Read cisena YOSWA 14 Bible Online

YOSWA 14 - cisena bible

YOSWA 14

¹Mbuto zidapaswa Aisraele kukhala zawo zene m'dziko ya Kanani, zile zidaagawira Eleazara nyansembe, Yoswa mwana Nuni na akadamu a m'madzinza a Israele nsenezi. Mbuto zenezi zidaperekwa kuna madzinza mafemba na theka

²pakuchita ntsango[5] ninga montho mudalongera MBUYA kudzera muna Mose.

³Mose akhadapereka kale dziko yakumabulukiro dzuwa a mkulo wa Yorodani kuna madzinza mawiri na Manase wakumabulukiro dzuwa kukhala yawo ene, mbwenye dzinza ya Levi hadaipase dziko na pang'ono pene tayu,

⁴thangwi ana achimuna a Yosefe akhadasanduka madzinza mawiri, Manase na Eferemu. Alevi hadatambire khundu yawo pa dziko ile tayu, kwache adapaswa kwene luwani kuti akhalemo na mbuto yakudyeserapo pifuyo pyawo.

⁵Natenepo Aisraele adagawana dziko ile ninga montho mukhadalongera MBUYA kudzera muna Mose.

⁶Kubuluka penepo anthu a dzinza ya Yuda adadza kuna Yoswa pa Giligala, tenepo Kalebu mwana Yefune, Mkenezi, adalonga kuna iye mbati, “Ukupidziwa pidalonga MBUYA pa Kadeshi Barinea pya iwe na ine kuna Mose, munthu wa Mulungu ule.

⁷Ndzidzi ukhadanditumiza Mose nyabasa wa MBUYA kubulukira ku Kadeshi Barinea dzazonda dziko ino, ndikhali pyaka makumanayi pyakubalwa. Tenepo ine ndidadza na mphangwa malingana na kuona kwanga,

⁸mbwenye abale anga adenda na ine adachitisa anthu kukhala na mantha. Mbwenye podi kwene kuti pikhali tenepo, ine ndidathimiza kuvera MBUYA Mulungu wanga na mtima onsene.

⁹Natenepo pansiku yeneyo Mose adadumbira kuna ine mbati, ‘Dziko idaponda iwe mbufambamo ile inakhala yako na anako ene kwenda na kwenda, thangwi wavera MBUYA Mulungu wanga na mtima onsene.’

¹⁰Natenepo ninga montho mudadumbira MBUYA kuna ine, iye andikoya na moyo pyaka makumanayi na pishanu kutomera pansiku idalonga iye penepi kuna Mose, uku Aisraele akutsalakatika m'thando yatchetcha. Natenepo lero ndina pyaka makumasere na pishanu pyakubalwa.

¹¹Na lero mphamvu ndikhali nazo basi ninga zontho zikhali na ine pandzidzi idandituma Mose. Mphamvu ndili nazo basi zakukwanisa kumenya nazo nkhondo penu kuchita chinthu chinango chene.

¹²Tenepo lero ndipase nthemba ya mapiri idadumbira MBUYA pansiku ile kuna ine. Iwe ene udava kuti Aanakimu akhali kweneko pontho kuti maluwani awo akhali akulu-akulu pontho akutchingwa na mpanda, mbwenye na chiphedzo cha MBUYA ine ndinati ndiathamangisemo ninga montho mudalongera MBUYA.”

¹³Kubuluka penepo Yoswa adatsanzayisa Kalebu mwana Yefune mbampasa mzinda wa Hebroni kukhala wache ene.

¹⁴Natenepo mzinda wa Hebroni na lero ngwa Kalebu mwana Yefune, Mkenezi, thangwi iye adavera MBUYA Mulungu wa Israele na mtimache onsene.

¹⁵Mzinda wa Hebroni pakutoma ukhachemerwa na dzina ya Kiriati-Ariba. Aribayo akhali munthu wamkulu pyakwanga pakati pa Aanakimu. Kubuluka penepo dziko idapuma kumenya nkhondo.