Read cisena YOSWA 23 Bible Online

YOSWA 23 - cisena bible

YOSWA 23

¹Pidagwanda ndzidzi ukulu ene MBUYA adachitisa Aisraele kupuma kumenya nkhondo na anyamalwawo akuazungulira ale. Pandzidzi wenewo Yoswa akhadakalamba pyakwanga,

²natenepo adachemeresa akadamu onsene Aisraele, akulu-akulu, atongi a miseru na mathubu awo mu Israele mbalonga mbati, “Ine ndakalamba pyakwanga.

³Imwe mwaona pinthu pyonsene pyachita MBUYA Mulungu wanu kuna madzinza anangowa thangwi ya imwepo. MBUYA Mulungu wanu akukumenyerani nkhondo.

⁴Ine ndapereka kuna imwe mbuto yakusalira ya madzinza anangowa, ile idzati kundwa tayu kuti ikhale yanu ene pabodzi pene na mbuto za anthu anango, zile zakundwa kale, kutomera kumabulukiro dzuwa a mkulo wa Yorodani mpakana ku Bara ya Mediterania kumadokero dzuwa.

⁵MBUYA Mulungu wanu anaathamangisa pamaso panu. Iye anaagwinyira kunja pamaso panu. Tenepo imwe munakwata mbuto zawozo ninga montho mudalongera MBUYA Mulungu wanu.

⁶Natenepo chitani mphole-mphole kuvera pyonsene pyalembwa m'bukhu ya mwambo wa Mose pile. Lekani kuukhonda penu na khundu ene ibodzi ya mwambowo.

⁷Lekani phatizana na madzinza anango asalira pakati panuwa; lekani thula madzina a milungu yawo penu kuphatisa basa madzinawo kudumbira nawo. Lekani kuatumikira penu kualambira.

⁸Kwache imwe mwathema kukakamira pana MBUYA Mulungu wanu ninga munachitira imwe chinchinomu.

⁹MBUYA athamangisa madzinza akulu-akulu na amphamvu pamaso panu; pontho kufikirana lero nkhabe mbodzi akwanisa kuimisana namwe tayu.

¹⁰Munthu onsene wa imwe anakwanisa kuchitisa anthu pikwi kuthawa thangwi MBUYA Mulungu wanu ndiye akukumenyerani nkhondo ninga montho mudadumbira iye mule.

¹¹Kwache chitani mphole-mphole kumfuna MBUYA Mulungu wanu.

¹²Ngakhala imwe munakhonda kumvera mbamuphatizana na madzinza asalira pakati panu ale, papinthu pinachita iwo na kusemberana nawo,

¹³penepo munaona kuti MBUYA Mulungu wanu hanaathamangisave pamaso panu tayu. M'mbuto mwache iwo anasanduka akugoswa kuna imwe ninga msampha penu mlindi, pontho munava nawo kupha ninga mtswamu mungakwapulwa kunduli kwanu penu ninga minga kulasa m'maso mwanu. Penepi pinathimiza kuchitika mpakana monsenene mumale puluzika m'dziko yadidi yakupasani MBUYA Mulungu wanuyi.

¹⁴“Ndzidzi wanga wakuti ndife uli chifupi. Munthu onsene pakati panupa akudziwa mumtima mwache pontho m'moyo mwache kuti MBUYA Mulungu wanu akupasani pinthu pyonsene pyadidi pikhadadumbira iye pile. Pyonsene pidadumbira iye apichita; nkhabe chibodzi chachimwana iye tayu.

¹⁵Kwache ninga montho mwakwanisira iye kuchita pyonsene pidadumbira iye kuna imwe, natenepo iye anadzesa pyakuipa pyonsene kuna imwe pidathuswa iye pile mpakana monsenene amale kukuvungani m'dziko yadidi yakupasani iyeyi.

¹⁶Ngakhala imwe munakhonda kukoya chiverano chidakupangani MBUYA Mulungu wanu chile, pontho ngakhala imwe munatumikira na kupembedza milungu inango, iye anakuzhangalirani mbakutchunyusani, tenepo nee panasala munthu na mbodzi tayu m'dziko yadidi idakupasani iyeyi.”