Read cisena YOSWA 8 Bible Online

YOSWA 8 - cisena bible

YOSWA 8

¹MBUYA adalonga kuna Yoswa mbati, “Kwata anyankhondo onsene mbuende nawo pabodzi ku Ai. Leka chita mantha penu kuswipa mtima, thangwi ndinati ndikuchitise kukunda mfumu wa ku Ai, anthu ache, mzindache; pontho dziko yache inakhala yanu.

²Imwe muchite kuna Ai na mfumu wache ninga pidachita imwe kuna Yeriko na mfumu wache, mbwenye ulendo uno munakwanisa kukwata pida na pifuyo pyawo kukhala pyanu. Sasanyikani kusosa mzinda mwakuchita kututumusa kubulukira kunduli.”

³Natenepo Yoswa adalamuka kwenda ku Ai pabodzi pene na anyankhondo ache onsene. Iye adasankhula amuna akudziwa kumenya nkhondo mwadidi pikwi makumatatu mbaagwinya na mosiku;

⁴pontho adaapanga mbati, “Kabisaleni kukhundu inango ya mzindawo, kwache lekani kabisala kutali na mzindawo; monsenene sasanyikani pontho khalani m'maso.

⁵Ine pabodzi pene na amuna ana inewa tinapita mumzindamo kaasosa. Tenepo amuna a mu Ai angadza dzamenyana nafe, ife tinazungunuka mbatithawa ninga montho mudachitira ife pakutoma.

⁶Iwo anatithamangisa mpakana tiachitise kwenda kutali na mzindawo. Iwo ananyerezera kuti tikuathawa ninga mudachitira ife pakutoma pale.

⁷Kubuluka penepo imwe muvumbuke mudabisala imwe mule mbamupokosera mzindawo. MBUYA Mulungu wanu anaupereka m'manja mwanu.

⁸Mungaupokosera mzindawo upiseni na moto ninga montho mwakupangirani MBUYA. Matongero anga ngenewa.”

⁹Natenepo Yoswa adaagwinya iwombo adenderatu kabisala m'mbuto zawo. Iwo adadikhira kweneko kumadokero dzuwa a Ai. Mbuto ya pakati pa Ai na Betele. Mosiku wenewo Yoswa adagona mumsasa pabodzi na anthu onsene.

¹⁰Bzobzo na machibese Yoswa adalamuka mbagumanyisa anyankhondo. Kubuluka penepo iye pabodzi pene na akadamu a Aisraele adaatsogolera kwenda nawo ku Ai.

¹¹Anyankhondo pabodzi pene na iye adenda chakumsuwo ukulu wa mpanda wa mzindawo mbamanga msasawo kumpoto kwa Ai; pakati pa iwo na Ai pakhali phedi.

¹²Iye adakwata amuna chifupi-fupi pikwi pishanu mbaabisa kumabulukiro dzuwa a Ai, pakati pa Ai na Betele.

¹³Anyankhondo akhadasasanyika mwadidi mbakhala m'mbuto mwawo, ale akhali mumsasa akhali kumpoto kwa mzinda ule, alembo akhali pakubisala akhali kumabulukiro dzuwa a mzinda ule. Mosiku wenewo Yoswa adagona m'phedi.

¹⁴Pidaona mfumu wa ku Ai ule amuna a Yoswa, iye pabodzi pene na amunache a mumzinda mule adabuluka mwakuchimbiza kwenda chakuphedi ya Yorodani kamenya nkhondo na Aisraele pambuto yontho-yonthoyo pakhali iwo ulendo wakutoma ule. Iye hakhapidziwa tayu kuti amuna anango adabisala kale kunduli kwa mzindawo kuti amenyane naye.

¹⁵Yoswa na Aisraele onsene adathawa pyawo chadala pamaso pawo, tenepo Aisraele adathawa kwendera kuthando yatchetcha.

¹⁶Amuna onsene a mumzindamo adachemerwa kuti athamangise Aisraele ale. Iwo adamthamangisadi Yoswa mpakana kwenderatu kutali na mzinda ule.

¹⁷Nkhabe mbodzi adasalira mu Ai penu mu Betele tayu kukhonda thamangisa Aisraele. Iwo adasiya pyawo msuwo wa mzinda bwanju mbathamangisa Aisraele.

¹⁸Kubuluka penepo MBUYA adalonga kuna Yoswa mbati, “Thonyeza dipako ku Ai, ine ndikuikha mzindawu m'manja mwako.” Yoswa adachitadi ninga mudapangirwa iye,

¹⁹tenepo sindzidzi Yoswa nkhukwiza dzanjache, amuna akhadabisala ale adabuluka mwakuchimbiza kuthamangira mumzinda mule mbaupokosera. Kabodzi kene iwo adaupisa moto mzindawo.

²⁰Pidayang'ana amuna a ku Ai m'nduli, adaona utsi uli tolo. Pakhali nkhabeve njira inango yakuti iwo athawire tayu thangwi Aisraele, ale akhadathawira kuthando yatchetcha, akhadazungunuka kumenyana nawo.

²¹Pidaona Yoswa pabodzi pene na amunache onsene kuti anzawo akhadabisala ale adaupokosera mzinda ule pontho kuti aupisa moto, adazungunuka mbatoma kupha amuna a ku Ai.

²²Amuna akhadabisala ale adabuluka mumzinda mule mbamenyana na amuna a ku Ai. Natenepo amuna a ku Ai akhali pakati, akuzungulirwa na Aisraele khundu zonsene. Aisraele adapha amuna onsene ale mbapakhonda khala munthu na mbodzi ene wakuthawa.

²³Mbwenye iwo adakwata mfumu wa ku Ai mbadza naye wa moyo kuna Yoswa.

²⁴Pikhadamala Aisraele kupha amuna onsene a ku Ai m'minda na m'thando yatchetcha kukhadathamangisa iwo Aisraele kule pontho pidaonesesa iwo kuti onsene amaliratu, Aisraele onsene adabwerera kumzinda wa Ai mbakapha onsene akhali mwenemo ale.

²⁵Yoswa adathimiza basi kuthonyeza dipache kuna Ai pontho hadaitule pansi tayu kufikirana anthu onsene a mwenemo adamala phiwa. Anthu onsene akukhala mu Ai adaphiwa nsiku yeneyo. Amuna na akazi ene akhalipo pikwi khumi na piwiri.

²⁷Aisraele adakwata pifuyo na pinthu pikhadapokosera iwo mumzinda mule kukhala pyawo ninga montho mukhadalongera MBUYA kuna Yoswa.

²⁸Yoswa adapisa mzinda wa Ai mbauvungiratu. Na lero uli tenepo.

²⁹Iye adamanika pamuti mfumu wa ku Ai ule mbasiya manungo ache pamuti pale mpakana mawulo. Pidathobila dzuwa Yoswa adatonga kuti mtembo ule ubuluswepo. Natenepo mtembowo udaponywa pansi pa msuwo wa mzindawo. Iwo adaufikhira na mulu wa miyala. Muliwo ulipo na lero.

³⁰Kubuluka penepo Yoswa adamangira MBUYA Mulungu wa Israele, guwa yansembe paphiri ya Ebali.

³¹Iye adaisasanya pakutewezana na mudalongera Mose, nyabasa wa MBUYA, kupanga Aisraele, ninga montho mwalemberwa ipyo m'mwambo wa Mose kuti: guwa yakusasanywa na miyala ile chipo hidabenthulwe na pida pyasimbi tayu. Paguwapo adaperekapo nsembe yakupyerera kuna MBUYA, adapereka pontho pyakupereka pyawo pyachiphatizano.

³²Penepo pamaso pa Aisraele Yoswa adalemba kachiwiri kache pamiyala pale mwambo wa Mose ule.

³³Aisraele onsene na akulu-akulu awo, mathubu awo na atongi awo pontho pabodzi pene na alendo akukhala pakati pawo adaimira kumakhundu mawiri a Bokosi ya Chiverano ya MBUYA kuyang'ana kuna anyansembe a Chilevi adaithukula ale. Khundu ibodzi ya anthu adaimira mwakupasa nkhodolo phiri ya Gerizimu, khundu inangomboyo adaimira mwakupasa nkhodolo phiri ya Ebali. Mose, nyabasa wa MBUYA, ndiye akhadaatonga kuchita tenepo ndzidzi ungafika wakuti atambire mtsanzayiso.

³⁴Natenepo Yoswa adawerenga mwakuveka mwambo onsene, mtsanzayiso na dzedze ene, ninga montho mwalemberwa ipyo m'bukhu ya mwambo.

³⁵Matongero onsene a Mose adawerengwa na Yoswa kuna gulu yonsene ikhadagumanyikana penepoyo; ana, akazi, pabodzi pene na alendo onsene akukhala pakati pawo.