Read cisena AKOLOSE 2 Bible Online

AKOLOSE 2 - cisena bible

AKOLOSE 2

¹Ndinafuna mupidziwe mule mwaphatira ine basa mwakuwangisa thangwi ya imwepo, anthu a ku Laodikea, pontho anthu anango onsene ale anakhonda kundidziwa na pankhope.

²Ine ndikuchita tenepa, towera iwo awangiswe mtima, pontho kuti aphatanizane mukufunana. Tenepo iwo anakhala na mtsanzayiso wamumphu wa kuvesa chadi-chadi, towera iwo adziwedi pyakubisika pya Mulungu, pile ndi Khristu,

³mule mwagona mfuma yakubisika yonsene ya nzeru na udziwisi wa Mulungu.

⁴Mphapo, ndikukupangani kuti paleke khala munthu na mbodzi ene wakukunyengezani na mphoka zakunama, penu ipyo pikhale pyakuveka mwadidi tani.

⁵Thangwi podi kwene kuti ndalekana namwe kumanungo, kwache muuzimu ndili namwe pabodzi, pontho ndakomerwa pyakwanga pyaona ine mule munafambisira imwe pinthu pyonsene mwadidi, pontho kukhazikika kwachita chikhulupiro chanu pana Khristu.

⁶Podi imwe mwatawira Khristu Yesu kukhala Mbuya, tenepo khalani mukuphatanizana naye.

⁷Zikisani mitsitsi yanu muna iye, ikhani mtimanu pana iye, pontho mukhale anthu akuwanga m'chikhulupiro chanu ninga mudafunzisirwa imwe. Pontho mukhale anthu akudziwa kupereka takhuta.

⁸Khalani m'maso kuti paleke khala munthu wakukuchitisani kukhala mabitchu m'manyerezero anu na nzeru zapezi zakunama za anthu, zile zimbagona pamitemo imbafunzisa anthu, pontho na mphamvu za mizimu yakukhala na utongi padziko yonsene, nee zile zimbagona pa Khristu tayu.

⁹Thangwi umulungu onsene umbakhala m'manungo a Khristu,

¹⁰tenepo imwe mwapaswa moyo wamumphu mukuphatanizana kwanu na iye. Iye ana utongi pana mizimu yakukhala na mphamvu pontho utongi.

¹¹Mukuphatanizana kwanu naye imwe mudagwandwa nsonga yachimuna, nee na kugwandwa kumbachita anthu kule tayu, mbwenye na kugwandwa kumbachita Khristu, kule kwakuchitisani kubuluka pansi pa utongi wa makhaliro akudawika akubalwa nawo.

¹²Thangwi pandzidzi udabatizwa imwe, mudaikhwa pabodzi na Khristu m'masiye, pontho muubatizo monthomo imwe mudalamuswambo pabodzi naye kudzera muna chikhulupiro chanu pana mphamvu za Mulungu, adalamusa Khristu kuimfa ule.

¹³Imwe kale mukhadafa muuzimu thangwi ya pyakudawa pyanu, pontho thangwi imwe mukhali anthu okhonda khala Ayuda okhonda dziwa mwambo. Mbwenye chinchino Mulungu akupasani moyo pabodzi na Khristu. Mulungu adalekerera pyakudawa pyathu pyonsene;

¹⁴iye adafudza mangawathu akhali na ife na matongero ache ene akhapokanyana na ife ale, pontho iye adaafudziratu pakuakhomera pamtanda.

¹⁵Pamtandapo Khristu adamalisa mphamvu za mizimu yakukhala na mphamvu pontho utongi,[3] pontho iye adaatsogolera pakwecha ninga anyaperezo pamlikiti kuonesa kuakunda kwache.

¹⁶Tenepo paleke khala munthu wakukupokanyani papinthu pinadya imwe penu kupimwa, penu pya nsiku zakupambulika, maphwando akusekera kubalwa kwa mwezi, penu pya Nsiku Yakupuma.

¹⁷Pinthu ninga penepi ntchithunzi-thunzi chene cha pinthu pya m'tsogolo, mbwenye chadi-chadi ndi Khristu.

¹⁸Lekani tawirisa munthu na mbodzi ene kukuchitisani kukhondeswa kutambira mfupo, ule ambapiyesa ninga wakufunika pyakwanga thangwi ya masomphenya akupambulika, pontho ule ambapikhakhamiza kuoneka ninga ngwakupichepesa, pontho kuti angelo apembedzwe. Munthu ninga weneyu ambapithemba na manyerezero ache a umunthu okhonda na mathangwi ene,

¹⁹pontho aleka pyakukakamira pana Khristu, ule ndi msolo wa manungo. Manungo ambatambira mphamvu mbaphatana pabodzi na mphindo zache na uzingo, angakhala pansi pa utongi wa Khristu, tenepo manungowo ambakula ninga mumbafunira Mulungu.

²⁰Imwe mwafa pabodzi na Khristu, pontho mwasudzulwa pa utongi wa mizimu yakukhala na utongi ya padziko yonsene yapansi. Mphapo, mwatani, munakhala ninga anthu a padziko yapansi? Ninji mumbavera matongero ninga enewa akulonga kuti,

²¹“Leka phata ichi, Leka lawa icho, pontho Leka khuya ichi”?

²²Pinthu pyonsenepi pingaphatiswa basa kabodzi pimbasanduka pyakusowa basa; penepi ndi matongero pontho pifunziso pyakusasanywa kwene na anthu basi.

²³Matongero enewa ambakhaladi ninga anzeru pakukhakhamiza anthu kuti athema kupembedza angelo, mbapisangiza ninga akupichepesa, pontho kuvesa manungo awo nyatwa. Kwache matongerowo nkhabe phedza munthu kukwanisa kuleka pikhumbo pyakudawika pya manungo tayu.