Read cisena AKOLOSE 1 Bible Online

AKOLOSE 1 - cisena bible

AKOLOSE 1

¹Kubulukira kuna ine Paulo, nyakutumwa wa Khristu Yesu na kufuna kwa Mulungu; ikubulukira pontho kuna mbaleathu Timoti.

²Kwenda kuna anthu a Mulungu mumzinda wa Kolose, ale mbabale athu akukhulupirika mukuphatanizana na Khristu. Kukoma mtima na mtendere pyakubulukira kuna Mulungu pikhale namwe.

³Ndzidzi onsene umbakupemphererani ife, timbapereka takhuta kuna Mulungu, Baba wa Mbuyathu Yesu Khristu.

⁴Thangwi tava mule mumbakhulupira imwe Khristu Yesu, pontho na mule mumbaafunira imwe anthu onsene a Mulungu.

⁵Mphangwa zakuonadi, zile ndi Mphangwa Zadidi, pidatoma izo kulalikwa kuna imwe, imwe mudava pya pinthu pinadikhira imwe dzatambira. Natenepo chikhulupiro chanu na kufunana kwanu pyagona pa pinadikhira imwe dzatambira, pile pyakoyerwa imwe kudzulu.

⁶Mphangwa Zadidi zikuthimiza kudzesa kutsanzaya, pontho zikufalikira kudziko yonsene yapansi ninga pyachitira izo pakati panu kutomera nsiku idatoma imwe kuva na kudzindikira chadi-chadi cha kukoma mtima kwa Mulungu.

⁷Epafra adakufunzisani pya kukoma mtima kwa Mulungu m'mbuto mwathu.[1] Iye ndi mwanzathu wapamtima wakuphatira naye basa pabodzi, ule pontho ndi nyabasa wakukhulupirika wa Khristu.

⁸Iye atipanga pya kufunana kwanu kwakupasani Mzimu Wakuchena kule.

⁹Thangwi ya penepi ndzidzi onsene takupemphererani kutomera nsiku idava ife pya imwe. Timbapempha Mulungu kuti akudzazeni na udziwisi wa kufuna kwache na nzeru pontho kuvesa konsene kule kumbabulukira kuna Mzimu Wakuchena.

¹⁰Tenepo imwe munakwanisa kukhala na makhaliro ninga munapifunira Mbuya, pontho kuchita pyakumkomera monsene mwene. Moyo wanu unaonesa nsapo zadidi za mtundu onsene, pontho nzeru zanu zakudziwa nazo Mulungu zinakula.

¹¹Iye mbakuchitiseni kukhala anthu amphamvu monsene mwene kudzera muna mphamvu pontho demelero yache, towera mukwanise kupirira papinthu pyonsene okhonda taya mtima. Perekani takhuta na mtima wakusekera[2] kuna Baba, ule akuchitisani kukhala anthu akuthema kutambira khundu yanu papinthu pidakoyera Mulungu anthu ache mu ufumu wa cheza pile.

¹³Iye adatiombola kuna mphamvu za mdima mbatidzesa mwadidi muufumu wa mwanache wapamtima,

¹⁴ule kudzera muna iye, Mulungu adatiombola, pontho kutilekerera pyakudawa pyathu.

¹⁵Khristu, ule ngwakuoneka, alandana na Mulungu, wakukhonda oneka ule, pontho iye ndi Mwana wautombo, wakufunika pyakwanga kupiringana pyakulengwa pyonsene.

¹⁶Thangwi Mulungu adalenga pinthu pyonsene pya kudzulu na pya pansi pano kudzera muna iye, pinthu pyakuoneka na pyakukhonda oneka pene, kuthimizapo mizimu yakukhala na mphamvu, ile ndi ambuya, atongi pontho mafumu. Mulungu adalenga kudzulu na dziko yapansi kudzera muna iye, pontho kuti pikhale pyakuganyalisa kuna iye.

¹⁷Khristu akhalipo kale pinthu pyonsene mbipidzati lengwa, tenepo kuphatanizana na Khristu kwachitisa kuti pinthu pyonsene pikhale na mbuto zakuthemerana nayo.

¹⁸Iye ndi msolo wa manungo ache, ale ndi mpingo; iye ndi phata ya moyo wa manungo. Iye ndi Mwana wautombo, wakutoma kulamuswa kuimfa ule, towera iye yekha ene akhale wakutoma padzulu papinthu pyonsene.

¹⁹Thangwi Mulungu mwenechiroache pidamkomera kuti mwanayo akhale na umulungu wache monsene mwene.

²⁰Tenepo kudzera muna mwanayo, Mulungu adanyerezera kudzesa pontho pinthu pyonsene, pya dziko yapansi na pya kudzulu pene, kuna iye mwenechiro pakudzesa mtendere kudzera muna imfa ya mwanache pamtanda ninga nsembe.

²¹Kalene imwe mukhali kutali na Mulungu, pontho mukhali anyamalwache, thangwi ya makhaliro na manyerezero anu akudawika.

²²Mbwenye chinchino Mulungu akuchitisani kukhala pontho ashamwali ache kudzera muna manungo a mwanache pidafa iye, towera mukhale anthu akuchena, angwiro na akusowa chinthu chakukupokanyisani pamaso pache.

²³Tenepo imwe mwathema kukhala anthu akukhulupirika, pamaziko akuwanga pontho akukhazikika mwakukhonda tekenyeka pachidikhiro china imwe chakubulukira kuna Mphangwa Zadidi zidatambira imwe zile. Ndi Mphangwa Zadidi zidandisandusa, ine Paulo, kukhala nyabasa wa Mbuya, Mphangwa Zadidi zile zalalikwa kuna anthu onsene padziko yapansi.

²⁴Chinchino ndakomerwa na nyatwa zinakuonerani inezi, thangwi nyatwa zinaona ine m'manungo mwangazi nkhuphedza kumalisa nyatwa zakusalira za manungo a Khristu, ale ndi mpingo.

²⁵Tenepo Mulungu adandiikha kukhala nyabasa wa mpingo. Iye adandipasa basa yeneyi yakuchitira udidi wanu. Basa yeneyi njakuti ndichitise mphangwa zache kudziwika monsene mwene,

²⁶zile kale ene zikhadabisirwa madzinza onsene, mbwenye chinchino zatchululwa kuna anthu ache.

²⁷Pinafuna Mulungu mphyakuti adziwise anthu ache chakubisikachi, chile ndi mfuma pontho demelero, pyakoyera iye madzinza onsene. Tenepo pyakubisikapi mphyakuti Khristu ali muna imwepo, kweneku nkhulonga kuti imwe munakwatambo khundu mudemelero ya Mulungu.

²⁸Tenepo ife timbalalika pya Khristu kuna anthu onsene. Na nzeru zathu zonsene tikuacheuza pontho kuafunzisa, towera tidzese onsene pamaso pa Mulungu anthu akuthema monsene mwene mukuphatanizana na Khristu.

²⁹Kuti penepi pichitike, ine ndimbaphata basa mwakuwangisa pyakwanga na mphamvu zikulu, zimbandipasa Khristu zile, pontho zikuphata basa muna ine zile.