Read cisena AGALATIA 6 Bible Online

AGALATIA 6 - cisena bible

AGALATIA 6

¹Abale anga, ngakhala unango aphatwa akuchita pinthu pyakudawika, imwe anyakukhala na Mzimu Wakuchena, mumsumulule, kwache mupichite mwakumkomera mtima. Pontho chitani mphole-mphole, gopesera imwembo munayeswa na pinthu pyakudawika.

²Tsalakanani nyatwa za unango na mwanzache; pakuchita tenepo munati muvere[7] mwambo wa Khristu.

³Ngakhala munthu anapinyerezera yekha ene kuti iye ngwakufunika, mwenemo iye si wakufunika tayu, akulila kupinyenga yekha ene.

⁴Munthu onsene athema kutonga makhaliro ache. Ngakhala ngadidi, penepo anakwanisa kunyadira chinthu chidaphata iye yekha ene, mbakhonda kuchiyeseza na chinthu chidaphata munthu unango.

⁵Thangwi munthu onsene athema kutsamala nyatwa zache.

⁶Munthu ule akufunziswa mphangwa zachikhristu, athema kugawana na mfunzisi wache pyonsene pyadidi pina iye.

⁷Lekani kupinyengeza mwekha ene! Nkhabe munthu anasenzekesa Mulungu. Munthu anavuna chonthocho chidabzala iye.

⁸Ngakhala anabzala mwakuteweza makhaliro akudawika akubalwa nawo, kubulukira mwenemo, iye anavuna imfa; ngakhala anabzala mwakuteweza Mzimu Wakuchena, kubulukira muna Mzimu Wakuchena iye anavuna moyo okhonda mala.

⁹Tenepo tendeni tileke topa na kuchita pinthu pyadidi. Thangwi ndzidzi wakuthema unafika wakuti tivune, tingakhonda taya mtima.

¹⁰Natenepo ndzidzi onsene unakhala ife na danga, ife tathema kuchita pinthu pyadidi kuna munthu onsene, maka-maka kuna ale ana ife pabodzi m'banja yachikhristu.

¹¹Ngayang'anani pilemba pikulu-pikulu pyaphatisa ine basa pinakulemberani ine na manja anga ene!

¹²Anthu, ale akuyesa-yesa kukukhakhamizani kuti mugwandwe nsonga yachimuna, ngontho ale ambafuna kuoneka akukoma pamaso pa anthu pakunyadira pinthu pikhachita iwo pamanungo awo. Iwo ambachita tenepo gopesera kubonereswa thangwi ya mtanda wa Khristu.

¹³Podi na anyakugwandwa nsonga yachimuna ene hambavera mwambo tayu; iwo ambafuna kuti imwe mugwandwe towera iwo akwanise kunyada kuti imwe mudavera pakugwandwa kwanu nsonga yachimuna.

¹⁴Mbwenye kulonga pya ine, ndinati ndinyadire mtanda wa Mbuyathu Yesu Khristu basi, thangwi kudzera muna mtandache, kupiona kwa pinthu kwa anthu a padziko yapansi kuna ine, nkhwapezi; ine ndakhala ninga wakufa kuna kupiona kwawo kwa pinthu.

¹⁵Kugwandwa nsonga yachimuna penu kukhonda gwandwa nkhabe basa na pang'ono pene tayu. Chinthu chakufunika chadi-chadi nkhukhala munthu wakusasanywa mwachinchino.

¹⁶Kuna onsene akuteweza chifunziso chenechi m'moyo mwawo, ndikupempha kuti mtendere na nsisi za Mulungu pikhale kuna iwo na kuna anthu onsene a Mulungu.[8]

¹⁷Pakumalisira: munthu na mbodzi ene mbaleke kundithimizira nyatwa zinango tayu, thangwi madazwi ana ine m'manungo mwangawa akuonesa kuti ndine bitchu wa Yesu.

¹⁸Kukoma mtima kwa Mbuya Yesu Khristu kukhale namwe monsene, abale anga. Ameni.