Read cisena 1 ATESALONIKA 4 Bible Online

1 ATESALONIKA 4 - cisena bible

1 ATESALONIKA 4

¹Pakumalisira, abale athu, ife takufunzisani mwadidi pya mule mwathema imwe kukhala na makhaliro akukomera Mulungu; ndimomwene ninga munakhalira imwemu. Tenepo chinchino tikukupemphani pontho kukudembeterani na dzina ya Mbuya Yesu kuti muchite kupiringana penepo.

²Thangwi imwe mukudziwa matongero adakupasani ife na utongi wa Mbuya Yesu.

³Mulungu anafuna kuti imwe mukhale anthu akuchena pontho anthu okhonda chita pinthu pyakuzuda.

⁴Mamuna onsene athema kudziwa kukhala mwadidi na mkazache[3] mwakuchena na mwakupilemedza,

⁵aleke khala na pikhumbo pyakusirira ninga mumbachitira anthu akunja, okhonda dziwa Mulungu ale.

⁶Natenepo paleke khala munthu wakuchitira mwanzache wachikhristu pyakudawika penu kumdyera nkope-kope. Ife takupanganiletu penepi, pontho kukucheuzani pikulu pene kuti Mbuya anatchunyusa munthu onsene anachita penepiyi.

⁷Mulungu hadatichemerere kuti tichite pinthu pyakuzuda tayu, mbwenye kuti tikhale anthu akuchena.

⁸Tenepo munthu onsene anakhonda chifunzisochi, iye nee akukhonda munthu tayu, mbwenye akukhonda Mulungu, ule ambakupasani Mzimu Wakuchena.

⁹Nkhabe funika kuti tikulembereni pya kuafuna anyakukhulupira anzanu tayu, thangwi Mulungu mwenechiroache ndiye akufunzisani pya mule mwathema imwe kufunana unango na mwanzache.

¹⁰Ndimomwene imwe mumbaafuna abale onsene m'nthemba yonsene ya Makedonia. Tenepo, abale athu, tikukupemphani kuti muchite kupiringana penepa.

¹¹Onesesani kuti ndzidzi onsene kukhala kwanu nkhwakufulika mbamutsalakana pinthu pimbachita imwe, pontho kuphata basa na manjanu ninga mudakupangirani ife kale.

¹²Mungachita tenepo, imwe munachitisa anthu okhonda khulupira kukulemedzani, pontho munakhala anthu okhonda nyindira munthu na mbodzi ene papinthu pinasowa imwe.

¹³Abale athu, ife tinafuna mudziwe pyakuonadi pimbachitika kuna agonera mkono ale, towera muleke kutsukwala ninga anthu akusowa chidikhiro.

¹⁴Ife timbakhulupira kuti Yesu adafa, pontho adalamuka mbakhala pontho na moyo, natenepo timbakhulupira kuti Mulungu anadzesa kuna iye anthu agonera mkono akumkhulupira ale, pabodzi na Yesu.

¹⁵Chinchino, ife tikukufunzisani chifunziso cha Mbuya: Mbuya angabwera pontho, ife ale tina moyo lerofe nee tinakhala patsogolo pa adagonera mkono ale tayu.

¹⁶Utongi unaperekwa na mkhuwo, panaveka fala ya mngelo wamkulu, pontho ngoma ya Mulungu inalira, penepo Mbuya mwenechiro anatchitha kudzulu. Anyakukhulupira muna Khristu adagonera mkono ale, analamuka chakutoma;

¹⁷kubuluka penepo ife, ale tinakhala na moyo ndzidzi wenewo, tinagumanyikana pabodzi nawo m'makole kwenda kagumana na Mbuya m'dzulu. Natenepo ndzidzi onsene tinakhala na Mbuya.

¹⁸Tenepo wangisanani mtima unango na mwanzache na mafala enewa.