Read cisena AEFESO 3 Bible Online

AEFESO 3 - cisena bible

AEFESO 3

¹Na thangwi yeneyi, ine Paulo, nyaperezo wa Yesu Khristu, thangwi ya imwepo anthu okhonda khala Ayuda, ndimbakupemphererani kuna Mulungu.

²Ndimomwene kuti imwe mwapiva kuti na kukoma mtima kwa Mulungu, ine ndapaswa basayi kuti muganyali nayo.

³Mulungu adatchulula pinthu pyakubisika pikhafuna iye dzachita mbapipangiza kuna ine. Ine ndapilemba mwachigwandira,

⁴tenepo ngakhala imwe munawerenga pyalemba inepi, munakwanisa kudziwa kuvesa kudachita ine papinthu pyakubisika pya Khristupi.

⁵Kalene anthu nee akhapangwa pyakubisika penepi tayu, mbwenye chinchino Mulungu apitchulula kuna anyakutumwa na maprofeti ache akupambulika kudzera muna Mzimu Wakuchena.

⁶Pyakubisikapi mphyakuti kudzera muna Mphangwa Zadidi za Yesu anthu okhonda khala Ayuda athemambo kutambira mtsanzayiso wa Mulungu pabodzi na Ayuda; iwo ndi mapindi a manungo abodzi, pontho anatambirambo khundu pabodzi na Ayuda malingana na kudumbira kudachita Mulungu kudzera muna Khristu Yesu kule.

⁷Mulungu adandipasa mtukwa wakukhala nyabasache kulalika Mphangwa Zadidizi. Iye adachita tenepo kudzera muna kukoma kwache mtima na mphamvu zache zikulu.

⁸Pakati pa anthu onsene a Mulungu ndine mwanaletu, kwache iye adandikomera mtima kundipasa basa yeneyi ya kulalika Mphangwa Zadidi za mfuma ya Khristu yokhonda madire kuna anthu okhonda khala Ayuda,

⁹pontho zakuchitisa anthu onsene kuti aone munafuna Mulungu dzaphatira basa ya pinthu pyakubisikapi. Mulungu, nyakulenga pyonsene, akhadapibisa kutomera mifendu yonsene ya anthu idagwanda ile;

¹⁰towera chinchino, kudzera mwa mpingo, nzeru zikulu za Mulungu mu pyonsene zidziwike kuna anyamphamvu na atongi onsene a kudziko yakudzulu.

¹¹Mulungu adapichita malingana na kufuna kwache kwakukhala na khala mbapichitisa kuti pikwane-kwane kudzera m'mabasa a Khristu Yesu Mbuyathu.

¹²Thangwi ya kuphatanizana kwathu na Khristu pontho na chikhulupiro chathu pana iye, ife tinakwanisa kudza kuna Mulungu mwakuwanga mtima pontho na mtima wakulikha.

¹³Mphapo ndikukupemphani kuti muleke swipa mtima, thangwi ya kukubonererani kunachita ineku. Pinachita inepi pinaganyalisa imwepo.

¹⁴Thangwi ya penepi, ndinagodama pansi kuna Baba

¹⁵kubulukira kumbatambira madzinza onsene a kudzulu pontho na a pansi pano dzina yakuonadi kule.

¹⁶Ndikupempha Mulungu kuti kubulukira mumfuma yache yademelero iye akukuwangisani na mphamvu m'moyo wanu wauzimu kudzera muna Mzimu Wakuchena.

¹⁷Pontho ndikupemphera kuti Khristu akhazikike mumtima mwanu kudzera muna chikhulupiro chanu. Ndikupemphera pontho kuti imwe muikhe mitsitsi mwakuzwika pansi mbamukhazikika mukukufunani kwa Mulungu,

¹⁸towera imwe pabodzi na anthu onsene a Mulungu mukwanise kuvesadi kukula, kulapha, pontho na kuzwika kwachita kukufunani kwa Khristu.

¹⁹Pontho ndikupemphera kuti mudziwedi kukufunani kukulu kwa Khristu, podi kwene kuti nkhwakukhonda dziwika, pontho kuti mukhale monsene mwene na makhaliro a Mulungu.

²⁰Kuna Mulungu kukhale demelero, ule anakwanisa kuchita pinthu piringana pingakwanise ife kupempha penu kupinyerezera, kudzera muna mphamvu zache zile zimbaphata basa muna ife.

²¹Ife a mumpingo, pontho ale taphatanizwa na Khristu, timpase demelero kubulukira mifendu yonsene kwenda na kwenda! Ameni.