Read cisena YOSWA 13 Bible Online

YOSWA 13 - cisena bible

YOSWA 13

¹Pidakalamba Yoswa mbakhala na pyaka pizinji pyakubalwa. MBUYA adalonga kuna iye mbati, “Iwe wakalamba mbwenye pasala dziko ikulu kuti iwe upokose.

²Nthemba yasalayo njishi: Nthemba zonsene za Afilisti na za Ageshuri

³(nthemba zakubulukira kumkulo wa Shihori kumabulukiro dzuwa a Iguputo mpakana kumadire a Ekroni kumpoto kwache zikhayeswa ninga za Akanani mbatongwa na mafumu mashanu a Chifilisti mu Gaza, Ashidodi, Ashikeloni, Gati na Ekroni); pontho na nthemba za Aavi

⁴kumwera; dziko yonsene ya Akanani kubulukira ku Ara wa Asidonia mpakana ku Afeki, nthemba ya Aamori,

⁵dziko ya Gebali; pontho na Lebanoni onsene mpakana kumabulukiro dzuwa kwache, kubulukira ku Baala-Gadi m'tchinde mwa phiri ya Herimoni mpakana kumakata a Hamati.

⁶“Mbwenye kulonga pya anthu akukhala m'dziko ya m'mapiri kubulukira ku Lebanoni kwenda ku Misirefoti-Maimu, yeneyi ndi dziko yonsene ya Asidoni, ine ene mwenechiro ndinati ndiathamangise pamaso pa Aisraele. Onesesa kuti dziko yeneyi waigawa kuna Aisraele kuti ikhale yawo ene ninga mudakupangira ine,

⁷pontho uigawe pakati pa madzinza mafemba na Manase wakumadokero dzuwa kuti ikhale yawo ene.”

⁸Manase wakumabulukiro dzuwa, dzinza ya Rubeni, na ya Gadi akhadatambira kale dziko yakumabulukiro dzuwa a mkulo wa Yorodani, ile ikhadaapasa Mose nyabasa wa MBUYA kukhala yawo ene.

⁹Dzikoyo idafumuka kubulukira ku Aroeri madire a phedi ya Arinoni, pontho kubulukira kuluwani ya pakati pa phedi ya Arinoni kuthimizapo mbuto zonsene zakukwira za Medeba mpakana ku Diboni,

¹⁰na kumaluwani onsene a Mfumu Sihoni wa Aamori, ule akhatonga Heshiboni mpakana ku madire a Aamoni.

¹¹Kubuluka penepo idathimiza Gileadi, pontho nthemba za anthu a ku Geshuri na Maaka, phiri yonsene ya Herimoni, nthemba yonsene ya Bashani mpakana ku Saleka,

¹²pontho na nthemba yonsene ya ufumu wa Ogi m'Bashani, ule akhatonga dziko ya Ashitaroti na Edrei, pontho ule akhali nyakusala mbodzi wa anthu akumalisira a Arefaimu. Mose akhadaakunda mbakwata dziko yawo.

¹³Kwache Aisraele hadathamangise anthu a ku Geshuri na Maaka tayu. Natenepo iwo akuthimiza kukhala pakati pa Aisraele na lero.

¹⁴Mbwenye dzinza ya Levi hidapaswa pinthu kukhala pyawo pene tayu, thangwi nsembe yakupyerera imbaperekwa kuna MBUYA Mulungu wa Israele ile, ndiye ikhali pinthu pyawo ninga montho mukhadadumbira iye kuna iwo.

¹⁵Mose akhadapereka khundu inango ya dziko ile kuna mabanja a dzinza ya Rubeni kukhala yawo ene.

¹⁶Madire awo adafumuka mpakana ku Aroeri (m'khundu khundu mwa phedi ya Arinoni) na mzinda wakukhala pakati pa phedi yeneyi kuthimizapo mbuto zonsene zakukwira zakuzungulira Medeba,

¹⁷kuthimiza pontho na Heshiboni pontho maluwani onsene a pamapiri: Diboni, Bamoti Baala, Beti-Baalameoni,

¹⁸Yahazi, Kedemoti, Mefaati,

¹⁹Kiriataimu, Sibima, Zereti-Shahari paphiri ya m'phedi,

²⁰Beti-Peori, pakubidira pa phiri ya Pisiga, pontho Beti-Yeshimoti,

²¹kuthimiza pontho na maluwani onsene a pamapiri pabodzi pene na ufumu onsene wa Mfumu Sihoni wa Chiamori ule akhadatonga dziko ya Heshiboni. Mose adakunda mfumu weneyu pabodzi pene na atongi a ku Midiani: Evi, Rekemu, Zuri, Huri, na Reba. Onsenenewa akhadatonga nthemba ile m'mbuto mwa Mfumu Sihoni.

²²Mbodzi wa anthu adaphiwa na anthu a ku Israele ndi Balamu nyakuombedza, mwana Beori.

²³Mkulo wa Yorodani ndiye akhali madire akumadokero dzuwa a dzinza ya Rubeni. Yeneyi ndiye ikhali maluwani na midzi adapaswa mabanja a dzinza ya Rubeni kuti ikhale yawo ene.

²⁴Mose adapereka pontho khundu inango ya dziko ile kuna mabanja a dzinza ya Gadi kuti ikhale yawo ene.

²⁵Nthemba yawoyo ikhali Yazere, na maluwani onsene a Gileadi, khundu inango ya dziko ya Aamoni mpakana ku Aroeri, kule nkhumabulukiro dzuwa a Raba.

²⁶Nthembawo idathimizirika kubulukira ku Heshiboni kwenda ku Ramati-Mizipa, pontho na Betonimu, kubulukira ku Mahanaimu kwenderatu kumadire a Lodebara.

²⁷M'phedi ya Yorodani, madire adathimizapo Beti-Haramu, Beti-Nimera, Sukoti, na Zafoni, ufumu unango onsene wa Mfumu Sihoni wa ku Heshiboni. Madire awo akumadokero dzuwa akhali mkulo wa Yorodani mpakana kumpoto kwa nyanza ya Galilea.

²⁸Yeneyi ndiye ikhali maluwani na midzi adapaswa mabanja a dzinza ya Gadi kukhala yawo ene.

²⁹Mose akhadapereka khundu inango ya dziko ile kuna Manase wakumabulukiro dzuwa kada banja kukhala yawo ene.

³⁰Madire awo adathimizirika mpakana ku Mahanaimu, pontho na nthemba yonsene ya Bashani, ufumu onsene wa Ogi, Mfumu Bashani, pabodzi pene na midzi yonsene makumatanthatu ya Yairi m'Bashani,

³¹kuthimizapo khundu inango ya Gileadi, pontho na Ashitaroti na Edrei, mizinda mikulu ya Ogi m'Bashani. Nthemba yonseneyi idaperekwa kuna khundu ibodzi ya pidzukulu pya Makiri, mwana Manase kada banja.

³²Mwenemu ndiye mudagawira Mose dziko yakumabulukiro dzuwa a mkulo wa Yorodani na Yeriko pikhali iye pa phedi ya Moabu.

³³Mbwenye Mose hadapereke dziko na ibodzi ene tayu kuna dzinza ya Levi. Iye adaapanga kuti khundu yawo inakhala nsembe zakuperekwa kuna MBUYA Mulungu wa Israele.