Read cisena YOSWA 24 Bible Online

YOSWA 24 - cisena bible

YOSWA 24

¹Yoswa adagumanyisa pabodzi pene madzinza onsene a Aisraele a ku Shekemu. Iye adachemeresa akulu-akulu, akadamu, atongi a miseru na mathubu a mu Israele, tenepo iwo adadza pabodzi pamaso pa Mulungu.

²Yoswa adalonga kuna anthu onsene mbati, “Ipi ndiye pyalonga MBUYA Mulungu wa Israele kuti: ‘Kale ene makolo anu akhakhala kumtunda unango wa mkulo wa Yufurate mbapembedza milungu inango kweneko. Mbodzi wa makolo enewa akhali Tera, babache Abrahamu na Nahori.

³Kubuluka penepo ndidakwata Abrahamu kholo wanu kumbulusa m'dziko ya Yufurate mbandimtsogolera m'dziko yonsene ya Kanani. Ine ndidampasa pidzukulu pizinji. Ndidampasa Isake;

⁴tenepo Isake ndidampasambo Yakobo na Esau. Esau ndidampasa nthemba ya mapiri ya Edomu kuti ikhale yache ene, mbwenye Yakobo na anache adenda kudziko ya Iguputo.

⁵Kubuluka penepo ndidatuma Mose na Aroni mbandidzesa nyatwa zikulu pana anthu a ku Iguputo. Kwache ine ndidakubulusani basi.

⁶Ine ndidabulusa makolo anu m'dziko ya Iguputo, mbwenye anthu a ku Iguputo adaathamangira uku apakira pingolo pyawo pya nkhondo, pontho na pa akavalo awo. Mbwenye pidafika makolo anu panyanza Yakufira

⁷adalira kuna ine kuti ndiaphedze, tenepo ine ndidaikha makole akuswipa pakati pa iwo na anthu a ku Iguputo. Ine ndidachitisa nyanza ile kuabizika anthu a ku Iguputo. Imwe mukupidziwa pidachita ine kuna anthu a ku Iguputo. “‘Imwe mudakhala m'thando yatchetcha ndzidzi ukulu ene.

⁸Kubuluka penepo ndidakudzesani kudziko ya Aamori, akhakhala kukhundu yakumabulukiro dzuwa a mkulo wa Yorodani ale. Iwo adamenyana namwe, mbwenye ine ndidakuchitisani kuakunda. Imwe mudakwata dziko yawo, tenepo pikhapita imwe m'dzikomo ine ndidaavunga pyakwanga pene.

⁹Tenepo Mfumu wa ku Moabu, Balaki mwana Zipora adamenyana namwe. Iye adatumiza mphangwa kuna Balamu mwana Beori mbampempha kuti akutemberereni.

¹⁰Ine sidavesere pyakulonga pya Balamu tayu, m'mbuto mwache iye adakutsanzayisani. Na njira yeneyi ine ndidakupulumusani m'manja mwa Balamu.

¹¹Imwe mudawambuka mkulo wa Yorodani mbamufika ku Yeriko. Amuna a mu Yeriko pabodzi pene na Aamori, Aperizi, Akanani, Ahiti, Agirigashi, Ahivi na Ayebusi adamenyana namwe, mbwenye ine ndidakuchitisani kuakunda anthu onsenenewa.

¹²Pikhapita imwe m'dzikomo, anthu a mwenemo ndidaachitisa kukhala pampani-pani, towera ndithamangise mafumu mawiri a Aamori. Penepi nee mudapichita na matalasadanu penu mautanu tayu.

¹³Ine ndidakupasani mbuto yakuti si imwe mwailima, pontho mizinda yakuti si imwe mwaimanga tayu. Lero mukukhala mwenemo, pontho mukudya nsapo zamfesa zakuti si imwe mudazibzala tayu, pontho na nsapo zaolivi zakuti si imwe mudazibzala tayu.’ ”

¹⁴Yoswa adathimiza kulonga mbati, “Natenepo mulemedzeni MBUYA mbamumtumikire mwakukhulupirika na mtimanu onsene. Lekani pembedza milungu ikhapembedza makolo anu m'dziko ya Mesopotamia na Iguputo ile mbamutumikira MBUYA ene basi.

¹⁵Ngakhala imwe nkhabe funa tayu kutumikira MBUYA, lero sankhulani anafuna imwe kutumikira, milungu ikhapembedza makolo anu m'dziko ya Mesopotamia, penu milungu ya Aamori, ale mbanachiroache dziko inakhala imweyi. Mbwenye kulonga pya ine na banjanga tinati titumikire MBUYA.”

¹⁶Anthu adatawira mbati, “Pili kutali pyakwanga na ife kusiya kutumikira MBUYA mbatitumikira milungu inango.

¹⁷MBUYA Mulungu wathu adabulusa makolo athu pabodzi na ife ene paubitchu m'dziko ya Iguputo, pontho ife tidaona pyakudodomesa pidachita iye. Iye adatikoya mwadidi konsene kudafamba ife pakati pa madzinza anango mukhagwanda na ife mule.

¹⁸Pikhapita ife m'dziko muno MBUYA adathamangisa Aamori na anthu onsene akhakhala muno ale, tenepo na ife enembo tinatumikira MBUYA; thangwi iye ndi Mulungu wathu.”

¹⁹Yoswa adalonga kuna anthu ale mbati, “Mwinango nee munakwanisa kumtumikira MBUYA tayu, iye ndi MBUYA wakuchena pontho wantchanje. Iye nkhabe dzalekerera kupandukira pontho kudawa kwanu tayu.

²⁰Ngakhala munamsiya mbamutumikira milungu yachilendo, iye anakupasani nkhodolo mbakutchunyusani. Iye anakuvungani podi kwene akhali wadidi kuna imwe pakutoma.”

²¹Anthu ale adatawira mbati, “Nkhabe! Ife tinatumikira MBUYA.”

²²Yoswa adalonga kuna iwo mbati, “Imwe ene enechiroache ndimwe mboni zakuti mwasankhula kutumikira MBUYA.” Iwo adatawira mbati, “Ande, ndife mboni!”

²³Yoswa adaapanga mbati, “Bulusani mphapo milungu yachilendo ina imweyi pontho piperekeni na mtima onsene kuna MBUYA Mulungu wa Israele.”

²⁴Kubuluka penepo anthu ale adalonga kuna Yoswa mbati, “Ife tinatumikira MBUYA Mulungu wanu. Ife tinavera matongero ache.”

²⁵Natenepo Yoswa adasasanya chiverano na anthu ale pansiku yeneyo, pontho pa Shekemu pale iye adapereka mwambo na matongero kuna anthu kuti apiteweze.

²⁶Yoswa adalemba matongero enewa m'bukhu ya mwambo wa Mulungu. Kubuluka penepo adakwata mwala ukulu mbauimisa patchinde pamuti wamthundu chifupi na mbuto yakuchena ya MBUYA.

²⁷Iye adalonga kuna anthu onsene mbati, “Mwala wenewu unakhala umboni pakati pa imwe na ine. Mwalawu wava pyonsene pyalonga MBUYA kuna ife. Natenepo unakhala mboni yakupokanyisana namwe kuti muleke pandukira Mulungu.”

²⁸Tenepo Yoswa ule adagwinya anthu ale kumbuto zawo, kada munthu kubwerera kumbuto yache.

²⁹Kubuluka penepo nyabasa wa MBUYA, Yoswa mwana Nuni adafa uku ana pyaka dzana na khumi.

³⁰Anthu ale adamuikha m'masiye pambuto yache ene ku Timinati Sera m'nthemba ya mapiri ya Eferemu kumpoto kwa phiri ya Gaashi.

³¹Aisraele adatumikira MBUYA pandzidzi onsene ukhali Yoswa na moyo pontho na pandzidzi onsene ukhali akadamu a Aisraele na moyo, ale akhadaona pyonsene pidachita MBUYA kuna Aisraele.

³²Mtembo wa Yosefe, ule ukhadabwerera na Aisraele kubulukira ku Iguputo adauikha m'masiye a pa Shekemu, mbuto ikhadagula Yakobo kuna ana Hamori babache Shekemu na kobiri zasiliva dzana ibodzi. Mbuto yeneyi idaperekwa kuna pidzukulu pya Yosefe kukhala yawo ene.

³³Eleazara mwana Aroni adafa mbaikhwa m'masiye pa Gibea, luwani ya mu Eferemu m'nthemba ya mapiri, ikhadaperekwa kuna mwanache Finiasi ile.