Read cisena YOSWA 22 Bible Online

YOSWA 22 - cisena bible

YOSWA 22

¹Kubuluka penepo Yoswa adachemera anthu onsene a madzinza a Rubeni, Gadi na Manase wakumabulukiro dzuwa

²mbalonga kuna iwo mbati, “Imwe mwachita pyonsene pidakupangani Mose nyabasa wa MBUYA, pontho mwavera matongero anga onsene.

³Kutomera ndzidzi wenewo kufikirana lero imwe nee mwaasiya okha ene Aisraele anzanuwa tayu. Imwe mwakhulupirika kuphata basa yonsene idakupasani MBUYA Mulungu wanu.

⁴Tenepo podi MBUYA Mulungu wanu apereka kuna abale anu mbuto yakukhazikika ninga montho mudadumbira iye, imwe munakwanisa kubwerera pyanu kumisa kwanu kunthemba idakupasani Mose nyabasa wa MBUYA kumabulukiro dzuwa a mkulo wa Yorodani ule.

⁵Kwache chitani mphole-mphole kukoya matongero na mwambo pidakupasani Mose nyabasa wa MBUYA ule: kumfuna MBUYA Mulungu wanu, kuchita pyonsene pinafuna iye, kuvera matongero ache, kukakamira pana iye na kumtumikira na mtimanu onsene pontho na moyo wanu onsene.”

⁶Kubuluka penepo Yoswa adaatsanzayisa mbaagwinya kwawo. Tenepo iwo adenda kwawo.

⁷Kuna dzinza ya Manase wakumabulukiro dzuwa Mose akhadapereka nthemba mu Bashani. Pontho kuna khundu inango ya dzinza ya Manase Yoswa adapereka nthemba kumadokero dzuwa a mkulo wa Yorodani pabodzi pene na Aisraele anzawo. Pandzidzi ukhaapanga Yoswa kubwerera kwawo, iye adaatsanzayisa

⁸mbalonga mbati, “Bwererani kunthemba kwanu na mfumanu ene; pifuyo pizinji, siliva, golidi, nkuwa na simbi, pontho na nguwo zizinji. Kagawaneni na abale anu pinthu pidapokosera imwe anyamalwanu.”

⁹Tenepo madzinza a Rubeni, Gadi na Manase wakumabulukiro dzuwa adalamuka mbaasiya Aisraele anzawo pa Shilo m'dziko ya Kanani kubwerera ku Gileadi nthemba yawo ene, idakwata iwo malingana na matongero a MBUYA kudzera muna Mose ile.

¹⁰Pidafika madzinza a Rubeni, Gadi na Manase wakumabulukiro dzuwa pa Geliloti, kumadokero dzuwa[12] a mkulo wa Yorodani, adamanga guwa yansembe ikulu pyakwanga chifupi na mkulo wa Yorodani.

¹¹Pikhadapiva Aisraele kuti iwo akhadamanga guwa yansembe m'madire a Kanani pa Geliloti chifupi na mkulo wa Yorodani kukhundu ya Aisraele,

¹²Aisraele onsene adagumanyikana pa Shilo kuti akachite nawo nkhondo.

¹³Natenepo Aisraele adatuma Finiasi mwana Eleazara, nyansembe kwenda kunthemba ya Gileadi kuna madzinza a Rubeni, Gadi na Manase wakumabulukiro dzuwa.

¹⁴Iye adatumizwa pabodzi pene na akulu-akulu khumi, munthu mbodzi kada dzinza, pontho iwo onsene akhali akadamu a mabanja pakati pa madzinza a Aisraele.

¹⁵Pidafika iwo ku Gileadi kuna madzinza a Rubeni, Gadi na Manase wakumabulukiro dzuwa, adalonga kuna iwo mbati,

¹⁶“Gulu yonsene ya anthu a MBUYA yalonga kuti, ‘Mwachitiranji chinthu chakuipa ninga chenechi kupokanyisana na Mulungu wa Israele? Imwe mwapandukira MBUYA pakupimangira mwekha ene guwa yansembe! Imwe mwabauka kubuluka kuna iye.

¹⁷Kumbukani kudawa kudachita ife pa Peori, pidatchunyusa MBUYA anthu ache na muliri? Na lero ife tikubonera basi thangwi ya pinthu pene pile. Ayi kudawa kwene kule hakudakwane tayu?

¹⁸Kani imwe lero munafuna kubauka kubuluka kuna iye? Ngakhala imwe lero munampandukira MBUYA, mangwana iye anati azhangalire anthu onsene mu Israele.

¹⁹Ngakhala dziko yanu si yakuthema tayu kupembedzeramo MBUYA, apo idzani m'dziko ya MBUYA, mule mumbakhala Chikhumbi cha Mulungu. Idzani tidzagawane mbuto zinango pakati pathu. Kwache lekani kupandukira MBUYA penu kupandukira ife pakupimangira mwekha ene guwa inango ya nsembe padzulu pa guwa yansembe ya MBUYA Mulungu wathu.

²⁰Kumbukani pidachitika pile ndzidzi udakhonda Akani mwana Zera kuvera matongero a pya pinthu pidathema kuvungwa pile; gulu yonsene ya Israele idatchunyuswa thangwi ya penepyo. Si Akani yekha adafa thangwi ya kudawa kwacheko tayu.’ ”

²¹Anthu a madzinza a Rubeni, Gadi na Manase wakumabulukiro dzuwa adaatawira akulu-akulu adabulukira kuna madzinza a Israele akumadokero dzuwa ale mbati,

²²“Nyamphamvu zonsene ndi Mulungu! Iye ndi MBUYA! Nyamphamvu zonsene ndi Mulungu! Iye ndi MBUYA. Iye ambadziwa thangwi yache idachitira ife penepi, pontho ife tafuna kuti imwe muidziwembo thangwi yache! Ngakhala ife tidapandukira MBUYA mbatikhonda kumvera, lero tipheni pyanu mbatilekeve khala na moyo.

²³Ngakhala ife tidakhonda vera MBUYA mbatimanga guwa yathu ene yakuperekerapo pyakupereka pyakupyerera, penu pya mapira penu pyachiphatizano, MBUYA mwenechiroache mbatitchunyuse.

²⁴Nkhabe tayu! Ife tidachita tenepo thangwi tikhagopa kuti mwinango m'tsogolo muno pidzukulu pyanu pinakwanisa dzalonga kuna pidzukulu pyathu kuti, ‘Ayi imwe, MBUYA, Mulungu wa Israele munaenji?

²⁵Iye adachitisa mkulo wa Yorodani kukhala madire a pakati pa ife na anthu a madzinza a Rubeni na Gadi. Imwe nkhabe pinthu na MBUYA tayu!’ Penepo pidzukulu pyanu pinachitisa pidzukulu pyathu kuleka kupembedza MBUYA.

²⁶Natenepo ife tidamangapo guwa nee na mtima wakufuna kuperekerapo pyakupereka pyakupyerera penu pyakupereka pinango tayu,

²⁷mbwenye na mtima wakufuna kuti guwayo ikhale chidzindikiro kuna anthu athu na kuna anthu anu, pontho kuna mifendu yonsene inadzayo kuti ife timbapembedza MBUYA pa Chikhumbi chache chakupambulika na kuperekapo pyakupereka pyakupyerera, nsembe na pyakupereka pyachiphatizano. Tenepo m'tsogolo muno pidzukulu pyathu nee pinalonga tayu kuti, ‘Imwe nkhabe pinthu na MBUYA.’

²⁸Manyerezero athu akhali akuti ngakhala penepi pinachitika, pidzukulu pyathu pinakwanisa kulonga kuti, ‘Ngayang'anani! Makolo athu adasasanya guwa yansembe sasawa ninga guwa ya MBUYA. Yeneyi nee ikhali guwa yakuperekerapo pyakupereka pyakupyerera penu nsembe zinango tayu, mbwenye ikhali chidzindikiro kuna anthu athu na kuna anthu anu ene.’

²⁹Ife nkhabe kwanisa kupandukira MBUYA penu kubauka kubuluka kuna iye pakumanga guwa yathu ene yakuperekerapo pyakupereka pyakupyerera, pyakupereka pya mapira na nsembe zinango tayu. Ife nkhabe manga guwa inango ya nsembe padzulu pa guwa yansembe ya MBUYA Mulungu wathu ile ili patsogolo pa Chikhumbi chache tayu.”

³⁰Pidapiva Finiasi nyansembe na akulu-akulu khumi a Israele, ale akhali akadamu a mabanja a Aisraele, pidalonga anthu a madzinza a Rubeni, Gadi na Manase wakumabulukiro dzuwa, adakomerwa napyo pyakwanga.

³¹Tenepo Finiasi mwana Eleazara nyansembe adalonga kuna madzinza a Rubeni, Gadi na Manase wakumabulukiro dzuwa mbati, “Lero tapidziwadi kuti MBUYA ali nafe, thangwi pyachita imwepi nee mwapichita na manyerezero akufuna kupandukira MBUYA tayu. Natenepo mwapulumusa anthu onsene Aisraele kuna kutchunyuswa kukhafuna kuachita MBUYA.”

³²Kubuluka penepo Finiasi mwana Eleazara nyansembe pabodzi pene na akadamu a Aisraele ale, adabwerera ku Kanani pidamala iwo chita mgumano na madzinza a Rubeni, Gadi na Manase wakumabulukiro dzuwa mbakalonga pyonsene pile kuna Aisraele anzawo.

³³Pidava Aisraele anzawo ale penepi adakomerwa pyakwanga mbakuza Mulungu. Iwo hadalongeve pyakwenda kamenya nawo nkhondo kuvunga dziko ikhadakhazikika madzinza a Rubeni, Gadi na Manase wakumabulukiro dzuwa ile tayu.

³⁴Natenepo madzinza a Rubeni na Gadi adaithula guwa yansembe ile kuti: Umboni pakati pathu kuti MBUYA ndi Mulungu wathu.