Read cisena YOSWA 17 Bible Online

YOSWA 17 - cisena bible

YOSWA 17

¹Khundu inango yakumadokero dzuwa a mkulo wa Yorodani idaperekwa kuna pidzukulu pya Manase mwana wautombo wa Yosefe. Manase mwanache wautombo akhali Makiri, nyakudziwa kumenya nkhondo, ule akhali kholo ya anthu a ku Gileadi mbatambira nthemba ya Gileadi na Bashani.

²Dziko yonsene yakumabulukiro dzuwa a mkulo wa Yorodani idaperekwa kuna mabanja a Manase adasalira ale: Abiezere, Heleki, Asriele, Shekemu, Hefere na Shemida. Enewa akhali pidzukulu pyachimuna pya Manase mwana Yosefe, pontho enewa akhali akadamu a mabanja.

³Zelofehadi mwana wamamuna wa Hefere, mdzukuluache Gileadi mwana Makiri ulembo ntchidzukulu cha Manase akhali nkhabe ana achimuna. Ana akhali na iye akhali achikazi ene basi. Madzinawo mbawa; Mala, Nowa, Hogila, Milika na Tiriza.

⁴Iwo adenda kuna Eleazara nyansembe, Yoswa mwana Nuni na kuna akadamu a Aisraele mbalonga mbati, “MBUYA adapanga Mose kuti apereke kuna ife na abale athu achimunawa khundu ibodzi ya dzikoyi kuti ikhale yathu ene.” Natenepo ninga mukhadalongera MBUYA iwo adapaswa dziko pabodzi pene na abale awo achimuna ale kukhala yawo ene.

⁵Ndi thangwi yache Manase adatambira mbuto khumi kupambula Gileadi na Bashani kukhundu yakumabulukiro dzuwa a mkulo wa Yorodani,

⁶thangwi pidzukulu pyache pyachimuna na pyachikazi pidatambirambo dzikoyo. Dziko ya Gileadi idaperekwa kuna pidzukulu pya Manase pidasalira pile.

⁷Nthemba ya Manase idafika mpakana ku Mikimetati kubulukira ku Asheri, kumabulukiro dzuwa a Shekemu. Kubuluka penepo madire ache adenda kumwera kuthimizapo anthu a kukhala mu Entapua.

⁸Dziko yakuzungulira Tapua ikhali ya Manase, mbwenye mzinda wa Tapua, ule ukhali m'madire a Manase, ukhali wa pidzukulu pya Eferemu.

⁹Kubuluka penepo madire adabidira kumkhwawa wa Kana. Maluwani akumwera kwa mkhwawa wa Kana akhali a Eferemu podi kwene kuti akhali nthemba ya Manase. Madire a Manase adathimiza kwenda kukhundu yakumpoto kwa mkhwawa ule mbakadolomera ku Bara ya Mediterania.

¹⁰Eferemu akhali kukhundu yakumwera, Manasembo akhali kukhundu yakumpoto. Madire awo akukhundu yakumabulukiro dzuwa akhali Bara ya Mediterania. Asheri akhali kukhundu yakumpoto kumadokero dzuwa. Isakara akhali kukhundu yakumpoto kumabulukiro dzuwa.

¹¹M'bwalo mwa madire a Isakara na Asheri. Manase adapokosera nthemba ya Beti-Shani na Ibuleamu pabodzi pene na maluwani akuzungulira, pontho na Dori (nyakukhala pagombe), Endori, Taanaki, Megido na maluwani akuzungulira.

¹²Anthu a dzinza ya Manase hadakwanise kuathamangisa anthu akhakhala m'maluwani ale tayu, natenepo Akanani adathimiza kukhala mwenemo.

¹³Podi na ndzidzi udasanduka Aisraele kukhala amphamvu pyakwanga, iwo hadathamangise Akanani onsene tayu, mbwenye iwo adakhakhamizwa kuphatira basa Aisraele.

¹⁴Pidzukulu pya Yosefe pidalonga kuna Yoswa mbati, “Thangwi yache ninji mwatipasa kwene khundu ibodzi ene basi ya dziko kuti ikhale yathu ene? Ife tilipo azinji thangwi MBUYA atitsanzayisa.”

¹⁵Yoswa adatawira mbati, “Ngakhala imwe ndimwe azinji pontho kuti nthemba ya mapiri ya Eferemu yakucheperani, ndokoni mumsitu m'dziko ya Aperizi na Arefaimu mukagwise mitiyo mbamuchenesemo kuti ikhale dziko yanu ene.”

¹⁶Iwo adatawira mbati, “Dziko ya mapiri si yakukwana tayu kuna ife, mbwenye Akanani m'maphedi ana pingolo pyasimbi, onsene ale ambakhala ku Beti-Shani na maluwani akuzungulira, pontho na ale ambakhala paphedi ya Yezereele.”

¹⁷Yoswa adalonga kuna madzinza a Eferemu na Manase yakumadokero dzuwa mbati, “Ndimomwene kuti imwe mulipo azinji, pontho kuti ndimwe anthu amphamvu pyakwanga. Imwe munati mutambire khundu inango yakuthimizira.

¹⁸Dziko ya mapiri inakhala yanu. Podi kwene kuti ntchimsitusitu imwe munati muichenese mbamuikwata kukhala yanu ene kubulukira nkhomo mpakana nkhomo inangoyo. Kulonga pya Akanani, imwe muathamangise, podi kwene kuti iwo ana pingolo pyawo pyasimbi, pontho kuti mbanthu amphamvu pyakwanga.”