Read cisena YOSWA 1 Bible Online

YOSWA 1 - cisena bible

YOSWA 1

¹Pidafa Mose nyabasa wa MBUYA, MBUYA adalonga kuna Yoswa mwana Nuni nyakuphedzerache Mose mbati,

²“Nyabasanga Mose afa. Natenepo sasanyikani chinchino iwe pabodzi pene na Aisraele kuwambuka mkulo wa Yorodani kupita m'dziko inafuna ine kuapasa ile.

³Ninga montho mudapangira ine Mose, ine ndapereka kuna iwe na kuna anthu anga onsene mbuto yonsene inafuna imwe kupondayo.

⁴Madire anu anabulukira m'thando yatchetcha kumwera kwenda kumapiri a Lebanoni kumpoto, kubulukira kumkulo ukulu wa Yufurate kumabulukiro dzuwa kugwanda na m'nthemba ya Ahiti mpakana ku Bara ya Mediterania kumadokero dzuwa.

⁵Yoswa, nkhabe mbodzi anafuna dzakwanisa kukukunda tayu pandzidzi unakhala iwe na moyo. Ine ndinati ndikhale nawe ninga mudachitira ine na Mose. Ndzidzi onsene ndinakhala nawe; ine nkhabe kukusiya wekha tayu.

⁶Khala na chipapu pontho wanga mtima, thangwi iwe unakhala mkadamu wa anthu enewa pinaenda iwo kakhala m'dziko idadumbira ine kuna makolo awo ile.

⁷Khala na chipapu pontho wanga mtima mbuonesese kuti mwambo onsene udakupasa nyabasanga Mose wauvera. Leka kuukhonda penu na khundu ene ibodzi ya mwambowo, tenepo unakhala munthu wakupikwanisa konsene kwene kunaenda iwe.

⁸Onesesa kuti bukhu ya mwambo yawerengwa pandzidzi wa chipembedzo. Inyerezere pikulu mumtima mwako mosiku na masikati pontho uonesese kuti ukuchita pyonsene pyalembwa mwenemo. Tenepo pyonsene pinaphata iwe pinakufambira mwadidi mbukhala munthu wakupikwanisa.

⁹Kumbuka, ndakupanga kuti ukhale na chipapu pontho wakuwanga mtima! Leka chita mantha penu kutaya mtima, thangwi ine MBUYA Mulungu wako ndinakhala nawe konsene kwene kunaenda iwe.”

¹⁰Tenepo Yoswa adapanga akadamu

¹¹kwenda mumsasa monsene kupanga anthu kuti, “Sasanyani pyakudya pinango pyapapezi thangwi pansiku yachitatu tikwenda kawambuka mkulo wa Yorodani kupokosera dziko inafuna kukupasani MBUYA Mulungu wanu.”

¹²Yoswa adalonga kuna madzinza a Rubeni na Gadi pontho na kuna Manase wakumabulukiro dzuwa mbati,

¹³“Kumbukani mule mudakupangirani Mose nyabasa wa MBUYA ule kuti MBUYA Mulungu wanu anakupasani dziko yakumabulukiro dzuwa a mkulo wa Yorodani kukhala dziko yanu ene.

¹⁴Akazanu, ananu na pifuyo pyanu pinasala pano, mbwenye anyankhondo anu, ale asasanyika kamenya nkhondo, athema kuwambuka mkulo wa Yorodani patsogolo pa anzawo, towera aaphedze

¹⁵kufikirana iwo apokosera dziko yakumadokero dzuwa a mkulo wa Yorodani, ile yaapasa MBUYA Mulungu wanu. Iye angamala kukhazikisa anthu onsene Aisraele pakupata, imwe munakwanisa kubwerera pyanu mbamukhazikika muno m'dziko yanu ene yakumabulukiro dzuwa a mkulo wa Yorodani, idakupasani Mose nyabasa wa MBUYA ile.”

¹⁶Iwo adamtawira Yoswa mbati, “Ife tinati tichite pyonsene pinatipanga iwe, pontho tinati tiende konsene kwene kunatigwinya iwe.

¹⁷Ife tinakuvera ndzidzi onsene ninga montho mukhavera ife Mose. MBUYA Mulungu wako mbakhale nawe ninga mudachitira iye na Mose!

¹⁸Munthu onsene wakuvunza pya utongi wako penu kukhonda vera pinalonga iwe, weneyo athema kuphiwa. Khala na chipapu, pontho wanga mtima.”