Read cisena YOSWA 9 Bible Online

YOSWA 9 - cisena bible

YOSWA 9

¹Kukunda kwa Aisraele kudaveka kuna mafumu onsene akumadokero dzuwa a mkulo wa Yorodani m'mapiri na m'tchinde mwa mapiri na kuna onsene akukhala m'khundu-khundu mwa Bara ya Mediterania mpakana kumpoto kwa Lebanoni; enewa ndi mafumu a Ahiti, Aamori, Akanani, Aperizi, Ahivi na Ayebusi.

²Onsenewa adagumanyikana kusasanya gulu ibodzi ya nkhondo kumenyana na Yoswa pabodzi pene na Aisraele onsene.

³Mbwenye anthu a ku Gibeoni, ale akhali Ahivi, adava pinthu pikhadachita Yoswa kuna Yeriko na Ai,

⁴natenepo iwo adanyerezera pyakunyengeza Yoswa. Iwo adakwata pyakudya mbapiikha m'masakha akusakala na mabudu akuikhiramo vinyu apigamba-pigamba mbapipakiza pamabulu awo.

⁵Iwo adavala nguwo zamasakala na nkhwaira zakung'ambika-ng'ambika zakuchita kusonwa pontho. Mikate idakwata iwo ikhali yakuuma pontho yachikukuyi.

⁶Tenepo iwo adenda kumsasa pa Giligala mbakalonga kuna Yoswa na kuna amuna a Chiisraele mbati, “Ife tabulukira dziko yakutali. Chinafuna ife ntchakuti imwe na ife tichite chiverano.”

⁷Mbwenye amuna a Chiisraele adalonga mbati, “Thangwi yache ninji kuti imwe na ife tichite chiverano? Mwinango imwe mumbakhala chifupi na ife?”

⁸Iwo adalonga kuna Yoswa mbati, “Ife ndife anyabasanu.” Yoswa adaavunza mbati, “Imwe ndimwe ani? Apo mwabulukira kupi?”

⁹Penepo iwo adatawira mbati, “Mbuya, ife tabulukira kudziko yakutali, thangwi tava pya MBUYA Mulungu wanu. Ife tava pyonsene pyachita iye m'dziko ya Iguputo,

¹⁰pontho na pidachita iye kuna mafumu mawiri a Aamori akumabulukiro dzuwa a mkulo wa Yorodani: Mfumu Sihoni wa ku Heshiboni na Mfumu Ogi wa ku Bashani, ambakhala m'dziko ya Ashitaroti ule.

¹¹Akadamu athu pabodzi pene na anthu athu onsene ambakhala m'dziko mwathu ndiye adatipanga kuti tikwate pyakudya kusasanyikira ulendo wakudza kuno dzagumanikana namwe. Ife tidapangwa dzalonga kuna imwe kuti, ‘Ife ndife anyabasanu. Tendeni imwe na ife tichite chiverano.’

¹²Yang'anani mikate yathuyi. Pidautoma ife ulendo wakudza kuno dzagumanikana namwe mikateyi ikhali yakupisa. Apo lero ngayang'anani! Yauma pontho ina chikukuyi.

¹³Mabudu anthembewa akhali atswa ene ndzidzi ukhaikha ife vinyu. Apo lero ngayang'anani! Amala ng'ambika pyawo. Nguwo zathu na nkhwaira zathu zamalira m'njiramu thangwi ya kulapha kwa nsinzo.”

¹⁴Amuna a Chiisraele adatambira pyakudya pyawo pile, kwache iwo hadavunze nzeru kuna MBUYA tayu.

¹⁵Yoswa adachita nawo chiverano cha mtendere anthu a ku Gibeoni mbatawira kukhonda kuapha. Akadamu a Aisraele adatsikimizira chiveranocho pakuchita kudumbira.

¹⁶Pidagwanda nsiku zitatu kutomera nsiku idachita iwo chiverano chile, Aisraele adadzindikira kuti anthu ale akhali atsanthembawo.

¹⁷Natenepo Aisraele adatoma kuatewera, tenepo pidagwanda nsiku zitatu adafika kumizinda kukhali anthu ale; Gibeoni, Kefira, Beeroti na Kiriati-Yearimu.

¹⁸Kwache Aisraele hadaaphe anthu ale tayu, thangwi ya kudumbira kudachita iwo na dzina ya MBUYA Mulungu wa Israele. Anthu adadungunya kuna akadamu pya penepi,

¹⁹mbwenye iwo adatawira mbati, “Ife tadumbira kuna iwo na dzina ya MBUYA Mulungu wa Israele, natenepo ife nkhabe kuakuwaza tayu.

²⁰Na thangwi ya kudumbira kwathu ife tathema kualeka na moyo; ngakhala tinakhonda kuchita tenepo, Mulungu anatitchunyusa.

²¹Tendeni tialeke akhale na moyo, kwache basawo inakhala yakutisakira nkhuni na kutitungira madzi.” Anthu adaphatizana napyo pidalonga akadamu awo pile.

²²Yoswa adachemeresa anthu a ku Gibeoni ale kuti adze kuna iye. Tenepo iye adaavunza mbati, “Thangwi yache ninji mudatinyengeza kuti mukubulukira dziko yakutali mwenemo imwe mumbakhala chifupi na ife?

²³Na thangwi yakuti imwe mwachita penepi, imwe ndimwe akutembererwa. Anthu anu ndzidzi onsene anakhala mabitchu akusaka nkhuni pontho akutunga madzi m'nyumba ya Mulungu wanga.”

²⁴Iwo adatawira mbati, “Mbuya, ife tidachita penepi thangwi tidapidziwa kuti mphyakuonadi kuti MBUYA Mulungu wanu akhadapanga nyabasache Mose kupereka kuna imwe dziko yonseneyi pontho kuti aphe anthu onsene anakhala mwenemowo pamaso panu. Natenepo tidachita mantha pikulu; tikhagopa kufa.

²⁵Tenepo ife tili m'manja mwanu. Chitani kuna ife pyonsene pinaona imwe kuti mphyakuthema.”

²⁶Natenepo Yoswa adachita ipi: iye adaatchinjiriza, pontho hadatawirise kuti Aisraele aaphe tayu.

²⁷Mbwenye pandzidzi onthowo iye adaachitisa kukhala mabitchu akusaka nkhuni pontho akutungira madzi anthu a ku Israele pontho na guwa yansembe ya MBUYA. Na lero anthu enewa basawo njeneyi m'mbuto zonsene zidasankhula MBUYA kuti apembedzerwemo zile.