Read cisena YOSWA 6 Bible Online

YOSWA 6 - cisena bible

YOSWA 6

¹Misuwo ya mpanda wa Yeriko ikhakhala mbifungwa pontho yakulondalwi mwadidi, towera Aisraele aleke kupitamo. Nkhabe mbodzi akhakwanisa kupita penu kubuluka mumzindamo tayu.

²MBUYA adalonga kuna Yoswa mbati, “Yang'ana, ndikuikha m'manja mwako Yeriko, mfumu wa mwenemo, pabodzi pene na anyankhondo ache akuwanga mtima ale.

³Iwe pabodzi pene na anyankhondo ako mwathema kufamba pamulikiti kuzungulira mzindawu nsiku zitanthatu kabodzi pansiku.

⁴Anyansembe anomwe, kada munthu athukule ngomache athema kwenda patsogolo pa Bokosi ya Chiverano. Pansiku yachinomwe iwe pabodzi pene na anyankhondo ako mwathema kuzungulira mzindawo pamulikiti kanomwe uku anyansembe akuliza ngoma zawo.

⁵Kubuluka penepo iwo alize ngomazo pabodzi pene mwakugaluza pontho mwakukhonda lekeza. Sindzidzi iwe nkhuva penepi, anthu onsene athema kukhuwa, penepo pene mafufu a mzindawo anagwa. Tenepo anyankhondo onsene anapitiratu mumzindamo.”

⁶Yoswa adachemera anyansembe mbalonga kuna iwo mbati, “Thukulani Bokosi ya Chiveranoyi, pontho anomwe a imwe aende patsogolo uku athukula ngoma.”

⁷Kubuluka penepo iye adapanga amunache ale kuti atome kuzungulira mzindawo pamulikiti uku anyankhondo akusasanyika mwadidi ali patsogolo pa Bokosi ya Chiverano ya MBUYA.

⁸Natenepo ninga mukhadatongera Yoswa, anyankhondo akusasanyika mwadidi ndiye adatoma mbakhala patsogolo pa anyansembe akuliza ngoma zawo ale; m'nduli mwawo mukhali anyansembe akuthukula Bokosi ya Chiverano ya MBUYA ale; m'nduli mwawo mukhali anyankhondo anango. Ndzidzi onsenewu ngoma zikhalizwa.

¹⁰Mbwenye Yoswa akhadapanga amunache kuti aleke khuwa penu kubulusa fala mpakana iye aapange kuchita tenepo.

¹¹Natenepo iye adapanga gulu ya amuna ale kuthukula Bokosi ya Chiverano ya MBUYA kuti azungulire nayo mzindawo kabodzi basi. Kubuluka penepo iwo adabwerera kumsasa kwawo mbagona kweneko.

¹²Bzobzo mangwana mwache Yoswa adalamuka mbazungulira kachiwiri mzindawo pabodzi pene na anyansembe ninga montho mudachitira iwo dzulo mwache: chakutoma anyankhondo akusasanyika mwadidi; kubuluka penepo anyansembe anomwe akuliza ngoma; kubuluka penepo anyansembe akuthukula Bokosi ya Chiverano ya MBUYA; pontho pakumalisira pache anyankhondo anango. Ndzidzi onsenewu ngoma zikhalizwa.

¹⁴Pansiku yachiwiri iwo adazungulira pamulikiti pontho mzindawo kabodzi basi mbabwerera kumsasa kwawo. Iwo adachita penepyo nsiku zitanthatu.

¹⁵Pansiku yachinomwe iwo adalamuka na machibese mbazungulira pamulikiti mzindawo kanomwe na njira yontho-yonthoyo; ikhali nsiku yonthoyi basi idazungulira iwo kanomwe pamulikiti.

¹⁶Kachinomweka, pidaliza anyansembe ngoma zawo, Yoswa adapanga anthu ache mbati, “Khuwani! Thangwi MBUYA akupasani mzindawu.

¹⁷Mzindawu na pyonsene pili mwenemo pyathema kuvungwa monsene mwene kukhala nsembe kuna MBUYA. Mbwenye puta Rahabi ene basi na onsene ali m'nyumba mwache ale athema kukhonda phiwa, thangwi iye adabisa anyakuzondathu.

¹⁸Mbwenye pinthu pyathema kuvungwa pile, lekani kupikwata; ngakhala munapikwata munapidzesera nyatwa na kuvungika kwene kuna Aisraele onsene mumsasa mule.

¹⁹Pyonsene pyakusasanywa na siliva penu golidi penu nkuwa penu simbi pikhale pyakupambulika kuna MBUYA. Penepyo piikhwe mumbakoyerwa pinthu pya MBUYA mule.”

²⁰Natenepo anyansembe adaliza ngoma. Sindzidzi amuna anango ale nkhuva ngomazo, iwo adakhuwa pikulu pene. Penepo mpanda udagwa. Kubuluka penepo anyankhondo adapitiratu mumzinda mule mbaukunda.

²¹Iwo adapha amuna, akazi, ana na nkhalamba zene pakuphatisa basa matalasadawo. Iwo adapha pontho ng'ombe, mabira na mabulu.

²²Kubuluka penepo Yoswa adapanga amuna awiri adenda kazonda dziko ale mbati, “Pitani m'nyumba ya putayi mbamukabulusemo iye pabodzi pene na banjache ninga mudadumbira imwe kuna iye.”

²³Natenepo iwo adenda mbabulusira kunja Rahabi, pabodzi pene na babache, mache, nkhoswe zache pontho na onsene a pabanja pache. Iwo adakwata onsene a pabanja pache mbakaaikha chifupi na msasa wa Aisraele kuti atchinjirizwe.

²⁴Kubuluka penepo adaupisa mzinda onsene ule pabodzi pene na pyonsene pikhali mwenemo, kupambula pinthu pyakusasanywa na siliva, golidi, nkuwa na simbi pile pidakwata iwo mbapiikha mumbakoyerwa pinthu pya MBUYA pile.

²⁵Mbwenye Yoswa adaleka na moyo Rahabi, puta ule pabodzi pene na onsene a pabanja pache, thangwi iye adabisa anyakuzonda awiri ale akhadatuma Yoswa ku Yeriko ale. (Pidzukulu pyache mu Israele pilipo na lero.)

²⁶Pandzidzi wenewo Yoswa adacheuza anthu pakuchita kudumbira mbati, “Munthu onsene anayesera kumanga pontho mzinda wa Yeriko anakhala wakutembererwa pamaso pa MBUYA. Munthu onsene anaikha maziko a mzindawu, mwanache wautombo anafa. Munthu onsene anamanga pontho misuwo ya mzinda wenewu, chimalisira bele chache chinafa.”

²⁷Natenepo MBUYA akhali na Yoswa, pontho kuveka kwache kudafalikira m'dziko monsene mule.