Read cisena 1 ATESALONIKA 3 Bible Online

1 ATESALONIKA 3 - cisena bible

1 ATESALONIKA 3

¹Pakumalisira, tidapichimwana kuti tipirire okhonda kukuonani, natenepo ife tidanyerezera kukhala pyathu mumzinda wa Atene,

²mbatituma Timoti, mbaleathu wakuphata naye pabodzi basa ya Mulungu yakulalika Mphangwa Zadidi zakulonga pya Khristu. Ife tidamtuma kuti akuwangiseni mtima, pontho kukuphedzani kuti muwange m'chikhulupiro chanu,

³towera paleke khala munthu na mbodzi ene wa imwe wakutekenyeka thangwi ya nyatwa zinaona imwezi. Imwe mukudziwa kuti nkhufuna kwa Mulungu kuti tione nyatwazi.

⁴Thangwi pikhali ife kweneko pabodzi namwe tidakupanganiletu kuti tidathema dzabonereswa, tenepo pidachitikadi ninga montho munapidziwira imwe mwadidi.

⁵Ine ndapichimwana kuti ndipirire okhonda kukuonani, ndi thangwi yache ndikhadamtuma Timoti, tenepo ndidamtuma dzaona kuti chikhulupiro chanu chili tani. Thangwi ndikhaswipa mtima kuti penu Satana, nyakunyengeza, akhadakunyengezani mbachitisa kuti basa yonsene idaphata ife ikhali yapezi!

⁶Mbwenye chinchino pyadza Timoti, atipanga pyakutichitisa kuti tikomerwe pakulonga pya chikhulupiro chanu pontho kufunana kwanu. Iye atipanga kuti imwe ndzidzi onsene mumbatikumbuka mwadidi, pontho kuti imwe mumbafuna kutiona sasawa ninga mumbafunirambo ife kukuonani.

⁷Tenepo nyatwa na kusanyika kwathu konsene tawangiswa mtima na kuva pya imwe. Ntchikhulupiro chanu chinatiwangisa mtima,

⁸thangwi chinchino tina moyo chadi-chadi, podi imwe mwaimira dzololo m'moyo wanu wakuphatanizana na Mbuya.

⁹Chinchino tinakwanisa kupereka takhuta kuna Mulungu wathu thangwi ya imwe. Timbapereka takhuta kuna iye thangwi ya kukomerwa kwathu pamaso pache thangwi ya imwe.

¹⁰Mosiku na masikati timbampempha na mtimathu onsene kuti atitawirise kuonana namwe maso na maso, towera tikupaseni pinthu pinasowa imwe m'chikhulupiro chanu.

¹¹Mulungu Babathu na Mbuya Yesu atisasanyire njira yakuti tidze kuna imwe.

¹²Mbuya akulise na kuinjipisa kufunana kwanu pana unango na mwanzache na pana anthu onsene kuti kukhale sasawa ninga kukufunani kumbachita ife pana imwe.

¹³Mungachita tenepo iye anakuwangisani mtima, tenepo imwe munakhala akusowa chinthu chakukupokanyisani, pontho akuchena pamaso pa Mulungu Babathu ndzidzi unafuna dzabwera pontho Mbuyathu Yesu pabodzi na anthu onsene, ale ngache.[2]