Read cisena YOSWA 19 Bible Online

YOSWA 19 - cisena bible

YOSWA 19

¹Ntsango yachiwiri idachitika mbigwera mabanja a Simioni. Dziko yawo idafumuka mpakana kudziko idapaswa dzinza ya Yuda.

²Idathimizapo Beeresheba (penu Sheba), Molada,

³Hazari-Shuali, Bala, Ezemu,

⁴Elitoladi, Betuli, Horima,

⁵Zikilagi, Beti-Marikaboti, Hazari-Susa,

⁶Beti-Lebaoti na Sharuheni, maluwani khumi na atatu onsene pabodzi na midzi yache yakuzungulira.

⁷Pakhali pontho Aini, Rimoni, Etheri na Ashani, maluwani manayi pabodzi pene na midzi yache yakuzungulira,

⁸pabodzi pene na midzi yonsene yakuzungulira maluwani enewa mpakana ku Baalati-Beeri (Rama m'thando yatchetcha ya Negebu). Yeneyi ndiye ikhali nthemba idapaswa dzinza ya Simioni kada banja kukhala yawo ene.

⁹Dziko idapaswa mabanja a dzinza ya Simioni ikhali khundu ibodzi ya dzinza ya Yuda. Dzikoyi idakwatwa kubuluka m'manja mwa dzinza ya Yuda, thangwi dziko ya Yudayo ikhali ikulu pyakwanga mwakuti khundu inango hakhaiphatisa basa tayu. Natenepo dzinza ya Simioni idatambira dziko yawo m'bwalo mwa dziko ya Yuda.

¹⁰Ntsango yachitatu idachitika mbigwera mabanja a Zebuloni. Madire a dziko yawo adenderatu mpakana ku Saridi.

¹¹Kubuluka penepo adadza ku Mareala kumabulukiro dzuwa mbafika ku Dabesheti na kumkhwawa chifupi na Yokoneamu.

¹²Kubuluka ku Saridi adazungunukira kumadokero dzuwa a dziko ya Kisiloti-Tabori mbathimiza kwenda ku Daberati na ku Yafia.

¹³Kubuluka penepo adathimiza pontho kwendera ku kumabulukiro dzuwa ku Gati Hefere na Etikazini mbafika pa Rimoni mbazungunuka pontho kuyang'ana Nea.

¹⁴Kubuluka penepo madire akumpoto adazungunukira ku Hanatoni mbamalisira paphedi ya Ifitaele.

¹⁵Adathimizapo Katati, Nahalali, Shimironi, Idala na Betelehemu. Onsene pabodzi akhali maluwani khumi na mawiri pontho na midzi yawo.

¹⁶Maluwani enewa pabodzi pene na midzi yawo ndiye idapaswa dzinza ya Zebuloni kada banja kukhala yawo ene.

¹⁷Ntsango yachinayi idachitika mbigwera mabanja a dzinza ya Isakara.

¹⁸Nthemba yawo idathimizirapo; Yezereele, Kesuloti, Shunemu,

¹⁹Hafaraimu, Shioni, Anaharati,

²⁰Rabiti, Kishioni, Ebezi,

²¹Remeti, Eni-Ganimu, Enihada na Beti-Pazezi.

²²Madire awo adafika ku Tabori, Shahazuma na Beti-Shemeshi mbadolomera pamkulo wa Yorodani. Pakhali maluwani khumi na matanthatu pabodzi pene na midzi yawo.

²³Maluwani na midzi yeneyi ndiye idapaswa dzinza ya Isakara kada banja kukhala yawo ene.

²⁴Ntsango yachishanu idachitika mbigwera mabanja a dzinza ya Asheri.

²⁵Nthemba yawo idathimizapo; Helekati, Hali, Beteni, Akishafu,

²⁶Alameleki, Amadi na Mishali. Madire awo akumadokero dzuwa adafika ku Karimele na Shihori-Libinati.

²⁷Kubuluka penepo adazungunukira kumabulukiro dzuwa kwendera ku Beti-Dagoni mbafika ku Zebuloni na phedi ya Ifitaele. Kubuluka penepo adenda kumpoto ku Beti-Emeki na Neilo, mbagwanda na ku Kabulu kumabzere kwache.

²⁸Kubuluka penepo adenda ku Ebroni, Rehobu, Hamoni na Kana mpakana ku Sidoni Wamkulu.

²⁹Kubuluka penepo madire adazungunukira m'nduli kuyang'ana ku Rama mbaenda kumzinda wa Turo wakutchingwa na mpanda; kubuluka penepo madire adazungunuka kuyang'ana ku Hosa mbafika ku Bara ya Mediterania. Madirewo adathimizapo Mahalabu, Akizibu,

³⁰Uma, Afeki, na Rehobu. Onsene pabodzi akhalipo maluwani makumawiri na mawiri pabodzi pene na midzi yawo yakuzungulira.

³¹Maluwani na midzi yeneyi ndiye idapaswa dzinza ya Asheri kada banja kukhala yawo ene.

³²Ntsango yachitanthatu idachitika mbigwera mabanja a dzinza ya Nafitali.

³³Madire awo adatomera ku Helefu na kumuti ukulu mu Zaananimu mbagwanda na pa Adaminekebu na Yaminia mpakana ku Lukumu mbadolomera pamkulo wa Yorodani.

³⁴Kubuluka penepo madire ale adenda kumadokero dzuwa kupita na pa Azinoti-Tabori mbafika pa Hukoki. Madirewo adatsamira pontho nthemba ya Zebuloni kumwera kwache, nthemba ya Asheri kumadokero dzuwa, pontho na mkulo wa Yorodani[9] kumabulukiro dzuwa.

³⁵Maluwani akutchingwa na mpanda akhali Zidimu, Zeri, Hamati, Rakati, Kinereti,

³⁶Adama, Rama, Hazori,

³⁷Kedeshi, Edrei, Enihazori,

³⁸Yironi, Migidalele, Horemu, Beti-Anati na Beti-Shemeshi. Pakhali maluwani khumi na mafemba pabodzi pene na midzi yawo.

³⁹Maluwani na midzi yeneyi ndiye idapaswa dzinza ya Nafitali kada banja kukhala yawo ene.

⁴⁰Ntsango yachinomwe idachitika mbigwera mabanja a dzinza ya Dani.

⁴¹Nthemba yawo idathimizirapo: Zora, Eshitaoli, Irishemeshi,

⁴²Shaalibimu, Aialoni, Itila,

⁴³Eloni, Timina, Ekroni,

⁴⁴Eliteke, Gibetoni, Baalati,

⁴⁵Yehudi, Bene-Beraki, Gati-Rimoni,

⁴⁶Meyarikoni na Rakoni pabodzi pene na nthemba yakuyang'anisana na Yopa.

⁴⁷Mbwenye anthu a dzinza ya Dani adaona nyatwa ikulu kuti apokosere nthemba zawo. Natenepo iwo adenda ku Leshemu kapokosera mudzi onsene ule. Iwo adapha anthu onsene a mwenemo mbakhalamo ndiwo. Iwo adakhazikika mu Leshemu mbatchandula dzina ya mzindawo mbauthula Dani, dzina ya kholo wawo.

⁴⁸Maluwani na midzi yeneyi ndiye idapaswa dzinza ya Dani kada banja kukhala yawo ene.

⁴⁹Pidamala iwo gwandirana dziko ile, Aisraele adapereka khundu inango ya dziko yawo kuna Yoswa mwana Nuni kuti ikhale yache ene,

⁵⁰Ninga montho mudalongera MBUYA. Iwo adampasa luwani idapempha iye, luwani ya Timinati Sera m'nthemba ya mapiri a Eferemu. Natenepo iye adamanga luwani yache mbakhazikika kweneko.

⁵¹Zenezi ndiye zikhali mbuto zidaperekwa na Eleazara nyansembe, Yoswa mwana Nuni na akulu-akulu a Israele kuna madzinza a Israele pakuchita ntsango[10] pamaso pa MBUYA pamsuwo wa Chikhumbi cha Mulungu mu Shilo. Tenepo iwo adamalisa kugawa dziko ile.