Read cisena YOSWA 11 Bible Online

YOSWA 11 - cisena bible

YOSWA 11

¹Pidava Yabini mfumu wa ku Hazori pya kukunda kuduchita Israele, adatumiza mphangwa kuna Yobabu mfumu wa ku Madoni; kuna mafumu a ku Shimironi na Akishafu;

²kuna mafumu m'dziko ya mapiri kumpoto kwa phedi ya Yorodani kumwera kwa nyanza ya Galilea, m'tchinde mwa mapiri kumadokero dzuwa, na a ku Nafoti-Dori kumadokero dzuwa;

³kuna Akanani akumabulukiro dzuwa na akumadokero dzuwa; kuna Aamori, Ahiti, Aperizi, na Ayebusi akukhala m'mapiri ale; pontho na kuna Ahivi ale ali m'tchinde mwa phiri ya Herimoni m'dziko ya Mizipa.

⁴Iwo adadza pabodzi pene na magulu awo a nkhondo pontho na akavalo azinji pontho pingolo pizinji. Ikhali gulu ikulu ya nkhondo mwakuti kuinjipa kwawo kukhali ninga tchetcha ya pagombe.

⁵Mafumu onsenewa adaphatizana kukhala gulu ibodzi ya nkhondo, tenepo iwo adamanga misasa yawo pa mkulo a Meromu, kumenyana na Aisraele.

⁶MBUYA adalonga kuna Yoswa mbati, “Leka chita nawo mantha thangwi mangwana ndzidzi ninga uno, onsenewa ndinaapereka m'manja mwa Aisraele kuti aaphe. Akavalo awo umale kualamaza; pingolo pyawo upipise na moto.”

⁷Natenepo Yoswa pabodzi pene na anyankhondo ache adadza mwakututumusa pamkulo wa Meromu mbamenyana nawo,

⁸tenepo MBUYA adapereka onsene ale m'manja mwa Aisraele. Aisraele adakunda anyamalwawo ale mbaathamangisa mpakana ku Sidoni wamkulu, Misirefoti-Maimu pontho na kuphedi ya Mizipa kumabulukiro dzuwa kufikirana onsene adamaliratu, nee munthu na mbodzi ene wakusala na moyo tayu.

⁹Yoswa adachita kuna iwo ninga montho mukhadalongera MBUYA. Iye adalamaza akavalo awo mbapisa moto pingolo pyawo.

¹⁰Kubuluka penepo Yoswa adazungunukira m'nduli mbapokosera Hazori na kupha mfumu wa mwenemo. (Hazori akhali wamphamvu pyakwanga kupiringana mafumu enewa.) Munthu onsene wakukhala mwenemo adaphiwa.

¹¹Onsene adamala kuapha; nkhabe siya na chinthu cha moyo chene tayu. Mzinda onsene wa Hazori adaupisa moto.

¹²Yoswa adapokosera mizinda mikulu-mikulu yonseneyi mbapha anthu onsene a mwenemo pabodzi pene na mafumu awo. Onsene adamaliratu ninga montho mukhadalongera Mose nyabasa wa MBUYA.

¹³Mbwenye Aisraele hadapise tayu mizinda yonsene yakumangwa papitunda pawo, kupambula Hazori udapisa Yoswa ule.

¹⁴Aisraele adakwata pinthu pyakufunikira na pifuyo pya m'mizinda yeneyi kukhala pyawo. Mbwenye anthu onsene adamala kuapha, nee mbodzi adasalira na moyo.

¹⁵Ninga mudalongera Mulungu kupanga Mose, Mosembo adapanga Yoswa, tenepo Yoswa adachitadi; hadasiye chinthu okhonda kuchichita tayu papyonsene pidatonga MBUYA kuna Mose.

¹⁶Natenepo Yoswa adapokosera dziko yonseneyi: nthemba ya mapiri, thando yatchetcha ya Negebu yonsene, nthemba yonsene ya Gosheni, m'tchinde mwa mapiri kumabulukiro dzuwa, phedi ya Yorodani na mapiri a Israele pontho na m'tchinde mwache,

¹⁷kubulukira kuphiri ya Halaki, ile idatsamira Seiri mpakana ku Baala-Gadi m'phedi ya Lebanoni m'tchinde mwa phiri ya Herimoni. Iye adakunda mafumu onsene mbaapha.

¹⁸Yoswa adamenya nkhondo na mafumu enewa ndzidzi ukulu ene mbaapha onsenene.

¹⁹Mzinda udachita chiverano cha mtendere na Israele ngule ene wa Gibeoni, kule kukhakhala Ahivi. Mbwenye mizinda inango yonsene idakundwa pankhondo.

²⁰Thangwi MBUYA ndiye adachitisa anthu a mizinda inango ile kuumisa mtima kuti amenye nkhondo na Aisraele, towera onsene amale kuavunga, kuapuluziratu onsene mwakukhonda kuva nawo nsisi ninga montho mudalongera MBUYA kuna Mose.

²¹Pandzidzi wenewo Yoswa adenda kavunga dzinza ya anthu akujintcha yakuchemerwa Aanakimu, ale akhakhala m'nthemba ya mapiri; mu Hebroni, Debiri, Anabu, na a m'nthemba yonsene ya mapiri a Yuda na Israele. Yoswa adaavunga onsenewo pabodzi pene na mizindawo ene.

²²Nkhabe pontho mbodzi wa dzinza ya Aanakimu akhadasala na moyo mu Israele tayu; mbwenye akuchepa ndiye akhadasala mu Gaza, Gati na Ashidodi.

²³Yoswa adapokosera dziko yonsene ninga montho mukhadalongera MBUYA kuna Mose. Yoswa akhadapereka dziko ile kuna Aisraele onsene kukhala yawo ene mbaigawa kada dzinza khundu yache. Natenepo anthu adapuma kumenya nkhondo.