Read cisena YOSWA 16 Bible Online

YOSWA 16 - cisena bible

YOSWA 16

¹Madire akumwera kwa nthemba idapaswa pidzukulu pya Yosefe idatomera kumkulo wa Yorodani chifupi na Yeriko, kumabulukiro dzuwa a pamphuno za madzi za ku Yeriko mbapita na m'thando yatchetcha. Iwo adakwira kunthemba ya mapiri ya Betele kubulukira ku Yeriko.

²Kubulukira ku Betele adenda ku Luzi kugwanda na m'nthemba ya Aariki mu Ataroti.

³Kubuluka penepo adathimiza kwenda kumadokero dzuwa kunthemba ya Yafuleti mpakana nthemba ya ku Beti-Horoni pontho Gezeri mbakamalizira pa Bara ya Mediterania.

⁴Pidzukulu pya Yosefe, dzinza ya Eferemu na Manase yakumadokero dzuwa idatambira nthemba yeneyi kukhala yawo ene.

⁵Nthemba ya Eferemu kada banja njishi: madire awo adatomera ku Ataroti-Adara kwendera kumabulukiro dzuwa mbakwira ku Beti-Horoni,

⁶kubuluka penepo adafika ku Bara ya Mediterania. Mikimetati akhali kumpoto kwawo. Kumabulukiro dzuwa a kweneku madire awo adagonya mbayang'ana Taanati Shilo mbapiringana penepa mpakana kumabulukiro dzuwa a Yanoa.

⁷Kubuluka penepo adabidira ku Ataroti na Naara kubulukira ku Yanoa kwenda ku Yeriko mbakadolomera pamkulo wa Yorodani.

⁸Kubulukira pa Tapua madire ale adenda kumadokero dzuwa mpakana kumkhwawa wa Kana mbakadolomera ku Bara ya Mediterania. Yeneyi ndiye ikhali dziko idapaswa dzinza ya Eferemu kada banja kuti ikhale yawo ene,

⁹pabodzi pene na maluwani pontho na midzi ile ikhali m'bwalo mwa madire a Manase, mbwenye mbuto zenezi zidaperekwa kuna Eferemu.

¹⁰Dzinza ya Eferemu hidathamangisa Akanani, ale akhakhala mu Gezeri tayu. Tenepo na lero Akanani akukhala pakati pa anthu a dzinza ya Eferemu. Kwache iwo adakhakhamizwa kuphata basa ninga mabitchu.