Read cisena 1 ATESALONIKA 5 Bible Online

1 ATESALONIKA 5 - cisena bible

1 ATESALONIKA 5

¹Abale, nkhabe funika tayu kuti tikulembereni pya nsiku na ndzidzi unafuna dzachitika pinthu penepi.

²Thangwi imwe mukupidziwa mwadidi mwene kuti Nsiku ya Mbuya inabwera ninga mumbabwerera mbava mosiku.

³Ndzidzi umbalonga anthu kuti, “Tili pa mtendere, pontho nkhabe chakugoswa,” penepo pene nyatwa zikulu zinagwa pana iwo mwakututumusa ninga kuva kupha kwa mkazi wamimba angafuna kubala, tenepo anthu hanathawa tayu.

⁴Mbwenye, abale, imwe nee muli mumdima tayu, natenepo nsiku yeneyo ileke kukudodomesani ninga kubwera kwa mbava.

⁵Imwe monsenene ndimwe anthu a cheza, anthu a masikati. Ife si ife anthu a mosiku penu a mumdima tayu.

⁶Tenepo mbatilekeni kugona chitulo ninga anangowa, mbwenye mbatikhaleni m'maso, pontho mbatikhaleni akuuphata mtima.

⁷Anyakugona ambagona na mosiku, pontho anyakuledzera ambaledzera na mosiku.

⁸Ife ndife anthu a masikati, natenepo mbatikhaleni akuuphata mtima. Tendeni tivale chikhulupiro na kufunana ninga chisimbi chakutchinjiriza nacho pagangafuwa pathu, pontho chidikhiro cha chipulumuso ninga chipewu chakutchinjirizira nacho misolo yathu.

⁹Mulungu hadatisankhule kuti atitchunyuse na ukali wache tayu, mbwenye kuti atipulumuse kudzera muna Mbuyathu Yesu Khristu,

¹⁰ule adatifera, towera tikhale na moyo pabodzi naye, penu tikhale na moyo penu tife pandzidzi unafuna iye dzabwera pontho.

¹¹Natenepo wangisanani mtima na kuphedzana unango na mwanzache, ninga munachitira imwe chinchino.

¹²Abale, tikukupemphani kuti mulemedze anyakuphata basa pakati panu, ale ambakutsogolerani na kukupangizani makhaliro adidi pa moyo wanu wachikhristu.

¹³Alemedzeni na kuafuna pikulu thangwi ya basa imbaphata iwo. Khalani mwamtendere pakati panu.

¹⁴Abale athu, tikukudembeterani kuti mucheuze anthu akupolola, wangisani mtima anthu amantha, phedzani anyakusowa mphamvu, pontho khalani akupirira kuna anthu onsene.

¹⁵Lekani kubwezera chakuipa mwanzanu angakuchitirani chakuipa, mbwenye ndzidzi onsene khalani anthu akufuna kuchitirana udidi kuna unango na mwanzache, pontho na kuna anthu onsene.

¹⁶Komerwani ndzidzi onsene,

¹⁷pempherani mwakukhonda lekeza,

¹⁸perekani takhuta kuna Mulungu papinthu pyonsene pimbachitika. Penepi ndiye pinafuna Mulungu kuti imwe mupichite m'moyo wanu wakuphatanizana na Khristu Yesu.

¹⁹Lekani thimisa moto wa Mzimu Wakuchena,

²⁰lekani lulupisa mphangwa zakubulukira kuna Mulungu,

²¹mbwenye yesani pyonsene; chitani pinthu pyadidi ndzidzi onsene,

²²pontho thundani pinthu pyakuipa pya mtundu onsene.

²³Mulungu, ule ambatipasa mtendere, akusanduseni kukhala anthu akupambulika monsene mwene, pontho akoye mwadidi mzimu, moyo na manungo anu, towera mukhale anthu akusowa chinthu chakukupokanyisani pandzidzi unafuna dzabwera pontho Mbuyathu Yesu Khristu.

²⁴Mulungu ambakuchemerani ule anachita pyonsenepi, thangwi iye ngwakukhulupirika.

²⁵Abale, tipempherenimbo ife.

²⁶Perekani mwenyikiro kuna anyakukhulupira onsene kuonesa kuafuna kwanu.

²⁷Na utongi wa Mbuya, ndikukudembeterani kuti muwerenge kalatayi kuna anyakukhulupira onsene.

²⁸Kukoma mtima kwa Mbuyathu Yesu Khristu kukhale namwe.