Read cisena AKOLOSE 3 Bible Online

AKOLOSE 3 - cisena bible

AKOLOSE 3

¹Imwe mwalamuswa kuimfa pabodzi na Khristu, tenepo ikhani mtima papinthu pya kudzulu, kule kumbakhala Khristu pampando wache wachifumu kumadyo kwa Mulungu.

²Ikhani mtima papinthu pya kudzulu, nee papinthu pya pansi pano tayu.

³Thangwi imwe mwafa, pontho moyo wanu wabiswa pabodzi na Khristu muna Mulungu.

⁴Khristu ndiye moyo wanu chadi-chadi, tenepo iye angaoneka pontho, imwe munaonekambo naye pabodzi mudemelero yache.

⁵Mphapo mwathema kupha pikhumbo pya padziko yapansi pano, pile pili mumtima mwanu ninga pyakuzuda, pyakunyansa, pyakusirira, pyakuipa, na mtima; mtima nkhulonga kupembedza mifanikizo.

⁶Thangwi Mulungu anazhangalira anthu akuchita pinthu ninga penepi, anthu okhonda kumvera ale.[4]

⁷Pikhali imwe na makhaliro akale mukhateweza pikhumbo ninga penepi.

⁸Mbwenye chinchino mwathema kuleka chita pinthu pyonsene ninga ipi: kuzhangali, ukali na kuipirwa. Lekani kutikana, penu pakanwa panu kulonga mafala akunyansa.

⁹Lekani kulonga pyakunama kuna unango na mwanzache, thangwi imwe mwadula moyo wakale na makhaliro ache ene,

¹⁰pontho mwavala moyo wachinchino, unasandusa Mulungu, nyakuulenga ule, nsiku na nsiku kuti mukhale na makhaliro a iye ene mwenechiro, towera imwe mumdziwe mwadidi mwene.

¹¹Natenepo nkhabeve kusiyana pakati pa Ayuda na anthu okhonda khala Ayuda, anyakugwandwa nsonga yachimuna penu okhonda gwandwa, anthu a mitundu inango penu anthu akusalira, mtumbe penu mabitchu, mbwenye Khristu ndi pyonsene, pontho ali muna pyonsene.

¹²Imwe ndimwe anthu a Mulungu, iye adakufunani mbakusankhulani kuti mukhale anthu ache. Natenepo khalani anthu akuva nyambalo, akukoma mtima, akupichepesa, akufulika, pontho akupirira.

¹³Vanani unango na mwanzache, pontho lekereranani unango na mwanzache ngakhala unango wa imwe ana thangwi na mwanzache. Mwathema kulekererana unango na mwanzache mungadawirana ninga mwakulekereranimbo Mbuya.

¹⁴Kuthimizira papyonsenepi khalani nako kufunana unango na mwanzache, thangwi kufunana ndiye kumbamanga pinthu pyonsenepi kuti pikhale chibodzi chakuthema monsene mwene.

¹⁵Mtendere ule umbapereka Khristu ukutsogolereni m'manyerezero anu onsene. Mulungu adakuchemerani kuti mukhale na mtendere wenewu, podi imwe ndimwe mapindi a manungo abodzi. Pontho mwathema kupereka takhuta kuna Mulungu.

¹⁶Mphangwa Zadidi zakulonga pya Khristu zathema kukhazikika monsene mwene mumtima mwanu. Funzisanani na kupangizana mwanzeru makhaliro adidi. Imbani masalimo na nyimbo zakukuza, pontho zakulemedza nazo Mulungu. Imbani nyimbo zakupereka nazo takhuta kuna Mulungu mumtima mwanu.

¹⁷Pyonsene pinaphata imwe, penu kupilonga pichitwe na dzina ya Mbuya Yesu na kupereka takhuta kuna Mulungu Baba kudzera muna iye.

¹⁸Akazimwe, verani amunanu, thangwi ninga akhristu imwe mwathema kuchita tenepo.

¹⁹Amunambo, funani akazanu, pontho lekani kuachitira vinga.

²⁰Anamwe, verani anyakukubalani monsene mwene, thangwi penepi ndiye pimbakomera Mulungu.

²¹Imwembo, Ababa, lekani chitisa ananu kuzhangali gopesera anataya mtima.

²²Mabitchu, verani ambuyanu apansi pano na pyonsene pinakupangani iwo kuti mupichite; lekani kuoneka anthu adidi pakuphata basa ngakhala iwo ali ponthopo kukuyang'anirani, mbwenye phatani na mtimanu onsene, thangwi imwe mumbagopa Mbuya Mulungu.

²³Pyonsene pinachita imwe, pichiteni na mtimanu onsene khala ninga mukuphatira basa Mbuya Mulungu, nee anthu tayu.

²⁴Kumbukani kuti Mbuya anakupasani mfupo wakoyera iye anthu ache ale. Thangwi Khristu ndi Mbuya chadi-chadi anatumikira imwe ule.

²⁵Nyakuchita pyakudawa onsene anatambirambo malingana na pyakudawa pimbachita iyepyo, thangwi Mulungu ambatonga mseru munthu onsene okhonda yang'ana nkhope.