Read cisena 1 ATESALONIKA 1 Bible Online

1 ATESALONIKA 1 - cisena bible

1 ATESALONIKA 1

¹Kubulukira kuna ine Paulo, pontho Sila na Timoti. Kwenda kuna mpingo wa ku Tesalonika, ule ngwa Mulungu Baba pontho wa Mbuya Yesu Khristu. Kukoma mtima na mtendere pyakubulukira kuna Mulungu pikhale namwe.

²Ndzidzi onsene timbapereka takhuta kuna Mulungu thangwi ya imwe monsene, pontho timbakuthulani ndzidzi onsene unapemphera ife.

³Tenepo timbakumbuka pamaso pa Mulungu Babathu pya mabasanu akuonesa chikhulupiro chanu ale, pya mule mudaphatira imwe basa kuonesa kufunana kwanu, na pya kukhazikika kwachita chidikhiro chanu pana Mbuyathu Yesu Khristu.

⁴Abale athu, ife timbapidziwa kuti Mulungu ambakufunani, pontho akusankhulani towera mukhale ache,

⁵thangwi Mphangwa Zadidi zidadza kuna imwe, nee na mafala okha tayu, mbwenye pontho na mphamvu za Mzimu Wakuchena, pontho na kukhulupira kukulu kudachita imwe pa pyakuonadi pya mphangwazo. Imwe mukudziwa mwadidi pya mule mukhakhalira ife ndzidzi ukhali ife namwe; pikhachita ife pile pikhali pyakuganyalisa imwepo.

⁶Imwe mudatsanzira ife pabodzi na Mbuya ene. Podi kwene kuti mudasanyika pikulu, imwe mudatambira mphangwa za Khristu na kukomerwa kule kumbabulukira kuna Mzimu Wakuchena.

⁷Natenepo imwe chinchino mwasanduka upangizi kuna anyakukhulupira onsene a m'nthemba za Makedonia na Akaya.

⁸Si mphangwa zokha za Mbuya zidafalikira ku Makedonia na ku Akaya tayu, mbwenye mbiri yakulonga pya chikhulupiro chanu pana Mulungu idaveka konsene kwene. Mphapo nkhabeve chinthu chinafuna ife kulonga.

⁹Anthu onsene ambalonga pya mule mudatitambirira imwe, ndzidzi udakufambirani ife, pontho na mule mudalekera imwe kupembedza mifanikizo mbamuzungunukira kuna Mulungu wakuonadi pontho wamoyo, towera mumtumikire.

¹⁰Chinchino imwe mukudikhira Mwanache kudza kubulukira kudzulu, Mwanacheyu ndi Yesu, adalamusa iye kuimfa ule, pontho ule ambatipulumusa kuna ukali wa Mulungu unafuna kudza.