Read cisena YOSWA 3 Bible Online

YOSWA 3 - cisena bible

YOSWA 3

¹Bzobzo mangwana mwache Yoswa na Aisraele onsene adabuluka mumsasa pa Kesha mbaenda kamanga msasawo kukhundu inango ya mkulo wa Yorodani kudikhira kuwambuka.

²Pidagwanda nsiku zitatu akadamu a Aisraele adenda mumsasa monsene mule,

³mbapanga anthu mbati, “Mungaona Bokosi ya Chiverano ya MBUYA Mulungu wanu yathukulwa na anyansembe a Chilevi, imwe mwathema kulamuka pana imwepo mbamuitewere.

⁴Tenepo munadziwa njira inafuna dzaenda na ife, thangwi chipo imwe nee mudzati pita na njira yeneyi tayu. Kwache pakati pa imwe na Bokosiyo pakhale mpata wakukwana mathanyo madzana mafemba; lekani kuifikira chifupi.”

⁵Yoswa adapanga anthu ale mbati, “Picheneseni mwekha ene pamaso pa MBUYA, thangwi iye anachita pyakudodomesa mangwana pakati panu.”

⁶Yoswa adalonga kuna anyansembe mbati, “Thukulani Bokosi ya Chiverano ya MBUYA mbamuende patsogolo pa anthu.” Natenepo iwo adaithukula mbapita patsogolo pawo.

⁷MBUYA adalonga kuna Yoswa mbati, “Lero ndinatoma kukukwiza pamaso pa Aisraele onsene, towera iwo adziwe kuti ine ndili nawe ninga mudakhalira ine na Mose.

⁸Panga anyansembe athukula Bokosi ya Chiveranowo kuti angafika m'khundu-khundu mwa mkulo wa Yorodani, akagwere m'madzimo.”

⁹Yoswa adalonga kuna Aisraele mbati, “Bwerani kuno muve mafala a MBUYA Mulungu wanu.

¹⁰Umu ndi mule munafunira imwe kudziwa kuti Mulungu wa moyo ali pakati panu pontho kuti anathamangisa Akanani, Ahiti, Ahivi, Aperizi, Agirigashi, a Aamori na Ayebusi uku mukuona maso.

¹¹Bokosi ya Chiverano ya Mbuya wa dziko yonsene yapansi yathema kupita patsogolo panu pinawambuka imwe mkulo wa Yorodani.

¹²Tenepo sankhula amuna khumi na awiri akubulukira m'dzinza ya Israele, munthu mbodzi kada dzinza.

¹³Tenepo sindzidzi anyansembe ale adathukula Bokosi ya Chiverano ya MBUYA, Mbuya wa dziko yonsene yapansi nkhuponda m'madzimo, mkulo unaleka kufamba, tenepo madzi akubulukira kumtunda anamulukana pabodzi-bodzi.”

¹⁴Natenepo pidafuluka anthu pamsasa pale kuwambuka mkulo wa Yorodani anyansembe, ale adathukula Bokosi ya Chiverano adapita patsogolo pawo.

¹⁵Mkulo wa Yorodani umbakuka ndzidzi onsene wa wakuvuna, kwache sindzidzi anyansembe adathukula Bokosi ile nkhufika pamkulo wa Yorodani mbapondesa manyalo awo m'khundu-khundu mwa madzi mule,

¹⁶madzi akubulukira kumtunda adaleka kufamba. Iwo adamulukana kutali pyakwanga pa Adamu kumtunda kwa mkulo, mzinda wa chifupi na Zaretani. Mwenemo madzi akuphedi kwa mkulo akhagwera m'Nyanza Yakufa ale adagwandikiratu. Natenepo anthu adakwanisa kuwambuka mkulowo chifupi na Yeriko.

¹⁷Anyansembe, ale adathukula Bokosi ya Chiverano ya MBUYA adaimira dzololo pakuuma kati na kati ya mkulo wa Yorodani uku Aisraele akugwanda mpakana dzinza yonsene ya Israele idamala kuwambuka na pakuuma.