Read cisena AEFESO 6 Bible Online

AEFESO 6 - cisena bible

AEFESO 6

¹Anamwe verani makolo anu, thangwi, ninga ana a Mulungu,[8] mphyakuthema kuchita tenepo.

²“Lemedzani babanu na manu,” enewa ndi matongero akutoma ale padzulu pache pana kudumbira;

³“towera pinthu pyonsene pifambe mwadidi kuna imwe, pontho kuti nsiku zakukhala kwanu na moyo pansi pano ziinjipe.”

⁴Imwembo, ababa lekani kusosa ananu, mbwenye mualere na kuapasa mwambo pontho kuafunzisa m'njira yachikhristu.

⁵Imwe mabitchu, verani ambuyanu a pansi pano mwakualemedza na kuagopa; chitani penepi na mtimanu onsene khala ninga mukuchitira Khristu.

⁶Lekani vera kokha mbuyanu ngakhala iye ali ponthopo kukuyang'anirani towera mukome kuna iye; mbwenye muphate basa na mtimanu onsene ninga bitchu wa Khristu pontho ninga mumbafunira Mulungu.

⁷Mabitchumwe, phatani basanu mwakukomerwa ninga mukuphatira Mbuya, nee kuti mukuphatira munthu tayu.

⁸Kumbukani kuti Mbuya anafupa munthu onsene, mabitchu penu mtumbe, thangwi ya mabasa adidi ambaphata iye.

⁹Imwembo ambuya, ntchibodzi-bodzi khalani adidi kuna mabitchu anu, pontho lekani kuathuswa. Kumbukani kuti imwe monsene pabodzi ndimwe mabitchu a Mbuyanu mbodzi wa kudzulu, ule ambatonga mwakukhonda yang'ana nkhope.

¹⁰Pakumalisira, khalani akuwanga mukuphatanizana kwanu na Mbuya, pontho na mphamvu zache zikulu.

¹¹Valani pida pyonsene pimbakupasani Mulungu, towera mukwanise kupitchinjiriza mwekha ene kuna unthawatawa wa Satana.

¹²Thangwi nkhondo yathuyi nee njakumenyana na anthu tayu, mbwenye tikumenyana na mizimu yakuipa ya kuthambo, ile ndi mafumu, atongi na anyamphamvu a nsiku za mdima zino.

¹³Tenepo, chinchino, valani pida pya Mulungu, towera mukwanise kupitchinjiriza nyamalwa angakusosani pansiku yakuipayo, pontho kuti pakumala pa nkhondoyi, imwe munathimiza kukhala na mphamvu.

¹⁴Tenepo khalani dzololo mwenemo mwavala kale pyakuonadi ninga bande yakumangwa m'chuno mwanu, chilungamo ninga mayala a utale akutchinjiriza nawo pagangafuwa panu,

¹⁵pontho kusasanyika kwanu kwenda kalalika Mphangwa Zadidi za mtendere kukhale ninga nsapato za anyankhondo.

¹⁶Ndzidzi onsene khalani na chikhulupiro ninga chakugedera nacho matswimo m'manja mwanu, towera mukwanise kuthimisa nacho matswimo akugaka moto akubulukira kuna Satana.

¹⁷Valani chipulumuso ninga chipewu cha utale chakutchinjirizira misolo yanu. Phatisani basa mafala a Mulungu, ale akhala ninga talasada yakumenyera nkhondo imbakupasanani Mzimu Wakuchena ile.

¹⁸Chitani pyonsenepi pakupemphera; pempherani ndzidzi onsene kuti Mulungu akuphedzeni. Pempherani ndzidzi onsene, ninga munakuphedzerani Mzimu Wakuchena. Thangwi ya penepi khalani m'maso, lekani taya mtima; ndzidzi onsene pemphererani anthu onsene a Mulungu.

¹⁹Pontho pempherani kuti Mulungu andipase mphangwa ndzidzi onsene unalalika ine, towera ndilonge mwakuwanga mtima pontho kuti ndivekese pyakubisika pya Mphangwa Zadidi.

²⁰Thangwi ya mphangwazi ine ndine muimiriri, podi kwene kuti ndine nyaperezo. Pempherani kuti ine ndikhale wakuwanga mtima pakulonga pya Mphangwa Zadidi, ninga mwathemera ine kulonga.

²¹Tikiko, mbaleathu wapamtima pontho nyabasa wakukhulupirika pabasa ya Mbuya, anakupangani pyonsene pya ine, towera imwe mupidziwembo kuti ine ndili tani, pontho mule munaphatira ine basa.

²²Ndi thangwi yache ndikumtuma kuna imwe kuti akupangeni mule munakhalira ife kuno, pontho kukuwangisani mtima.

²³Mtendere, kufunana na chikhulupiro pyakubulukira kuna Mulungu Baba pontho Mbuya Yesu Khristu pikhale na akhristu onsene.

²⁴Kukoma mtima kwa Mulungu kukhale kuna onsene ale ambamfuna Mbuya Yesu Khristu na kumfuna kokhonda mala.