Read cisena YOSWA 7 Bible Online

YOSWA 7 - cisena bible

YOSWA 7

¹Aisraele adachita mwakukhonda khulupirika pakukwata pinthu pya mu Yeriko pidatonga MBUYA kuti pyathema kuvungwa. Akani mwana Karimi, ule babachembo akhali wa dzinza ya Zabidi mwana Zera wa dzinza ya Yuda, adakwata pinthu pinango pyakukhondeswapi. Natenepo MBUYA adazhangalira Aisraele.

²Yoswa adagwinya amuna kubulukira ku Yeriko kwenda ku Ai, mzinda ule ukhali chifupi na Beti-Aveni kumabulukiro dzuwa a Betele mbaapanga mbati, “Ndokoni mukazonde nthemba.” Natenepo amuna ale adalamuka mbakazonda mzinda wa Ai.

³Pidabwera iwo kuna Yoswa kubulukira kumzinda kule adalonga kuna Yoswa mbati, “Si anthu onsene anafunika kamenya nkhondo na Ai tayu. Gwinyani kwene amuna pikwi piwiri penu pitatu basi. Lekani gwinyako anyankhondo onsene; thangwi si mzinda ukulu ene tayu.”

⁴Natenepo chifupi-fupi anyankhondo pikwi pitatu adenda kweneko; kwache adathamangiswako na amuna a ku Ai.

⁵Amuna a ku Ai ale adapha anyankhondo a Aisraele makumatatu na atanthatu mbathamangisa anango a iwo kubulukira kumsuwo wa mpanda wa mzindawo mpakana ku Sheberimu mbaaphera pamtelero. Na thangwi ya penepi Aisraele adaswipa mtima mbachita mantha.

⁶Natenepo Yoswa adang'amba nguwo zache mbapigwisa na fufumimba patsogolo pa Bokosi ya Chiverano ya MBUYA, mbakhala penepo kufikirana mawulo. Akadamu a Aisraele adachita chibodzi-bodzi mbapiwaza fumbi mumsolo mwawo kuonesa kutsukwala.

⁷Natenepo Yoswa adalonga mbati, “Sha! MBUYA Mulungu. Thangwi yache ninji mudatiwambusa mkulo wa Yorodani? Ayi mudachita tenepo kuti mutipereke m'manja mwa Aamori? Penu mutivunge. Mudatani kutikhazika pyathu kumtunda unango wa Yorodani ule?

⁸Mbuya, apo ndinalonga tani podi Aisraele athamangiswako na anyamalwawo?

⁹Akanani na anthu anango m'dzikomo anati ave penepi. Iwo anati atizungulire mbatipha tonsenene! Apo chinafuna imwe dzachita ninji kuti mukoye chilemedzo cha dzinanu ikulu?”

¹⁰MBUYA adalonga kuna Yoswa mbati, “Lamuka! Wapigwisiranji na fufumimba tenepa?

¹¹Aisraele adawa! Iwo aswa chiverano chidasasanya ine nawo chile. Iwo adakwata pinthu pyatongwa kuti pivungwe; iwo apiba, iwo anama pontho apiikha pabodzi pene na pinthu pyawo.

¹²Ndi thangwi yache Aisraele hadakwanise kukunda anyamalwawo tayu. Iwo adazungunuka mbathawa thangwi iwo ene asanduka chakuthema kuvungwa. Ine nkhabeve dzakhala namwe tayu mungakhonda vunga pinthu pili pakati panupo, pile pyatongwa kuti pivungwe.

¹³Lamuka! Ndoko ukaachenese anthu pamaso pa MBUYA mbuapange kuti apichenese okha ene kusasanyikira nsiku ya mangwana, thangwi pyalonga MBUYA Mulungu wa Israele mphipi: pinthu pile pidatonga ine kuti pivungwe pili pakati panu. Natenepo imwe nkhabe kwanisa kuimisana na anyamalwanu tayu mungakhonda kupibulusa penepi.

¹⁴Mangwana na machibese mudze dzinza na dzinza dzapichenesa mwekha ene pamaso pa MBUYA. Dzinza inafuna MBUYA dzaphata ile inabwera kutsogolo mbumba na mbumba. Mbumba inafuna MBUYA dzaphata inabwera kutsogolo banja na banja. Banja inafuna MBUYA dzaphatayo inabwera patsogolo munthu na munthu.

¹⁵Munthu anafuna dzaphatwa na pinthu pidatonga ine kuvungwa pile, iye pabodzi pene na pinthu pyache pyonsene pina iye pinavungwa na moto. Thangwi iye aswa chiverano cha MBUYA pontho iye achita chakuchitisa manyadzo pakati pa Aisraele.”

¹⁶Bzobzo mangwana mwache Yoswa adadza na Aisraele onsene mbaachitisa kudza patsogolo dzinza na dzinza. Natenepo dzinza ya Yuda idaphatwa.

¹⁷Kubuluka penepo dzinza ya Yuda idadza patsogolo mbumba na mbumba mbiphatwa ndi mbumba ya Zera. Kubuluka penepo mbumba ya Zera idadza patsogolo banja na banja mbiphatwa ndi banja ya Zabidi.

¹⁸Yoswa adadza na banja yeneyi patsogolo munthu na munthu mbaphatwa ndi Akani mwana Karimi, mdzukuluache Zabidi, ulembo babache akhali Zera wa dzinza ya Yuda.

¹⁹Tenepo Yoswa adalonga kuna Akani mbati, “Mwananga longa pyakuona pano pamaso pa MBUYA Mulungu wa Israele, pontho ubweke. Ngandipange chinchino pano chachita iwe. Leka kundibisira na chibodzi chene.”

²⁰Akani adatawira mbati, “Ndimomwene ine ndamdawiradi MBUYA Mulungu wa Israele. Tenepo pyachita ine mphipi:

²¹Pakati pa pinthu pyonsene pidapokosera ife, ine ndidaonapo chakufinika chakubalika pyakwanga cha ku Babiloni, siliva wakulemera makilogramu mawiri, pontho msaya wagolidi wakulemera theka ya kilogramu. Tenepo ine ndidapisirira pyakwanga mbandipikwata. Penepi ndapibisa m'khumbi mwanga mwakuchita kupifikhira, pansi pache mbandiikhapo siliva.”

²²Natenepo Yoswa adatuma amuna anango, ale adathamanga mbakapita m'khumbi mule mbagumanamo pinthu pile pyafikhirwadi, pansi pache mbapakhala siliva.

²³Iwo adapibulusa m'khumbi mule mbadza napyo kuna Yoswa na kuna Aisraele onsene mbapiikha pansi pamaso pa MBUYA.

²⁴Yoswa pabodzi pene na Aisraele onsene adakwata Akani, siliva, chakufinika, msaya wagolidi pabodzi pene na anache achimuna na achikazi ene, ng'ombe zache, mabulu ache na mabirache, khumbi yache na pinthu pyache pyonsene mbaenda ku Phedi ya Nyatwa.

²⁵Tenepo Yoswa adalonga mbati, “Thangwi yache ninji udatidzesera nyatwa ninga yeneyi. MBUYA anati adzese nyatwa pana iwe!” Anthu onsene adamponyera miyala mpakana kufa. Iwo adaponyera miyala, pontho kupisa banjache na pinthu pyache pyonsene.

²⁶Iwo adamuluka miyala mizinji pakhali iye pale. Miyala yeneyi ili penepo basi na lero. Ndi thangwi yache mbutoyo na lero imbachemerwa Phedi ya Nyatwa. Tenepo MBUYA hadazhangalirave anthu ale tayu.