Read cisena YOSWA 10 Bible Online

YOSWA 10 - cisena bible

YOSWA 10

¹Adonizedeki, mfumu wa ku Yerusalemu,[2] adava kuti Yoswa akhadapokosera na kuvungiratu mzinda onsene wa Ai na kupha anthu, pontho mfumu wa mwenemo, ninga montho mudachitira iye kuna Yeriko na mfumu wache. Iye adava pontho kuti anthu a ku Gibeoni achita chiverano cha mtendere na Aisraele, pontho iwo akukhala pakati pa Aisraele.

²Iye na anthu ache adachita mantha pikulu na pinthu penepi, thangwi Gibeoni ukhali mzinda ukulu pyakwanga kupiringana mizinda inango yonsene yakukhala na mfumu, ukhali ukulu pyakwanga kupiringana Ai, pontho amunache akhali akudziwa kumenya nkhondo mwadidi.

³Natenepo Adonizedeki adatumiza mphangwa kuna Mfumu Hohamu wa ku Hebroni, Mfumu Piramu wa ku Yarimuti, Mfumu Yafia wa ku Lakishi na Mfumu Debiri wa ku Egiloni

⁴mbalonga kuna iwo mbati, “Idzani dzandiphedza kumenyana na Gibeoni thangwi anthu ache achita chiverano cha mtendere na Yoswa pabodzi pene na Aisraele onsene.”

⁵Mafumu mashanu a Chiamori, mfumu wa ku Yerusalemu, mfumu wa ku Hebroni, mfumu wa ku Yarimuti, mfumu wa ku Lakishi na mfumu wa ku Egiloni adagumanyikana kusasanya gulu ibodzi ene ya nkhondo. Natenepo iwo adenda na anyankhondo awo onsene mbazungulira Gibeoni kuti amenyane naye.

⁶Amuna a ku Gibeoni adatumiza mphangwa kuna Yoswa ku Giligala, kumsasa kukhakhala iye kule mbati, “Lekani kutisiya tekha, Mbuya! Chimbizani mutiphedze! Mafumu onsene a Chiamori a m'nthemba ya mapiri asasanya gulu ibodzi ya nkhondo kuti amenyane nafe.”

⁷Natenepo Yoswa na anyankhondo ache onsene kuthimizapo amuna akudziwa kumenya nkhondo mwadidi ale, adautoma ulendo kubulukira pa Giligala.

⁸MBUYA adalonga kuna Yoswa mbati, “Leka chita nawo mantha, thangwi ine ndaaikha kale m'manja mwako. Nkhabe na mbodzi ene wa iwo anafuna dzaimisana nawe tayu.”

⁹Mosiku onsenewo Yoswa na anyankhondo ache adafamba pamulikiti kubulukira ku Giligala kwenda ku Gibeoni. Natenepo iwo adamenyana na Aamori mwakuchita kuatutumusa.

¹⁰MBUYA adachitisa Aamori kukhala pampani-pani pamaso pa anyankhondo a Aisraele. Aisraele adacheka pakhosi anthu a ku Gibeoni mbaathamangisa na njira yakwendera ku Beti-Horoni mbathimiza basi kwenda na kuapha mpakana ku Azeka na Makeda.

¹¹Pikhathawa Aamori pamaso pa Aisraele na njira yakubulukira ku Beti-Horoni kutchithira ku Azeka, MBUYA adaagwisira miyala mikulu-mikulu ya matalala kubulukira kudzulu, tenepo anthu azinji adaphiwa na miyala yeneyi kupiringana adaphiwa na matalasada a Aisraele ale.

¹²Pansiku idapereka MBUYA Aamori m'manja mwa Aisraele, Yoswa adalonga kuna MBUYA pamaso pa Aisraele onsene mbati, “Dzuwa, imira pyako pana Gibeoni; Mwezi, leka famba pana phedi ya Aialoni.”

¹³Natenepo dzuwa idaimira, pontho mwezi udaleka kufamba kufikirana dzinza idakunda anyamalwache, ninga montho mudalemberwa ipyo m'bukhu ya Yashara. Dzuwa idaimira kati na kati pa thambo mbidembuka na nsiku ya mumphu kuti idoke pansiku yeneyo.

¹⁴Chipo nee padzati khala nsiku ninga yeneyo, pontho nee na kale ene tayu, nsiku yakuti MBUYA adaverambo munthu. Ndimomwene kuti MBUYA akhadamenyera nkhondo Aisraele.

¹⁵Pidamala penepi Yoswa pabodzi pene na Aisraele onsene adabwerera kumsasa kwawo pa Giligala.

¹⁶Mafumu mashanu a Chiamori ale adathawa mbabisala m'nkhwimba pa Makeda.

¹⁷Pidapangwa Yoswa kuti mafumu mashanu ale adagumanizwa m'nkhwimba pa Makeda,

¹⁸iye adalonga mbati, “Gulung'undisani mwala ukulu mufunge nawo msuwo wa nkhwimbayo, pontho gwinyani amuna anango kuti akalondaliko.

¹⁹Kwache imwe ene lekani imira kwene. Thimizani kuthamangisa anyamalwanu; kuasosa kubulukira kunduli, pontho lekani kuatawirisa kufika kumizinda kwawo, thangwi MBUYA Mulungu wanu aaikha m'manja mwanu.”

²⁰Natenepo Yoswa pabodzi pene na Aisraele adapha chifupi-fupi amuna onsene, mbwenye akuchepa ale adathamanga mbapita m'mizinda mwawo yakutchingwa na mipanda hadaphiwe tayu.

²¹Gulu yonsene ya nkhondo idabwerera mwadidi mwene kuna Yoswa kumsasa pa Makeda. Natenepo nkhabe na mbodzi ene adalongera pyakuipa kuna Aisraele tayu.

²²Yoswa adalonga mbati, “Fungulani msuwo wa nkhwimba, pontho bulusanimo mafumu mashanuwo mudze nawo kuna ine.”

²³Natenepo iwo adabulusa kunja mafumu mashanu ale; mfumu wa ku Yerusalemu, Hebroni, Yarimuti, Lakishi na Egiloni.

²⁴Pidadzeswa mafumu enewa kuna Yoswa, iye adachemeresa amuna onsene a mu Israele mbalonga kuna akadamu a nkhondo akhadadza na iye ale mbati, “Bwerani kuno muaponde m'khosi mafumuwa.” Natenepo iwo adadzadi patsogolo mbaaponda m'khosi mafumu ale.

²⁵Kubuluka penepo Yoswa adalonga kuna akadamu ale mbati, “Lekani chita mantha penu kutaya mtima. Khalani na chipapu pontho wangani mtima. Penepi ndiye pinafuna dzachita MBUYA kuna anyamalwanu onsene anafuna imwe dzamenyana nawo.”

²⁶Yoswa adaalasa mbapha mafumu onsenewo. Kubuluka penepo iye adaamanika pamiti mishanu, tenepo adakhala pamiti pale kufikirana mawulo.

²⁷Pidadoka kunja Yoswa adatonga kuti mitembo ya mafumu ale ibuluswepo pamiti pale mbiponywa m'nkhwimba mukhadabisala iwo mule. Pamsuwo wa nkhwimbayo adaikhapo mwala ukulu, ule uli ponthopo na lero.

²⁸Pansiku yeneyo Yoswa adapokosera mzinda wa Makeda. Iye adapha anthu onsene mumzindamo pabodzi pene na mfumu wawo ene mbakhonda kusiya na moyo munthu onsene wakukhala mwenemo. Iye adachita kuna mfumu wa ku Makeda ninga montho mudachitira iye na mfumu wa ku Yeriko.

²⁹Kubuluka penepo Yoswa na anyankhondo ache adathimiza kubuluka pa Makeda kwenda ku Libina mbakamenya nawo nkhondo.

³⁰MBUYA adaikha pontho mzindawo pabodzi pene na mfumu wawo m'manja mwa Aisraele. Yoswa adavunga mzindawo mbapha anthu onsene mwenemo. Nkhabe munthu na mbodzi ene adasala na moyo tayu. Iye adachita kuna mfumu wa mwenemo ninga montho mudachitira iye na mfumu wa ku Yeriko.

³¹Kubuluka penepo Yoswa na anyankhondo ache adathimiza kubuluka pa Libina kwenda ku Lakishi. Iye adazungulira mbatoma kumenya nawo nkhondo.

³²MBUYA adaikha pontho Lakishi m'manja mwa Aisraele, tenepo Yoswa adapokosera mzindawo pansiku yachiwiri ya nkhondo. Iye adavunga mzindawo mbapha anthu onsene mwenemo ninga mukhadachitira iye na mzinda wa Libina.

³³Pandzidzi wenewu Horamu mfumu wa ku Gezeri akhadadza dzaphedza Lakishi, mbwenye Yoswa adampha pabodzi pene na anyankhondo ache onsene mwakuti nkhabe munthu na mbodzi ene adasala na moyo tayu.

³⁴Kubuluka penepo Yoswa na anyankhondo ache adathimiza kubuluka ku Lakishi kwenda ku Egiloni. Iye adazungulira mbatoma kumenya nawo nkhondo.

³⁵Mzindawo adaupokosera na nsiku yonthoyo mbauvunga na kupha anthu onsene a mwenemo ninga montho mudachitira iye mzinda wa Lakishi.

³⁶Kubuluka penepo Yoswa na anyankhondo ache adathimiza kubuluka pa Egiloni kwenda ku Hebroni mbatoma kumenya nawo nkhondo.

³⁷Iye adapokosera mzindawo mbauvunga, Iye adapha mfumu, pontho munthu onsene wakukhala mumzinda pabodzi pene na maluwani achifupi. Yoswa adavunga mzindawo monsene mwene ninga montho mukhadachita iye na mzinda wa Egiloni mwakuti nkhabe munthu na mbodzi ene adasala na moyo tayu.

³⁸Kubuluka penepo Yoswa na anyankhondo ache adabwerera ku Debiri mbatoma kumenya nawo nkhondo.

³⁹Iye adaupokosera mbapha mfumu, pontho munthu onsene mumzinda pabodzi pene na maluwani achifupi. Iwo adapha munthu onsene mwenemo. Yoswa adachita kuna Debiri na kuna mfumu wache ninga montho mukhadachita iye kuna Hebroni na kuna Libina na kuna mfumu wache.

⁴⁰Yoswa adapokosera nthemba yonseneyo; nthemba ya mapiri, thando yatchetcha ya Negebu, kumadokero dzuwa a mapiri ang'ono-ang'ono, kumtelero pabodzi pene na mafumu awo ene. Nkhabe na mbodzi ene adasala na moyo tayu. Anthu onsene amoyo adamala phiwa ninga montho mukhadaapangira MBUYA Mulungu wa Israele.

⁴¹Tenepo Yoswa adaakunda onsene kubulukira ku Kadeshi Barinea kumwera mpakana ku Gaza, pontho kubulukira kunthemba yonsene ya Gosheni mpakana ku Gibeoni.

⁴²Mafumu onsenewa pabodzi pene na nthemba zawo Yoswa adaakunda pandzidzi ubodzi wa nkhondo, thangwi MBUYA Mulungu wa Israele ndiye akhaamenyera nkhondo.

⁴³Pidamala penepo Yoswa pabodzi pene na Aisraele onsene adabwerera kumsasa kwawo pa Giligala.