ngakhala munapitawirisa kugwandwa nsonga yachimuna, ndiye kuti Khristu nkhabeve basa na pang'ono pene kuna imwe tayu.

³Ndikucheuza pontho amuna onsene kuti angapitawirisa kugwanda nsonga yachimuna iwo athema kuvera mwambo onsene wa Mose.

⁴Imwe ene ale mumbayesa-yesa kuti Mulungu akulungamiseni pamaso pache, thangwi mumbateweza mwambo, mwapilekanisa mwekha ene na Khristu. Tenepo imwe mwapasa nkhodolo kukoma mtima kwa Mulungu.

⁵Ifembo chidikhiro chathu ntchakuti Mulungu anatilungamisa pamaso pache; pontho na mphamvu za Mzimu wa Mulungu chenechi ndiye chinadikhira ife kudzera muna chikhulupiro.

⁶Thangwi tingaphatanizana na Khristu Yesu kugwandwa nsonga yachimuna penu kukhonda gwandwa nkhabe basa tayu. Chinthu chene chakufunika ntchikhulupiro, chile chimbaoneka kudzera muna kufunana.

⁷Mukhachitadi pyadidi! Mbani adakulekesani kuvera pyakuonadi? Adakunyengererani tani?

⁸Pinthu ninga penepi nee pimbabulukira kuna Mulungu tayu, ambakuchemerani ule.

⁹Ninga mumbalongerwa ipyo kuti, “Pyakufufumisira mkate ping'ono-ng'ono pimbafufumisa mpambo wamumphu.”

¹⁰Thangwi ya kuphatanizana kwathu na Mbuya kumbachitisa kuti ndikhale na chikhulupiro kuti manyerezero anu na anga si akusiyana papinthu penepi tayu. Mbwenye munthu anakudzudzumisaniyo, penu akhale pyache ani, Mulungu anati amtchunyuse.

¹¹Mbwenye kulonga pya ine, abale anga, ngakhala ndathimiza kulalika kuti kugwandwa nsonga yachimuna nkhwakufunika, thangwi ninji mphapo ndikubonereswa basi? Ngakhala ndikhapichitadi, kulalika kwanga pya mtanda wa Khristu nee mbakudachitisa anthu anango kuzhangali tayu.

¹²Ndikhapifuna pyakwanga kuti anthu anakudzudzumisaniwa apikapali pyawo okha ene.

¹³Mbwenye kulonga pya imwe, abale anga, mudachemerwa kuti mukhale mtumbe. Kwache lekani phatisa basa utumbe wenewu ninga chinthu chakukupasani danga ya kuteweza pikhumbo pyakudawika pyakubalwa napyo. M'mbuto mwache tumikiranani unango na mwanzache mukufunana.

¹⁴Thangwi mwambo onsene waikhwa m'chigwandira m'matongero abodzi akuti, “Funa mwanzako ninga mumbapifunira iwe wekha ene.”

¹⁵Mbwenye mungachita ninga nyama zam'tsanga, kulumana na kukhwadzulana, penepo chitani mphole-mphole gopesera munasakazana unango na mwanzache.

¹⁶Chinalonga ine ntchichi: tawirisani Mzimu Wakuchena kutonga moyo wanu, tenepo imwe nee munachitave pikhumbo pya makhaliro akudawika akubalwa nawo tayu.

¹⁷Thangwi pimbafuna makhaliro akudawika akubalwa nawo mphyakupokanyana na pimbafuna Mzimu Wakuchena. Na pinafuna Mzimu Wakuchena mphyakupokanyana na pinafuna makhaliro akudawika akubalwa nawo. Pinthu piwiripi pili pa umalwa, pontho kweneku nkhulonga kuti munthu nkhabe kwanisa kuchita pinthu pinafuna iye chita tayu.

¹⁸Ngakhala mumbatsogolerwa na Mzimu Wakuchena, imwe nkhabe khalave pansi pa utongi wa mwambo tayu.

¹⁹Pinthu pimbachita makhaliro akudawika akubalwa nawo mphyakudziwika; pimbapionesa pyokha ene pakwecha pakuchita ipi: pyakuzuda, pyakunyansa na kukhonda kupithunda,

²⁰kupembedza mifanikizo na ufiti, kuchita umalwa, kumenyana, bivu, kuzhangali, kupithemba, kugawikana, kusankhana,

²¹kuipirwa, kuledzera, kuchita pyakudzedzeduka m'maphwando, pontho kuchita na pinango ninga penepi. Ndikukucheuzani ninga mudachitira ine pakutoma pale kuti anachita penepiwo hanakwata khundu mu Ufumu wa Mulungu tayu.

²²Mbwenye Mzimu Wakuchena ambatichitisa kukhala akufunana, akukomerwa, amtendere, akupirira, akukoma mtima, adidi, akukhulupirika,

²³akupichepesa na akuuphata mtima. Nkhabe mwambo wakupokanyana na penepi tayu.

²⁴Anthu ale mba Khristu Yesu akhomera pamtanda makhaliro awo akudawika akubalwa nawo pabodzi pene na pikhumbo pyache na kusirira kwene.

²⁵Podi Mzimu Wakuchena atipasa moyo, tenepo iye athema kutonga moyo wathu.

²⁶Ife tathema kukhala anthu okhonda nyada, penu kuzhangalisana unango na mwanzache, penu kuchitirana bivu unango na mwanzache.