Read cisena AEFESO 1 Bible Online

AEFESO 1 - cisena bible

AEFESO 1

¹Kubulukira kuna ine, Paulo. Mulungu adandiikha kukhala nyakutumwa wa Khristu Yesu, thangwi iye adapifuna kuti pikhale tenepo. Kwenda kuna anthu a Mulungu mumzinda wa Efeso,[1] kuna ale ngakuphatanizana na Yesu Khristu, pontho akukhulupirika kuna iye.

²Kukoma mtima pontho mtendere pyakubulukira kuna Mulungu Babathu, pontho na kuna Mbuyathu Yesu Khristu pikhale namwe.

³Tendeni tipereke takhuta kuna Mulungu, ule pontho ndi Babache Mbuyathu Yesu Khristu. Mulungu atitsanzayisa na mtsanzayiso wa mtundu onsene wa m'dziko yakudzulu kudzera muna Mzimu Wakuchena, thangwi ya kuphatanizana kwathu na Khristu.

⁴Na kale ene dziko mbidzati lengwa, Mulungu akhadatisankhuliratu kukhala anthu ache kudzera mukuphatanizana kwathu na Khristu, towera tikhale akuchena pontho okhonda na chakudawa chene pamaso pache. Mulungu ambatifuna pikulu,

⁵natenepo iye[2] akhadapinyerezera kale kuti, kudzera muna Yesu Khristu, iye anatichitisa kukhala anache, thangwi ya kukomerwa pontho na kufuna kwache.

⁶Tendeni timkuze Mulungu thangwi ya kukoma kwache mtima kwakudodomesa, thangwi iye adatipasa Mwanache wapamtima ninga mtukwa wapezi!

⁷Ife taombolwa, thangwi ya imfa ya Khristu ninga nsembe; kweneku nkhulonga kuti Mulungu atilekerera pyakudawa pyathu. Mulungu ngwakukoma mtima pyakwanga,

⁸tenepo iye adatikomera mtima pikulu pene. Thangwi ya nzeru zache zonsene na kuvesa kwache konsene,

⁹pontho na kufuna kwache, Mulungu adatidziwisa pyakubisika pikhadanyerezera iye kale ene kupimalisa pile, pakuphatisa basa Khristu.

¹⁰Pyakubisika pinafuna dzamalisa Mulungu, ndzidzi ungakwana, mphyakuti agumanye pabodzi pyakulengwa pyonsene, pinthu pyonsene pya kudzulu na pya pansi pano, kuti pikhale pansi pa utongi wa Khristu.

¹¹Pinthu pyonsene pimbachitika ninga mumbapifunira na kupinyerezera Mulungu. Mulungu adatisankhula kale kudzera mukuphatanizana kwathu na Khristu kuti tikhale anthu ache ene. Iye adapifuna kuti pikhale tenepo, thangwi iye akhadapinyerezera kutomera pakutomaletu.

¹²Tendeni, mphapo, tikuze demelero ya Mulungu, ife ale tikhali akutoma kukhala na chidikhiro pana Khristu!

¹³Pidava imwe mphangwa zakuonadi, Mphangwa Zadidi zakudzesa chipulumuso, imwe mudasandukambo kukhala anthu a Mulungu. Imwe mudakhulupira Khristu, tenepo Mulungu adakuikhani chidindo chakuonesa kuti ndimwedi anthu ache pakukupasani Mzimu Wakuchena ninga mudadumbira iye kuti anakupasani.

¹⁴Mzimuyo ndi chitsikimizo chakuti ife tinatambira pinthu pidadumbira Mulungu kuna anthu ache pile, pontho pikutitsikimizira kuti Mulungu anapereka kuna anthu ache utumbe monsene mwene. Tendeni, mphapo, tilemedze demelero yache!

¹⁵Na thangwi ya penepi, kutomera ndzidzi udava ine pya kukhulupira kwanu Mbuya Yesu, pontho na kuafuna kwanu anthu onsene a Mulungu,

¹⁶ine sidaleka tayu kupereka takhuta kuna Mulungu thangwi ya imwe. Ine ndimbakukumbukani ndingapemphera

¹⁷pontho ndimbapempha Mulungu wa Mbuyathu Yesu Khristu, Baba wademelero, kuti akupaseni Mzimu Wakuchena, ule anakupasani nzeru, pontho dzatchulula Mulungu kuna imwe, towera mumdziwe mwadidi mwene.

¹⁸Ndimbampempha kuti iye afungule manyerezero anu kuti muone cheza chache, towera mudziwe chidikhiro chidakuchemererani iye chile, pontho kuti mudziwe kuinjipa kwa mtsanzayiso wakudodomesa unadumbira iye kuupereka kuna anthu ache ule,

¹⁹pontho na munaphatira basa mphamvu zache zikulu muna ife anyakukhulupira. Mphamvu zenezi ndi sasawa na mphamvu zikulu,

²⁰zile zidaphatisa iye basa kulamusa nazo Khristu kuimfa, mbamkhazika nazo kudziko yakudzulu kumadyo kwache.

²¹Kweneko Khristu ana utongi kupiringana mafumu onsene akudzulu, atongi, anyamphamvu na ambuya: pontho dzinache ili padzulu pa madzina a utongi anango onsene ale anakwanisa iwo kuchemerwa nawo lero penu ndzidzi unadzawo.

²²Mulungu adaikha pyonsene pansi pa manyalo a Khristu, pontho adampereka kuna mpingo kukhala ninga Mbuya wa pinthu pyonsene mumpingomo.

²³Mpingo ndi manungo a Khristu, mpingo ule umbamchitisa kukhala wamumphu, pontho iye ambachitisa pinthu pyonsene kukhala pyamumphu monsene mwene.[3]