Read cisena YOSWA 5 Bible Online

YOSWA 5 - cisena bible

YOSWA 5

¹Mafumu onsene a Aamori akukhala kumadokero dzuwa a mkulo wa Yorodani na mafumu onsene a Akanani akukhala m'khundu-khundu mwa Bara ya Mediterania adava kuti MBUYA akhadaumisa mkulo wa Yorodani mpakana anthu onsene Aisraele adawambuka. Iwo adanyunguluka na mantha pikulu mbataya mtima thangwi ya Aisraele.

²Tenepo MBUYA adalonga kuna Yoswa mbati, “Sasanya mipeni yamiyala mbuchite pontho mwambo wakugwanda Aisraele nsonga yachimuna.”

³Natenepo Yoswa adachitadi ninga montho mukhadampangira MBUYA mbagwanda nsonga zachimuna za Aisraele, pambuto yakuchemerwa “Phiri yakugwandwa nsonga yachimuna.”

⁴Pikhabuluka Aisraele m'dziko ya Iguputo amuna onsene akhali akugwandwa kale nsonga yachimuna. Mbwenye pyaka makumanayi pikhafamba Aisraele kugwanda na m'thando yatchetcha mule, nkhabe ana achimuna adabalwa mwenemo adagwandwa nsonga yachimuna tayu, pontho kumamalisiro a ndzidzi wenewo amuna onsene, ale akhafika thunga yakumenya nkhondo pikhabuluka iwo mu Iguputo, akhadafa thangwi iwo hadamvere MBUYA tayu. Ninga montho mukhadadumbira MBUYA, iwo hadatawiriswe kupita tayu m'dziko yamphonje, ikhadadumbira MBUYA kuna makolo awo ile.

⁷Ana a anthu enewa hakhadagwandwa tayu, tenepo Yoswa adagwanda mfendu wenewu.

⁸Pidamalisa iye kuagwanda, dzinza yonsene ya Israele idakhala m'makumbi mwawo mpakana pironda pya amuna ale pidapola.

⁹MBUYA adalonga kuna Yoswa mbati, “Lero ndakubulusirani manyadzo akukhala mabitchu m'dziko ya Iguputo.” Ndi thangwi yache mbuto ile idathulwa Giligala,[1] mwakuti na lero dzina yeneyi ilipo.

¹⁰Pikhali Aisraele mumsasa pa Giligala paphedi inango chifupi na Yeriko, iwo adadya phwando ya Paska na mawulo a nsiku yakhumi na chinayi ya mwezi wenewo.

¹¹Mangwana mwache, pidagwanda Paska, ikhali nsiku yawo yakutoma kudya phoso yakulimwa mu Kanani: mapiramanga akuotcha na mikate yakusowa chakufufumisira.

¹²Kubulukira nsiku yonthoyo mana adaleka kugwa, natenepo Aisraele hadadyeve mana tayu. Kutomera ndzidzi wenewo kwenda m'tsogolo iwo akhadya phoso yakulimwa mu Kanani.

¹³Pikhali Yoswa chifupi na Yeriko vumbu-vumbu adaona munthu ali dzololo kutsogolo kwache uku aphatira talasada m'manja mwache. Yoswa adenda kuna iye mbamvunza mbati, “Ayi iwe ndiwe mbodzi wa ife penu ndiwe nyamalwathu?”

¹⁴Munthu ule adatawira mbati, “Nkhabe, ine ndine mkadamu wa anyankhondo a MBUYA.” Yoswa adapigwisa na fufumimba kumpembedza mbalonga mbati, “Ine ndine nyabasanu Mbuya, mwadza na mphangwa zanji kuna ine?”

¹⁵Mkadamu wa anyankhondo a MBUYA adamtawira mbati, “Dula nkhwaira zako, thangwi mbuto yaimira iweyo njakuchena.” Tenepo Yoswa adachitadi pidapangwa iyepyo.