Read cisena YOSWA 18 Bible Online

YOSWA 18 - cisena bible

YOSWA 18

¹Pidamala Aisraele kukunda dziko yonsene, adagumanyikana pabodzi pene pa Shilo mbamangapo Chikhumbi cha Mulungu. Dziko yonsene ikhali m'manja mwawo,

²mbwenye pakhali madzinza manomwe ale hakhadadzati tambira dziko yawo tayu.

³Tenepo Yoswa adalonga kuna Aisraele mbati, “Munadikhira mpakana lini kuti mukwate dziko idakupasani MBUYA Mulungu wa makolo anu ile?

⁴Sankhulani amuna atatu, munthu mbodzi kada dzinza. Anthu enewa ndinaatuma kwenda kazonda dziko yonsene, pontho kalemba pya dziko inafuna iwo kuti ikhale yawo ile malingana na madzinzawo. Angamala penepo athema dzabwera kuna ine.

⁵Dzikoyo muigawe makhundu manomwe. Yuda anakhala konthoko kunthemba yakumwera, pontho dzinza ya Yosefe inakhala nthemba yakumpoto.

⁶Mungamala jambula mapindi manomwe a dziko ile, dzani nawo kuna ine, tenepo ine ndinachita ntsango[7] pamaso pa MBUYA Mulungu wanu.

⁷Dzinza ya Levi mbileke kwata khundu pakati panu thangwi chinthu chidapaswa iwo nkhukhala anyansembe akutumikira MBUYA. Gadi, Rubeni na Manase wakumabulukiro dzuwa adatambira nthembawo kukhundu yakumabulukiro dzuwa a mkulo wa Yorodani. Mose nyabasa wa MBUYA ndiye adaapasa.”

⁸Pikhautoma anthu ulendo wakwenda kajambula dziko ile, Yoswa adalonga mbati, “Ndokoni mukajambule dziko yonseneyo mbamulembe mbuto zinomwe zinafuna imwe kuti zikhale zanu zile. Mungamala penepo dzani pontho kuna ine, tenepo ine ndinakuchitirani ntsango pamaso pa MBUYA pano pa Shilo.”

⁹Natenepo amuna ale adalamuka kwenda m'dziko yonsene ile. Iwo adalemba mbuto zikhafuna iwo zile, mzinda na mzinda, mapindi manomwe mbabwerera kuna Yoswa kumsasa ku Shilo.

¹⁰Natenepo Yoswa adaachitira ntsango pa Shilo pamaso pa MBUYA mbagawa nthemba ile kuna Aisraele malingana na madzinzawo.

¹¹Dzinza ya Benjemani ndiye ikhali yakutoma kutambira nthemba kada banja. Nthembawo ikhali pakati pa dzinza ya Yuda na Yosefe.

¹²Kukhundu yakumpoto madire awo adatomera pamkulo wa Yorodani mbakwira kumpoto kwa Yeriko kwenda kumadokero dzuwa mbagwanda na m'nthemba ya mapiri mbadolomera kuthando yatchetcha ya Beti-Aveni.

¹³Kubuluka penepo madire ale adagwanda na kumwera pamtelero wa Luzi (wenewu ndi Betele) mbabidira ku Ataroti-Adara kunthemba ya mapiri yakumwera kwa Beti-Horoni.

¹⁴Kubulukira kuphiri yakuyang'anisana na Beti-Horoni, ile kumwera kwache, madire ale azungunukira kumwera mbaenda na m'khundu-khundu mwa phiri yeneyi kumadokero dzuwa mbafika pa Kiriati-Baala (penu Kiriati-Yearimu) luwani ya anthu a dzinza ya Yuda. Enewa ndi madire akumadokero dzuwa.

¹⁵Madire akumwera adatomera pankhomo ya Kiriati-Yearimu mbafika[8] pamphuno ya madzi a ku Nefitoa.

¹⁶Madirewo adabidira m'tchinde mwa phiri kuyang'anisana na phedi ya Beni-Hinomu, kumpoto kwa phedi ya Refaimu. Madire ale adathimiza kubidira kuphedi ya Hinomu mbaenda na m'khundu-khundu mwa mtelero wakumwera kwa mzinda wa Ayebusi mpakana ku Enirogele.

¹⁷Kubuluka penepo adagwanda na kumpoto kwenda ku Enishemeshi mbathimiza kwenda ku Geliloti, ile ikhali njira ya pamtelero ya Adumimu, pontho mbabidira kumwala wa Bohani mwana Rubeni.

¹⁸Madirewo adathimiza kwenda kumpoto pamtelero kuyang'ana Beti-Araba mbafika kuphedi ya Yorodani.

¹⁹Kubuluka penepo adabidira kumpoto pamtelero wa Beti-Hogila mbadolomera pagombe yakumpoto kwa Nyanza Yakufa, kumadolomero a mkulo wa Yorodani kumwera kwache. Enewa ndi madire akumwera.

²⁰Mkulo wa Yorodani ndi madire akumabulukiro dzuwa. Enewa ndiye akhali madire awo kuonesa mbuto za mabanja a dzinza ya Benjemani kukhundu zonsene.

²¹Maluwani a mabanja a dzinza ya Benjemani akhali Yeriko, Beti-Hogila, Emeki-Kezizi,

²²Beti-Araba, Zemaraimu, Betele,

²³Avimu, Para, Ofara,

²⁴Kefara-Amoni, Ofini na Geba, maluwani khumi na mawiri onsene pabodzi na midzi yawo yakuzungulira.

²⁵Pakhali pontho Gibeoni, Rama, Beeroti,

²⁶Mizipa, Kefira, Moza,

²⁷Rekemu, Iripeele, Tarala,

²⁸Zela, Haelefu, Yebusi (penu Yerusalemu), Gibea na Kiriati-Yearimu, maluwani khumi na anayi onsene pabodzi pene na midzi yawo yakuzungulira. Yeneyi ndiye ikhali nthemba idapaswa mabanja a Benjemani kuti ikhale yawo ene.