Read cisena AFILIPI 4 Bible Online

AFILIPI 4 - cisena bible

AFILIPI 4

¹Natenepo, abale anga, ndimwe apamtima panga, pontho ndakutchuwani pyakwanga. Imwe mumbandichitisa kukomerwa pyakwanga, pontho ndimbakunyadirani pyakwanga. Tenepo abale anga apamtima panga, mwenemu ndiye mwathema imwe kuimira dzololo m'moyo wanu wakuphatanizana na Mbuya.

²Ndaphata miyendo, Yuodia na Sintike, ndikukupemphani kuti muyese kuphatizana ninga abale muna Mbuya.

³Ndinapempha pontho iwe, nyabasa mwanzanga wakukhulupirika, kuti uaphedze akaziwa, thangwi iwo adaphata basa mwakuwangisa pabodzi pene na ine kuvekesa Mphangwa Zadidi, pabodzi pene na Klementi pontho na anyabasa anzanga onsene, ale madzina awo alembwa m'bukhu ya moyo.

⁴Komerwani mukuphatanizana kwanu na Mbuya ndzidzi onsene. Ndikulonga pontho kuti: komerwani!

⁵Muonese kufulika kwanu kuna anthu onsene. Mbuya ali chifupi.

⁶Lekani swipa mtima na chinthu na chibodzi chene, mbwenye ndzidzi onsene kupemphera kwanu konsene mupemphe Mulungu pinthu pinasowa imwe na mtima wakupereka takhuta.

⁷Tenepo mtendere wa Mulungu, ule ngwakupiringana nzeru za anthu, unatchinjiriza mwadidi mtima na manyerezero anu mukuphatanizana na Khristu Yesu.

⁸Pakumalisira, abale anga, imwe mwathema kuikha mtima papinthu pile mphyadidi pontho pyakuthema kusimbwa napyo. Pinthu pyache mphipi: pyakuonadi, pyakusiririka, pyakulungama, pyangwiro, pyakubalika na pyachilemedzo.

⁹Imwe mwathema kuchita pinthu pidafunza imwe na kutambira kubulukira kuna ine pile, pyonsene pidava imwe kubulukira kuna ine, pontho kupiona ndikupichita. Tenepo Mulungu, nyakupasa anthu mtendere ule, anakhala namwe.

¹⁰Pagwanda nsiku zizinji mbamukhonda onesa kunditsalakana kwanu, tenepo ndakomerwa pikulu mukuphatanizana kwathu na Mbuya, thangwi mwatoma pontho kuonesa kunditsalakana kwanu. Kunditsalakana mukhanditsalakanadi, mbwenye mukhadasowa danga yakuti mupionese.

¹¹Pinalonga inepi, si thangwi yakuti ndasowa chinthu tayu, thangwi ine ndafunza kukwana na pinthu pina ine.

¹²Kusowa na kukhala napyo pizinji ndimbakudziwa. Papinthu pyonsenepi ndidafunza kukhala kwapyo, penu kukhuta penu kukhala na njala, penu kukhala na pinthu pizinji penu pyakuchepa.

¹³Ndimbakwanisa kuchita pyonsene kudzera muna Khristu ambandipasa mphamvu ule.

¹⁴Mbwenye mudachita pyadidi kundiphedza panyatwa zanga.

¹⁵Imwe anthu a ku Filipi mukupidziwa mwadidi mwene kuti pidabuluka ine ku Makedonia nsiku zakutoma kulalika Mphangwa Zadidi, ndimwe ene basi mpingo udandiphedza; ndimwe ene basi mudagawana na ine pinthu pidaganyali ine na pidakhonda ganyali ine.

¹⁶Pikhali ine ku Tesalonika, imwe mukhanditumizira kazinji kene pinthu pikhasowa ine kundiphedza napyo.

¹⁷Si kuti ndikuikha mtimanga pamtukwa udandipasa imwe ule tayu, mbwenye chinafuna ine ntchakuti mabasanu adidi azinji athimizirike kuna mabasanu alembwa kale na Mulungu ale.

¹⁸Ndatambiradi pyonsene mbandikhala napyo pizinjiletu. Tenepo ndina pyonsene pinasowa ine, pile pidatumizira imwe Epafrodito. Mitukwanu yonseneyi yakhala ninga khwema yadidi, nsembe yakutambirwa na Mulungu mbakomerwa nayo.

¹⁹Mulungu wanga ngwakufuma pyakwanga pene, tenepo anakupasani pyonsene pinasowa imwe kudzera muna Khristu Yesu.

²⁰Demelero ikhale kuna Mulungu Babathu, kwenda na kwenda! Ameni.

²¹Mwenyikiro kuna anthu onsene a Mulungu, ale nga Khristu Yesu. Abale ali pabodzi na ine kunowa akukupasani mwenyikiro.

²²Anthu onsene a Mulungu ali kunowa akukupasani mwenyikiro maka-maka ale ambaphata basa kunyumba ya Mfumu wa Roma.

²³Kukoma mtima kwa Mbuyathu Yesu Khristu kukhale namwe monsene.