Read cisena AEFESO 4 Bible Online

AEFESO 4 - cisena bible

AEFESO 4

¹Ine nyaperezo thangwi ya kutumikira Mbuya, ndikukupemphani kuti mukhale na makhaliro akuthemerana na pikhakupangani Mulungu pandzidzi udakuchemerani iye.

²Ndzidzi onsene khalani akupichepesa, akufulika pontho akupirira. Onesani kufunana kwanu pakuvana mafala.

³Chitani ninga munakwanisira imwe, kukoya mwadidi ubodzi udakupasani Mzimu Wakuchena kudzera muna mtendere umbakuphatanizani pabodzi ule.

⁴Manungo alipo abodzi, pontho Mzimu mbodzi, sasawambo ninga chidikhiro chilipo chibodzi chidakuchemererani Mulungu chile.

⁵Mbuya alipo mbodzi, chikhulupiro chibodzi, ubatizo ubodzi,

⁶pontho Mulungu alipo mbodzi, ule ndi Baba wa anthu onsene, Mbuya wa onsene, ule ambaphata basa kudzera muna anthu onsene, pontho ule ali m'mitima ya anthu onsene.

⁷Tonsenefe tatambira mtukwa wakufunika sasawa ninga montho mudaupimira Khristu.

⁸Ninga munalongera Malemba kuti: “Pidakwira iye kudzulu-dzulu, iye adakwata anyaperezo azinji mbaenda nawo pabodzi mbapereka mitukwa kuna anthu.”

⁹Mphapo mafala akuti, “adakwira kudzulu,” nkhulonga kuti tani? Mafalawa akulonga kuti chakutoma iye adatchitha mbafika kumbuto yakuzwika ya dziko yapansi pano.[5]

¹⁰Adatchitha ule, ngonthoyo adakwira kudzulu kupiringana thambo kuti pinthu pyonsene pyakulengwa pidzazwe na iye.

¹¹Iye ngontho ule adapereka mitukwa kuna anthu: iye adasankhula anthu anango kukhala anyakutumwa, anango kukhala maprofeti, anango kukhala anyakulalika Mphangwa Zadidi, anango kukhala abusa, anangombo kukhala afunzisi.

¹²Iye adaasankhula kuti iwo asasanye anthu a Mulungu towera aphate basa yachikhristu. Pakuchita tenepo iwo akulise mpingo, manungo a Khristu.

¹³Natenepo ife tinasanduka abodzi m'chikhulupiro chathu pontho na mu udziwisi wathu wa Mwana Mulungu: ife tinasanduka anthu akukola m'moyo wathu wauzimu mbatidzakhalaletu na makhaliro sasawa ninga a Khristu.

¹⁴Tenepo ife nkhabe dzakhalave ninga ana tayu, ife nkhabe dzabeluka na mabimbi penu kupheluka na mphepo ya chifunziso cha mfaka-faka zimbanyengeza anthu zile na unthawatawa umbachita iwo ule tayu.

¹⁵Mbwenye pakulonga pyakuonadi na mtima wa kufunana, tendeni tikule monsene mwene muna Khristu. Iye ndi msolo wa mpingo.

¹⁶Iye ambatonga manungo onsene. Mapindi angaphatana na uzingo ambasasanya manungo amumphu. Tenepo mapindi onsenewa angaphata basa idasasanyirwa iwo, mwakufunana ambaphedza manungo kukula.

¹⁷Na dzina ya Mbuya, chinchino ndikukucheuzani kuti muleke khalave ninga anthu okhonda dziwa Mulungu, ale manyerezero awo ngakusowa basa

¹⁸pontho nzeru zawo nsa mumdima. Iwo nkhabe khundu m'moyo umbapereka Mulungu tayu, thangwi iwo adakhonda kudziwa Mulungu na kuuma kwawo mtima.

¹⁹Iwo nkhabeve manyadzo tayu: iwo apipereka okha ene kuna makhaliro awo akudawika towera achite pinthu pyakunyansa pyonsene mwakukhonda kuleka.

²⁰Mbwenye penepi si pile pidafunza imwe pya Khristu tayu!

²¹Ndimomwene kuti imwe mudavadi pya Khristu, pontho imwe ninga anyakutewera a Khristu mudafunziswadi pyakuonadi pile pimbagumanwa muna Yesu.

²²Tenepo chinchino, lekani makhaliro anu akale, ale akhakuchitisani kuti mukhale ninga mukhakhalira imwe kale, moyo wanu wakale, ule ukhakuvungani, thangwi ya pikhumbo pyakunama.

²³Mitimanu na manyerezero anu pisanduzike kukhala pyachinchinoletu,

²⁴pontho khalani na moyo wachinchino ule walengwa sasawa ninga Mulungu, moyo ule ngwakulungama pontho wakuchena.

²⁵Mphapo lekani kunama! Munthu onsene athema kulonga pyakuonadi pyokhokha kuna mwanzache, thangwi tonsene pabodzi ndife mapindi a manungo a Khristu.

²⁶Ngakhala imwe mwazhangalira mwanzanu, lekani tawirisa kuzhangaliko kukudawisani, pontho lekani pinda kufikirana kudoka kwa dzuwa.

²⁷Lekani pasa danga Satana.

²⁸Ngakhala munthu akhaba kale ene, aleke kubako, pontho atome kuphata basa yadidi na manjache towera agumane pinthu pyache na pinango pyakuphedzerambo anyakutcherenga.

²⁹Lekani bulusa mafala akufudza m'kanwa mwanu, mbwenye longani mafala akuwangisa mtima pandzidzi anafunika iwo, towera anyakukuveserani aganyali na mafalanu.

³⁰Pontho lekani tsukwalisa Mzimu Wakuchena wa Mulungu. Mzimuyo ntchidindo chakuonesa kuti ndimwedi anthu ache a Mulungu, pontho chitsikimizo kuti munasudzulwa pa Nsiku inafuna Mulungu dzapulumusa anthu ache.

³¹Bulusani pinthu pyonsene pyakupinda, pyaukali na pyakuzhangali mumtima mwanu. Lekani longolozana na kutikanizana, pontho muleke nyerezeranave pyakuipa unango na mwanzache.

³²Mbwenye khalani anthu akukomerana mtima pontho akuverana nsisi; ngakhala mwadawirana unango na mwanzache, mulekererane ninga kukulekererani kudachita Mulungu kudzera muna Khristu.