Read cisena YOSWA 4 Bible Online

YOSWA 4 - cisena bible

YOSWA 4

¹Pikhadamala dzinza yonsene kuwambuka mkulo wa Yorodani ule, MBUYA adalonga kuna Yoswa mbati,

²“Sankhula amuna khumi na awiri pakati pa anthuwo, munthu mbodzi kada dzinza

³mbuapange kuti alokote miyala khumi na miwiri kubulukira pa kati na kati ya mkulo wa Yorodani kukhundu yakumadyo paimira anyansembepo, pontho aithukule kwenda nayo pabodzi mbakaiikhe pambuto panafuna imwe kagona mosiku uno.”

⁴Natenepo Yoswa adachemeresa pabodzi amuna akhadasankhula iye pakati pa Aisraele ale, munthu mbodzi kada dzinza,

⁵mbalonga kuna iwo mbati, “Ndokoni pana Bokosi ya Chiverano ya MBUYA Mulungu wanu kati na kati ya mkulo wa Yorodani. Munthu onsene akathukule mwala ubodzi paphewa pache malingana na konta ya madzinza a Israele,

⁶kuti ikhale chikumbuso pakati panu. M'tsogolo muno ananu angakuvunzani kuti, ‘Ayi miyala yeneyi ikufuna kulonganji?’

⁷Apangeni kuti madzi a mkulo wa Yorodani adaleka kufamba pamaso pa Bokosi ya Chiverano ya MBUYA; pidawambuka iyo Yorodani, madzi a mumkulomo adagwandika. Miyala yeneyi ntchikumbuso kuna Aisraele kwenda na kwenda.”

⁸Tenepo Aisraele ale adachitadi ninga montho mudaapangira Mose. Iwo adalokota miyala khumi na iwiri ile kubulukira pa kati na kati ya mkulo wa Yorodani malingana na konta ya madzinza a Aisraele ninga montho mukhadalongera MBUYA kupanga Yoswa; mbaithukula kwenda nayo kumsasa kwawo, kule kudaitula iwo pansi.

⁹Yoswa adamuluka miyala ile kati na kati ya Yorodani pambuto chadi-chadi pakhadaimira anyansembe adathukula Bokosi ya Chiverano ya MBUYA ale. Miyala yeneyo ili penepo basi na lero.

¹⁰Anyansembe adathukula Bokosi ale adaimira dzololo kati na kati ya Yorodani mpakana pyonsene pidalonga MBUYA kuna Yoswa pidachitwa ninga montho mudachitira Mose kufunzisa Yoswa.

¹¹Anthu adachimbiza kuwambuka, tenepo sindzidzi anthu nkhupandira, anyansembe pabodzi pene na Bokosi ya MBUYA adadza kukhundu inango ya Yorodani uku gulu yonsene ikuyang'ana.

¹²Amuna a madzinza a Rubeni, Gadi na Manase wakumabulukiro dzuwa akusasanyika kamenya nkhondo adawambukambo mbakhala patsogolo pa Aisraele ninga mudaapangira Mose.

¹³Chifupi-fupi amuna pikwi makumanayi adawambuka pamaso pa MBUYA kwenda kumaphedi a Yeriko akusasanyika kamenya nkhondo.

¹⁴Pansiku yeneyo MBUYA adakwiza Yoswa pamaso pa Aisraele onsene; tenepo iwo adamulemedza Yoswa nsiku zonsene za moyo wache ninga montho mudalemedzera iwo Mose.

¹⁵Tenepo MBUYA adalonga kuna Yoswa mbati,

¹⁶“Panga anyansembe akuthukula Bokosi ya Chiverano ya MBUYA kuti abulukemo mumkulomo.”

¹⁷Natenepo Yoswa adapanga anyansembe ale mbati, “Bulukanimo mumkulomo.”

¹⁸Anyansembe adabulukamo mumkulo uku athukula Bokosi ya Chiverano ya MBUYA. Sindzidzi manyalo a anyansembe nkhuponda pamtunda madzi ale adabwerera m'mbuto mwache mbatoma kufamba ninga mwakale mwakutayikira.

¹⁹Pansiku yachikhumi ya mwezi wakutoma anthu adabuluka pa Yorodani mbakamanga msasawo pa Giligala kumabulukiro dzuwa a Yeriko.

²⁰Tenepo pa Giligala Yoswa adamuluka miyala khumi na miwiri idakwata iwo mumkulo mule.

²¹Iye adalonga kuna Aisraele mbati, “M'tsogolo muno pidzukulu pyanu pingavunza makolo awo kuti penepi pikulonganji

²²apangeni pya ndzidzi udawambuka Aisraele mkulo wa Yorodani pakuuma.

²³Thangwi MBUYA Mulungu wanu adaumisa mkulo wa Yorodani pamaso panu mpakana imwe mudawambuka. MBUYA Mulungu wanu adachita kuna mkulo wa Yorodani ninga montho mukhadachitira iye kuna Nyanza Yakufira pidaiumisa iye pamaso pathu mpakana ife tidawambuka.

²⁴Na thangwi ya penepi anthu onsene a padziko yapansi anapidziwa kuti mkono wa MBUYA ngwamphamvu. Tenepo imwe ndzidzi onsene munagopa MBUYA Mulungu wanu.”