Read cisena 2 ATESALONIKA 1 Bible Online

2 ATESALONIKA 1 - cisena bible

2 ATESALONIKA 1

¹Kubulukira kuna ine Paulo, pontho Sila na Timoti. Kwenda kuna mpingo wa ku Tesalonika, ule ngwa Mulungu Babathu pontho wa Mbuya Yesu Khristu.

²Kukoma mtima na mtendere pyakubulukira kuna Mulungu Babathu pontho Mbuya Yesu Khristu pikhale namwe.

³Abale athu, ife tathema kupereka takhuta kuna Mulungu ndzidzi onsene thangwi ya imwepo. Mphyadidi kuti ife tichite tenepo, thangwi chikhulupiro chanu chikuthimiza kukula pyakwanga, pontho kufunana kwanu unango na mwanzache kukukula pyakwanga.

⁴Natenepo ife pano timbakunyadirani pakati pa mipingo ya Mulungu, thangwi ya kuthimizira kwanu kupirira na kukhulupira pandzidzi wa nyatwa na kubonereswa kunaona imweku.

⁵Pyonsenepi pikutsikimizira kuti Mulungu ambatonga mseru mwakulungama. Chinafuna Mulungu ntchakuti imwe mukhale anthu akuthema kupita mu Ufumu wache, unaonera imwe nyatwa chinchinowu.

⁶Mulungu ngwakulungama; iye anabwezera nyatwa pana anthu anakuboneresaniwa,

⁷mbwenye imwe munaona nyatwa chinchino Mulungu anakupumisani pabodzi pene na ife. Iye anachita penepi ndzidzi unafuna dzaoneka Mbuya Yesu kubulukira kudzulu pabodzi pene na angelo ache amphamvu,

⁸na moto wakugaka, kudzatchunyusa anthu ambakhonda Mulungu ale, pontho na ale ambakhonda kuvera Mphangwa Zadidi zakulonga pya Mbuyathu Yesu.

⁹Kutchunyuswa kwawo kunakhala kwa kwenda na kwenda. Iwo hanaona nkhope ya Mbuya, pontho mphamvu zache zademelero tayu,

¹⁰iye angabwera pansiku yeneyo kutambira demelero na chilemedzo kubulukira kuna anthu ache onsene, pontho kuna anyakumkhulupira onsene. Imwembo munakhala nawo pabodzi, thangwi imwe mwakhulupira mphangwa zidadza na ife kuna imwe.

¹¹Ndi thangwi yache ife ndzidzi onsene timbakupemphererani kuti Mulungu wathu akuchitiseni kukhala anthu akuthemerana na moyo ule udakuchemererani iye. Na mphamvu zache iye achitise pikhumbo pyanu pya kuchita udidi kukwana-kwana, pontho amalise pyonsene pimbachita imwe kudzera muna chikhulupiro chanu.

¹²Na njira yeneyi dzina ya Mbuyathu Yesu inatambira demelero kubulukira kuna imwepo, pontho imwembo munatambira demelero kubulukira kuna iye kudzera muna kukoma mtima kwa Mulungu wathu pontho na kwa Mbuya[1] Yesu Khristu.