Read cisena AFILIPI 2 Bible Online

AFILIPI 2 - cisena bible

AFILIPI 2

¹Moyo wanu wakuphatanizana na Khristu umbakupasani mphamvu, pontho kukufunani kwache kumbakuthondozani. Chiphatizano na Mzimu Wakuchena muli nacho,[2] pontho imwe mumbakomerana mtima pontho mumbaverana nyambalo unango na mwanzache.

²Ndikukupemphani, mphapo, kuti mundichitise kukomerwa monsene mwene pakukhala na manyerezero abodzi na kufunana kubodzi, pontho kukhumba na kunyerezera chinthu chibodzi.

³Lekani chita chinthu na mtima wakupithemba penu wakutumbama, mbwenye khalani akupichepesa; ndzidzi onsene nyerezerani anzanu ninga akufunika kupiringana imwe.

⁴Lekani nyerezerani kuchita pinthu pyakukomera imwe mwekha, mbwenye na pyakukomerambo anango ene.

⁵Monsene mwathema kukhala na mtima onthowo ninga ukhali na Khristu Yesu ule:

⁶Iye akhali na umulungu onsene, mbwenye iye hadaikhe konta pya kukhala[3] kwache sasawa na Mulungu tayu.

⁷M'mbuto mwache iye adapereka na kufuna kwache pyonsene pikhali na iye, pontho iye adasanduka ninga bitchu mbakhala munthu ninga anthu onsene.

⁸Pidakhala iye ninga munthu tenepo, iye adapichepesa pontho adavera, podi na kufa kwene, kufa kwache kwa pamtanda kule.

⁹Na thangwi yeneyi Mulungu adamkuza monsene mwene mbampasa dzina yakupiringana madzina onsene,

¹⁰mwakuti pyonsene pya kudzulu, pya pansi pano, na pya dziko ya pansi pa mataka,[4] pinagodama kulemedza dzina ya Yesu,

¹¹pontho munthu onsene anatawira na mulomo wache kuti Yesu Khristu ndi Mbuya, kudzesa demelero kuna Mulungu Baba.

¹²Natenepo, abale anga apamtima, mphyakufunika pyakwanga pene chinchino ndzidzi una ine kutali na imwe kuti munyanye kundivera ninga kundivera kukhachita imwe ndzidzi onsene ukhali ine na imwe. Thimizani kuchita mwamantha pontho mwakutetemera pinthu pyakuthemerana na chipulumuso chanu kufikirana mamalisiro ache.

¹³Thangwi Mulungu ndiye ambaphata basa muna imwe kukuchitisani kufuna, pontho kukwanisa kuvera kufuna kwache.

¹⁴Phatani pyonsene mwakukhonda dungunya penu kupokanya,

¹⁵towera mukhale okhonda dawa pontho amtima wangwiro, ana a Mulungu akusowa chinthu chakukupokanyisani, ale ambakhala m'dziko ya anthu akuipa na akudawika. Imwe mwathema kuonesa cheza pakati pawo ninga nyenyezi zakumwinikira dziko yonsene,

¹⁶ndzidzi unapereka imwe kuna iwo mafala akupasa moyo. Ngakhala munapichita tenepo ine ndinakhala nayo thangwi yakunyadira pansiku yakudza pontho kwa Khristu, thangwi penepyo pinaonesa kuti mphamvu na basanga nee pyamala papezi tayu.

¹⁷Chikhulupiro chanu chakhala ninga nsembe yakuperekwa kuna Mulungu. Podi kwene pichitike kuti chiropa changa chitsanyulirwe pansembe yeneyi ninga chakupereka, ine ndakomerwa, pontho ndatsanzaya pabodzi na imwe monsene.

¹⁸Ntchibodzi-bodzi imwembo mwathema kukomerwa pontho kutsanzaya pabodzi na ine.

¹⁹Ngakhala nkhufuna kwa Mbuya ndikudikhira kutuma Timoti kuna imwe chinchino pano, towera ndiwangiswe mtima na pinafuna iye dzandipanga pya imwe.

²⁰Iye ndiye ene basi ana manyerezero ninga anga akutsalakanadi pya imwe.

²¹Anango onsene ambatsalakana pya kufuna pya okha ene, nee tsalakana pya kufuna pya Yesu Khristu tayu.

²²Imwe mumbapidziwa kuti makhaliro a Timoti aoneka kale kuti ngadidi. Mumbapidziwa kuti iye adaphata basa yakuvekesa Mphangwa Zadidi pabodzi na ine khala ninga pimbachita mwana na babache.

²³Sindzidzi ndingadziwa munafuna dzandifambira pinthu, ndikudikhira kumtuma kuna imwe.

²⁴Inembo ndinanyindira Mbuya kuti ine ene ndinati ndifikembo kwanuko chinchino pano.

²⁵Ndapinyerezera kuti mphyakufunika kumbwezera mbaleathu Epafrodito. Weneyu adaphata basa, pontho adatchinjiriza pabodzi na ine Mphangwa Zadidi. Iye adakuphatirani basa ninga nyakutumwanu kundiphedza.

²⁶Epafrodito ana chitchuwo kufuna kukuonani monsene, pontho akusanyika mumtima mwache thangwi imwe mudava kuti iye akhadwala.

²⁷Ndimomwene kuti iye akhadwala chifupi kufa. Mbwenye Mulungu akhadamvera nsisi, nee kuti adavera nsisi iye yekha tayu, mbwenye na ine ene, towera ndileke tsukwala pikulu.

²⁸Ndiye thangwi yache ndina chipapu chikulu kumbwezera kuna imwe, towera mungamuona mukomerwe pontho, penepo kutsukwala kwanga kunamalambo.

²⁹Mtambireni mwakukomerwa ninga mbale muna Mbuya. Anthu ninga iye mwathema kualemedza.

³⁰Iye adapipereka kutaya moyo wache, pontho akhali chifupi kufa thangwi ya kuphata basa ya Khristu, towera andiphedze na pinthu pidakhonda imwe kwanisa kundiphedza napyo.