Read cisena 1 ATESALONIKA 2 Bible Online

1 ATESALONIKA 2 - cisena bible

1 ATESALONIKA 2

¹Abale athu, imwe mukupidziwa kuti ulendo wathu kuna imwe hukhali wapezi tayu.

²Imwe mukupidziwa kuti tikhadavuyiwa na kutikanwa mumzinda wa Filipi, mwenemo mbatidzati kudza ku Tesalonikako. Podi kwene kuti anthu azinji adatipokanya, Mulungu wathu adatipasa kuwanga mtima kuti tikulalikireni Mphangwa Zadidi zakubulukira kuna iye.

³Kukudembeterani kunachita ifeku nee tikuchita mwakunama, penu na manyerezero akuipa, penu kuyesa kunyengeza napyo anthu tayu.

⁴M'mbuto mwache ndzidzi onsene timbalalika ninga mumbapifunira Mulungu, thangwi iye adatiyesa anthu akuthema kupaswa basa ya kulalika Mphangwa Zadidi. Ife nkhabe yesa kufuna kukoma kuna anthu tayu, mbwenye kuna Mulungu, nyakudziwa makhaliro athu ule.

⁵Imwe mukupidziwa mwadidi mwene kuti ndzidzi udadza ife kuna imwe, ife nee tidadza na mafala akukoma, penu mafala akusembedzera nawo pinthu pyanu tayu! Mulungu ndi mboni yathu.

⁶Ife nee tidafuna kusimbwa na anthu, penu na imwe, penu na anthu anango tayu.

⁷Ife mbatidakwanisa kukupangani kuti mutivere, thangwi ndife anyakutumwa a Khristu. Mbwenye ndzidzi ukhali ife na imwe, tikhali anthu akufulika ninga mama wakutsalakana anache.[1]

⁸Ife tidakufunani pyakwanga mwakuti tidasasanyika kugawana namwe nee Mphangwa Zadidi zokha zakubulukira kuna Mulungu tayu, mbwenye pontho na moyo wathu ene, thangwi imwe mukhalidi apamtima pathu!

⁹Abale athu, ndimomwene kuti imwe mukukumbuka mule mukhaphatira ife basa mwakuwangisa. Mosiku na masikati tidaphata basa, towera tileke kukunensani na nyatwa zathu, pikhalalika ife Mphangwa Zadidi zakubulukira kuna Mulungu.

¹⁰Imwe ndimwe mboni zathu, pontho na Mulungu ene kuti makhaliro athu akhali angwiro, akulungama pontho akusowa chinthu chakuapokanyisa kuna imwe anyakukhulupira.

¹¹Imwe mukupidziwa kuti kukhala kwathu pabodzi na munthu onsene kudakhala ninga mule mumbachita baba kuna anache.

¹²Ife tidakuwangisani mtima na kukuthondozani, pontho tidathimiza kukudembeterani kuti mukhale na makhaliro akukomera Mulungu, ule ambakuchemerani kuti mukakwate khundu mu Ufumu wache, pontho mudemelero yache.

¹³Thangwi inango imbaperekera ife takhuta mwakukhonda lekeza kuna Mulungu njishi: imwe mudava na kutambira mphangwa za Mulungu zidadza na ife kuna imwe. Imwe mudazitambira ninga mphangwa zakubulukira kuna Mulungu, nee zakubulukira kuna anthu tayu, thangwi Mulungu akuphata basa mumtima mwa imwe anyakukhulupira.

¹⁴Abale athu, pinthu pidakuchitikiranipi mphyontho-pyontho pile pidachitikira mipingo ya Mulungu ku Yudea, kuna anthu ale nga Khristu Yesu kweneko. Imwe mudasanyiswa na anthu a dzinzanu yonthoyo sasawambo ninga mudasanyisirwa iwo na Ayuda,

¹⁵ale adapha Mbuya Yesu, pontho na maprofeti mbaboneresa pontho ife. Mulungu hambakomerwa nawo anthu enewa na pang'ono pene tayu. Iwo nganyamalwa kuna anthu onsene!

¹⁶Iwo adayesa kutitchinga kuti tileke kulalika kuna anthu okhonda khala Ayuda mphangwa zakudzesa chipulumuso. Pakuchita tenepo iwo apithimizira mwakumalisikiratu pyakudawa pidachita iwo ndzidzi onsene. Pakumalisira ukali wa Mulungu wadza pana iwo.

¹⁷Abale, pidalekana ife kuonana namwe ndzidzi pang'ono maso na maso nee m'manyerezero tayu, tidakutchuwani pyakwanga mwakuti tidayesa-yesa pyakwanga kuti tionane namwe pontho maso na maso.

¹⁸Ife tikhafuna kubwera pontho kuna imwe. Maka ine Paulo ndidayesa-yesa kazinji kene kuti ndibwere pontho, mbwenye Satana hadatitawirise tayu.

¹⁹Imwe ndimwe ene basi, ale anafuna dzakhala chidikhiro chathu, kukomerwa kwathu pontho mfupo unafuna dzaonesa kukunda kwathu pamaso pa Mbuyathu Yesu, iye angabwera pontho.

²⁰Ndimomwene, kunyada kwathu na kukomerwa kwathu ndimwepo.