Read cisena AEFESO 5 Bible Online

AEFESO 5 - cisena bible

AEFESO 5

¹Tendeni, mphapo, tikhale ninga Mulungu, thangwi ife ndife anache apamtima.

²Khristu adatifuna pyakwanga mwakuti adapereka moyo wache ninga nsembe yakununkhira pontho yakukomera Mulungu. Tenepo, chinchino khalanimbo na moyo wa kufunana.

³Lekani chita pyakuzuda, pyakunyansa, penu mtima, penu na kupilonga kwene pakati panu, thangwi imwe ndimwe anthu a Mulungu.

⁴Pontho pakanwa panu paleke bulusa mafala akuzuda, akupupwa, penu akusingirira. Mbwenye longani mafala akupereka nawo takhuta kuna Mulungu.

⁵Chinthu chakuti mudziwe ntchichi, nkhabe munthu wakuchita pyakuzuda, pyakunyansa, penu mtima (kuchita mtima ndi sasawa na kupembedza mifanikizo) anagumana mbuto mu Ufumu wa Khristu na wa Mulungu tayu.

⁶Lekani tawirisa munthu kukunyengezani na mafala akupupwa, thangwi pinthu ninga penepi pimbadzesa ukali wa Mulungu kuna anthu okhonda kumvera ale.

⁷Mphapo lekani fambirana na anthu ninga enewa.

⁸Kalene imwe mukhafamba mumdima, mbwenye chinchino mwasanduka anthu a Mbuya, natenepo muli m'cheza. Tenepo khalani ninga anthu a m'cheza,

⁹thangwi cheza[6] ndiye chimbadzesa pyakuvuna pyadidi ninga udidi, pyakulungama na pyakuonadi.

¹⁰Saka-sakani pinthu pyakukomera Mbuya.

¹¹Lekani chita pinthu pyapezi ninga pimbachita anthu a mumdima, mbwenye adzeseni kuti aone cheza.

¹²(Mphyakuchitisadi manyadzo na kulonga kwene pinthu pile pimbachita iwo chibiso-biso.)

¹³Pontho cheza chingamwinikira pinthu pyonsene, makhaliro chadi-chadi a pyonsene ambaonekera pakwecha.

¹⁴Tenepo chinthu chonsene chakuonekera pakwecha, chimbasanduka cheza.[7] Ndi thangwi yache pikulongwa kuti: “Nyakugonawe, lamuka, lamuka kuimfa, tenepo Khristu anakumwinikira.”

¹⁵Tenepo chitani mphole-mphole na makhaliro anuwo. Lekani khala ninga anthu okhonda dziwa pinthu, mbwenye mukhale ninga anthu anzeru.

¹⁶Phatisani basa mwadidi mwayi onsene una imwewu, thangwi nsiku zina ife zino nsakuipa.

¹⁷Lekani khala akupupwa, mbwenye saka-sakani pinthu pinafuna Mbuya kuti mupichite.

¹⁸Lekani ledzera, thangwi munavungika, kwache mudzazwe na Mzimu Wakuchena.

¹⁹Longesanani na mafala a masalimo, nyimbo zakulemedza Mulungu, na nyimbo zakumkuza nazo. Imbirani Mbuya nyimbo na kumkuza mumtima mwanu.

²⁰Ndzidzi onsene perekani takhuta kuna Mulungu Baba kudzera muna dzina ya Mbuyathu Yesu Khristu thangwi ya pyonsene pimbachita iye.

²¹Khalani akuverana unango na mwanzache, thangwi mungachita tenepo munalemedzambo Khristu.

²²Imwe akazi verani amunanu ninga mumbavera imwe Mbuya.

²³Mamuna ndi msolo wa mkazache, ningambo Khristu ndi msolo wa mpingo; pontho Khristu mwenechiro ndi Nyankhombo wa mpingo, ule ndi manungo ache.

²⁴Natenepo akazi avere monsene mwene amunawo, sasawa ninga mumbavera mpingo Khristu.

²⁵Amuna, funani akazanu sasawa ninga mudafunira Khristu mpingo, mbapereka moyo wache thangwi ya mpingowo,

²⁶towera ukhale wache ene. Iye adachita tenepo kuti aupambule na kuupereka kuna Mulungu, pidamala iye kuuchenesa pakuusambisa na mafalache, ale akhala ninga madzi,

²⁷towera ukhale kuna iye ene mpingo wakudemelera na wakubalika, wakusowa thotho, makwinya, penu pinango ninga penepi, mbwenye wakupambulika pontho wakusowa chinthu chakuupokanyisa.

²⁸Amuna athema kufuna akazawo sasawambo ninga mumbafunira iwo manungo awo. Mamuna ambafuna mkazache ngule ambapifuna yekha ene.

²⁹Nkhabe munthu ambazonda manungo ache, mbwenye iye ambaadyesa na kuayang'anira mwadidi, ninga mumbachita Khristu kuna mpingo wache,

³⁰thangwi mpingowo ndi manungo ache, ifembo ndife mapindi a mpingowo.

³¹Ninga mudalongera Malemba kuti, “Thangwi ya penepi mamuna anasiya babache na mache mbakaphatikana na mkazache, tenepo uwiriawo anakhala mbodzi.”

³²Pana chakubisika chakuzwika chakuonadi chile chatchululwa m'Malemba chinaona ine kuti chikulonga pya Khristu na pya mpingo.

³³Mbwenye chikulonga pontho kuna imwepo: Mamuna onsene athema kufuna mkazache ninga mumbapifunira iye yekha ene, mkazimbo athema kulemedza mamunache.